پتھر ہی سہی، راہ میں حائل تو رہوں گا

پتھر ہی سہی، راہ میں حائل تو رہوں گا
کچھ دیر تیرا مدِ مقابل تو رہوں گا

جب تک تیری بخشش کو بھرم کُھل نہیں جاتا
اے میرے سخی! میں تیرا سائل تو رہوں گا

اس واسطے زندہ ہوں سرِ مقتلِ یاراں
وابستہء کم ظرفیِ قاتل تو رہوں گا

اے تیز ہوا میرا دھواں دیکھ کے جانا
بجھ کر بھی نشانِ راہِ منزل تو رہوں گا

دشمن ہی سہی نام تو لے گا میرا تُو بھی
یوں میں تیری آواز میں شامل تو رہوں گا

محسن ضدِ اعدا سے اگر مر بھی گیا میں
معیارِ تمیزِ حقِ باطل تو رہوں گا

محسن نقوی​