مطلع ہر کلام بسم اللہ - حبیب سرور عزیزی

مطلع ہر کلام بسم اللہ
کامرانی کا نام بسم اللہ

میکدے کے امام بسم اللہ
دے دے عرفاں کا جام بسم اللہ

کشت جاں کو ہرا بھرا کر دے
روح پرور کلام بسم اللہ

کامیابی کی یہ ضمانت ہے
وجہ کیف دوام بسم اللہ

سچ تو یہ ہے کہ ایک تیرے بغیر
کام سب نا تمام بسم اللہ !

اِس کی عظمت سے ہیں سبھی آگاہ
پڑھتے ہیں خاص و عام بسم اللہ

جب بھی کرنا ہو کام کا آغاز
پڑھ بصد احترام بسم اللہ

ورد اِس کا رہے تو کیا کہنا
دے سکون دوام بسم اللہ

بات جب ہے کہ پڑھتے ہی رہئے
کتنا اچھا ہے نام بسم اللہ

دیکھ تو اک ذرا کلام خدا
ابتدائے کلام بسم اللہ

جاگ اٹھے گا نصیب اے سرورؔ
ورد کر تو مدام بسم اللہ​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ- جزاک اللہ

 

اللہ تعالیٰ آپ کو بھی جزائے خیر عطا کرے آمین