میں چار جماعتیں کی پڑھیاں_میں فتوے لاواں ہر اک تے_Kashif Habaab_Main char jamatan ki parhiyan

میں چار جماعتاں کی پڑھیاں
میں فتوے لاواں ہر اک تے
کدی بے عملاں تے
کدی بے عقلاں تے
کدی شاعری تے، کدی گاؤن تے
کدی ہسّن تے کدی روون تے
میں فتوے لاواں ہر اک تے

میں آپ مسیتی جاواں ناں
جے جاواں مَن ٹکاواں ناں
میں فتوے لاواں اوتھے وی
کدی وضو تے کدی نماز اتے
کدی اُچی نیویں آواز اتے
کدی مَنن یا نہ مَنن تے
ہتھ اُتے تھلے بنھن تے
میں فتوے لاواں ہر اک تے__!!

_کدی کافر آکھاں مولویاں نوں
کدی کعبہ آکھاں مولویاں نوں
میں فتوے لاواں اینہاں تے وی
کدی ٹوپی تے کدی داڑھی تے
گل چنگی یا گل ماڑی تے
کدی شہیداں تے کدی مریاں تے
کدی مناؤندے جمن ورھیاں تے
کدی جنگاں تے کدی جہاد اتے
کدی دین دی ہندی واد تے
میں فتوے لاواں ہر اک تے

کدی رسم آکھاں دین نوں
کدی دین آکھاں رسماں نوں
میں رَبّ، قرآن نوں من لیا
پر منیا چُکن قسماں نوں

کدی عیداں تے شبراتاں تے
کدی جاگن والیاں راتاں تے
کدی زیراں تے کدی زبراں تے
کدی مزاراں تے کدی قبراں تے
میں فتوے لاواں ہر اک تے__

میں سُنی، وہابی، حنفی ہویا
میں مالکی، شافعی، حنبلی ہویا
میں سب کجھ ہویا...
#پر_ہویا_نہ_مسلمان
ایہہ میں جو چار کتاباں پڑھیاں
اپنے علم دیاں لاواں تڑیاں__

ویلّا میرے علم دا ٹھوٹھا جے
ہر فتوٰی میرا جھوٹھا جے
میں آپ تاں فرض نبھاواں نہ
دین دے نیڑے جاواں نہ !!
پر کافر آکھاں ہر اک نوں !!
میں فتوے لاواں ہر اک نوں__!!

کاشف حباب