وہ کیا دن تھا مدینے کی فضا میں تھا قیام اپنا۔۔ دورانِ حج2014 لکھا گیا ہدیہ کلام

بحمداللہ تعالی اکتوبر2014میں حج اکبر کی فضیلت نصیب ہوئی۔ مدینہ طیبہ کی حاضری کے بعد دل و دماغ پر مدینہ شریف ہی کی یادوں کا پہرا رہا۔ اسی کیفیت میں چند نعتیہ اشعار ترتیب پاگئے۔ جو کچھ روز قبل میرے گھر میں محفل میلاد کے دوران برادرم شہریار خان نے اپنی خوبصورت آواز میں پڑھ کر یادگار بنا دیے۔ اہلِ محبت کے پیشِ نذر ۔

اللھم صل علی سیدنا ومولانا محمد وعلیٰ آلہ وصحبہ وبارک وسلم

وہ کیا دن تھےمدینے کی فضا میں تھا قیام اپنا
درِ سرکار پہ سرتھا فلک پہ تھا مقام اپنا

زمانے بھر کے رنج وغم سے بوجھل دل تھا لایا میں
تیرے جلووں کی لذت نے بھلایا غم تمام اپنا

ہے میخواروں کاجھرمٹ ہرطرف میخانے میں ساقی
تیری نظروں سے بھرتا ہے یہاں ہر پیاسا جام اپنا

گنہگارو ! چلے آو مدینے مغفرت پانے
نویدِ جاوکَ سے کردیا رب نے انعام اپنا

وہ سایہ سبز گنبد کا، ٹھکانہ غم کے ماروں کا
سوالی بن کے قدموں میں پڑے رہنا تھا کام اپنا

ہوائیں بھی مودب ہیں، فضائیں باادب سی ہیں
یقینا یہ بھی رکھتی ہیں یہاں دھیما خرام اپنا

مدینے کے مسافر تیری گردِ پا کے میں صدقے
سنہری جالی کے آگے تو جا کہنا سلام اپنا

حُکم لا ترفعو پیشِ نظر رکھنا ارے حاجی
اگر تحبط سے بچنا ہے رکھو دھیما کلام اپنا

میسر آپ کے در کی فقیری ہو مجھے ایسی
مدینہ شہر کے منگتوں کے منگتوں میں ہو نام اپنا

مزہ جب ہے رضاؔ محشر میں آقا اتنا فرما دیں
فرشتو! چھوڑ دو اس کو، کہ یہ بھی ہے غلام اپنا

کلام: محمد نعیم رضا قادری۔ 6 اکتوبر2014۔منیٰ ۔مکۃ المکرمہ

​

 

سبحان اللہ۔۔۔۔۔
بہت عمدہ کلام۔۔@نعیم صاحب بہت بہت شکریہ شئیر کرنے کے لیے۔جزاک اللہ خیرا

 

شکریہ محترم بھائی۔ دعا کیا کریں۔ جزاک اللہ

 

حوصلہ افزائی کے لیے مشکور ہوں۔ اللہ کریم آپکو جزائے خیر عطا کرے۔ آمین

 

بہت شکریہ۔ جزاک اللہ خیر
دعا کریں اُس بارگاہ سے کرم نوازیاں برقرار رہیں۔

 

اللہ پاک آپ جیسے اچھے انسان کو بھی جزائےخیر عطا فرمائے۔آمین ثم آمین

 

مزہ جب ہے رضاؔ محشر میں آقا اتنا فرما دیں
فرشتو! چھوڑ دو اس کو، کہ یہ بھی ہے غلام اپنا
سبحان اللہ ۔۔۔۔ بہت عمدہ

 

مزہ تو غلامی کا تو جبھی ہے نا۔
ورنہ تو ضیاع ہی ضیاع ہے
۔۔۔۔۔۔۔۔۔۔۔۔۔۔۔
آپکی پسندیدگی و حوصلہ افزائی کے لیے ممنون خاطر ہوں۔ جزاک اللہ خیر