میں چار جماعتاں کی پڑھیاں - میں فتوے لاواں ہر اک تے- کاشف حباب

میں فتوے لاواں ہر اک تے

*میں چار جماعتاں کی پڑھیاں*
*میں فتوے لاواں ہر اک تے،*
کدی بے عملاں تے،
کدی بے عقلاں تے،
کدی شاعری تے، کدی گاؤن تے،
کدی ہسّن تے کدی روون تے
*میں فتوے لاواں ہر اک تے،*

*میں آپ مسیتی جاواں ناں!*
جے جاواں مَن ٹکاواں ناں
میں فتوے لاواں اوتھے وی
کدی وضو تے کدی نماز تے
کدی اُچی نیویں آواز تے
کدی مَنن یا نہ مَنن تے
ہتھ اُتے تھلے بنھن تے
*میں فتوے لاواں ہر اک تے!*

_کدی کافر آکھاں مولویاں نوں_
کدی کعبہ آکھاں مولویاں نوں
میں فتوے لاواں ایناں تے وی
کدی ٹوپی تے کدی داڑھی تے
گل چنگی یا گل ماڑی تے
کدی شہیداں تے کدی مریاں تے
کدی مناؤندے جمن ورھیاں تے
کدی جنگاں تے کدی جہاد تے
کدی دِین دی ہُندی واد تے
*میں فتوے لاواں ہر اک تے*

کدی رسم آکھاں دین نوں
کدی دین آکھاں رسماں نوں
میں رَبّ، قرآن نوں من لیا
پر منیا چُکن قسماں نوں

کدی عیداں تے شبراتاں تے
کدی جاگن والیاں راتاں تے
کدی زیراں تے کدی زبراں تے
کدی مزاراں تے کدی قبراں تے
*میں فتوے لاواں ہر اک تے*

میں سُنی،وہابی،حنفی ہویا،
میں مالکی شافعی حنبلی ہویا
میں سب کجھ ہویا...
# پر_ہویا_نہ_مسلمان
اے میں جو چار کتاباں پڑھیاں
اپنے علم دیاں لاواں تڑیاں

ویلا میرے علم دا ٹھوٹھا جے
*ہر فتوٰی میرا جھوٹھا جے*
میں آپ تاں فرض نبھاواں نہ
*دین دے نیڑے جاواں نہ!*
*پر کافر آکھاں ہر اک نوں!*
*میں فتوے لاواں ہر اک نوں!*

پنجابی شاعر: کاشف حباب