وہ خدائے کن فکاں وہ مالک کون و مکاں ۔ بلال رشید

وہ خدائے کن فکاں وہ مالک کون و مکاں
ہر طرف پھیلے ہوئے ہیں اس کی قدرت کے نشاں
فکر ہے محدود میری اور وہ رب جہاں
نطق عاجز سے ہوں اس کی خوبیاں کیسے بیاں
نیک و بد کی کوئی بھی تفریق اس کے ہاں نہیں
سب پہ کرتا ہے کرم وہ لاشریک و لامکاں
ہے اسی کی بادشاہی دائمی اے دوستو
حمد کرتے ہیں سدا اس کی زمین و آسماں
ہے وہی سب موسموں کا اور ہواوں کا خدا
حکم سے اس کے رواں ہے بادلوں کا کارواں
چاند تارے حرف کن سے اس نے روشن کر دیے
اس کے ہی انوار سے پرنور ہے یہ کہکشاں
جو ثنائے کبریا میں صرف کرتا ہے سخن
تا ابد ایسا سخن ور ہے سعادت کا نشاں
چار مصحف وہ اتارا معرفت کے واسطے
اور نبیوں کو بنایا اس نے اپنا ترجماں
آزمائش میں نہ مجھ کو ڈال اے پروردگار
میرے مولا ہوں بہت ہی میں نحیف و ناتواں
وہ مہیا روز روزی مجھ کو کرتا ہے بلال
کب مجھے رکھتا ہے بھوکا وہ خدائے مہرباں
-----
بلال رشید

​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ- جزاک اللہ

 

اللہ تعالیٰ آپ کو بھی جزائے خیر عطا کرے آمین