نئی بیت بازی - حصہ دوم

بدلا نہ میرے بعد بھی موضوعِ گفتگو
میں جاچکا ہوں پھر بھی تری محفلوں میں ہوں

 

موم کی سیڑھی پہ چڑھ کے چھو رہے تھے آفتاب
پھول سے چہروں کو یہ کوشش بڑی مہنگی پڑی

 

پھول تھے رنگ تھے ،لمحوں کی صباحت ہم تھے
ایسے زندہ تھے کہ جینے کی علامت ہم تھے

 

بزم میں وہ سرفرازی کی علامت لے گئے
جب گئے تو ساتھ میرا قدو قامت لے گئے

 

اچھا ہے نہیں آئے وہ اس دھوپ کی گرمی میں
قامت تو قیامت تھی سایہ بھی بلا ہوتا

 

پڑی جو دھوپ تو جسم سے سایہ نکلا
ہائے اس کڑے وقت میں اپنا بھی پرایا نکلا

 

تمام عمر کا ہے ساتھ آب و ماہی کا
پڑے جب وقت تو پانی نہ جال میں آئے

 

سفر آغاز کِیا بے سر و سامانی میں
ساتھ پانی بھی نہ رکھا جو چلے پانی میں

 

انجام اس کے ہاتھ ہے ،آغاز کر کے دیکھ
بھیگے ہوئے پروں سے ہی پرواز کر کےدیکھ

 

صدقہ جاں سوز ی فرقت تو مجھ پر بار تھا -
میری حالت دیکھ کر تم کیوں پریشاں ہو گئے

 

تیرے طریقِ محبت پہ بار ہا سوچا
یہ جبر تھا کہ تیرے اختیار کا موسم

 

ابھی تو دھند میں لپٹے ہوئے ہیں سب منظر
تم آو گے تو سب موسم بدل چکے ہوں گے

 

یہ کیا منظر ہے کہ اٹھتے ہیں نہ بڑھتے ہیں قدم
تک رہا ہوں دور سے منزل کو میں ،منزل مجھے

 

آسرا دے اے شعورِ سعیِ لاحاصل مجھے
وجہِ سرگرمی ہے وہمِ دوری منزل مجھے

 

دیوارِ خستگی ہوں مجھے ہاتھ نہ لگا
میں گر پڑوں گا دیکھ،مجھے آسرا نہ دے

 

عاشق ہوئے وہ جب سے عدو پر یہ حال ہے
رکھ رکھ کے ہاتھ دیکھتے ہیں بار بار دل

 

ناوکِ ناز سے مشکل ہے بچانا دل کا
درد اٹھ اٹھ کے بتاتا ہے ٹھکانہ دل کا

 

اب وہ خود محوِ علاج دردِ پنہاں ہو گئے
اے خوشا قسمت کہ پھر جینے کے ساماں ہو گئے

 

عشق کی مایوسیوں میں سوز پنہاں کچھ نہیں
اس ہوا میں یہ چراغ زیر داماں کچھ نہیں

 

وہی چراغ بجھا جس کی لو قامت تھی
اسی پہ ضرب پڑی جو شجر پرانا تھا

 

پھونکوں نے بجھا ہوں نہ مٹانے سے مٹا ہوں
میں وقت ہوں تاریخ کے ماتھے پہ لکھا ہوں

 

تم ایسا کرنا کہ کوئی جگنو کوئی ستارہ سنبھال رکھنا
مرے اندھیروں کی فکر چھوڑو تم اپنے گھر کا خیا ل رکھنا

 

خدا کرے میری ارض پاک پر اترے
وہ فصلِ گل جسے اندیشہء زوال نہ ہو

 

روٹھا ہی رہے مجھ سے، یہ منظور ہے مجھے لیکن
لوگو اسے سمجھاو میرا شہر نہ چھوڑے