میرے سخن کی شان ہے حمد خدائے کل ۔ بلال رشید

میرے سخن کی شان ہے حمد خدائے کل
اور معرفت کی جان ہے حمد خدائے کل
جو فطرتا ہے قلب مسلماں میں جاگزیں
اس عشق کی اذان ہے حمد خدائے کل
سارا وجود وجد میں آتا ہے اس گھڑی
کرتی جو یہ زبان ہے حمد خدائے کل
مجھ جیسے بے ہنر کو زمانے میں ہر جگہ
کیا رکھتی شادمان ہے حمد خدائے کل
رکھتی ہے منسلک جو ہمیں کبریا کیساتھ
وہ عشق کا نشان ہے حمد خدائے کل
ہیں جس میں آگہی کے اجالےچھپے ہوئے
وہ نور دوجہان ہے حمد خدائے کل
اس سےہی ابتدائے سخن کرتے ہیں سدا
ہم شاعروں کا مان ہے حمد خدائے کل
تعظیم سے کھڑا ہے سخن اس کے روبرو
نظموں کی حکمران ہے حمد خدائے کل
لب پر زمیں کےشام و سحر ہے ثناۓ حق
اور کرتا آسمان ہے حمد خدائے کل
اہل ولا کے واسطے محشر کی دھوپ میں
رحمت کا سائبان ہے حمد خدائے کل
اس کے سبب بلال تری مغفرت ہوئی
کیا تجھ پہ مہربان ہے حمد خدائے کل
----
بلال رشید

​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ- جزاک اللہ

 

اللہ تعالیٰ آپ کو بھی جزائے خیر عطا کرے آمین