لفظ محبت پر غزل کہیں

لفظ محبت پر غزل کہیں

 

محبت کی اسیری سے رہائی مانگتے رہنا
بہت آساں نہیں ہوتا جدائی مانگتے رہنا

ذرا سا عشق کر لینا،ذرا سی آنکھ بھر لینا
عوض اِس کے مگر ساری خدائی مانگتے رہنا

کبھی محروم ہونٹوں پر دعا کا حرف رکھ دینا
کبھی وحشت میں اس کی نا رسائی مانگتے رہنا

وفاؤں کے تسلسل سے محبت روٹھ جاتی ہے
کہانی میں ذرا سی بے وفائی مانگتے رہنا

عجب ہے وحشت ِ جاں بھی کہ عادت ہو گئی دل کی
سکوتِ شام ِ غم سے ہم نوائی مانگتے رہنا

کبھی بچے کا ننھے ہاتھ پر تتلی کے پر رکھنا
کبھی پھر اُس کے رنگوں سے رہائی مانگتے رہنا​

 

فضا ھے اور مرے چاروں طرف محبت ھے
ہوا ھے اور مرے چاروں طرف محبت ھے

یہ حادثہ ھے کہ ھے معجزہ نہیں معلوم
خدا ھے اور مرے چاروں طرف محبت ھے

کوئی عجیب سا سایہ فلک کی اس جانب
کھڑا ھے اور مرے چاروں طرف محبت ھے

مرے وجود کے پہلو میں کوئی شوروغل
بپا ھے اور مرے چاروں طرف محبت ھے

اک اجنبی مری بے چینیوں کا باعث بھی
ہوا ھے اور مرے چاروں طرف محبت ھے

مرے نصیب کی دیواروں پر غمِ دوراں
لکھا ھے اور مرے چاروں طرف محبت ھے

 

اب آگے ؟

 

آگے آپ لکھیں‌آپ صاحب علم ھیں ہم تو آپ کے سامنے جاہل ھیں

 

اور اس سے آگے ؟

 

جواب: لفظ محبت پر عزل کہیں

چاہت کے صبح و شام محبت کے رات دن
دل ڈھونڈتا ہے پھر وہی فرصت کے رات دن

وہ شوقِ بے پناہ میں الفاظ کی تلاش
اظہار کی زباں میں لکنت کے رات دن

وہ ابتدائے عشق وہ آغازِ شاعری
وہ دشتِ جاں میں پہلی مسافت کے رات دن

سودائے آذری میں ہوائے صنم گری
وہ بت پرستیوں مین عبادت کے رات دن

روئے نگاراں و چشمِ غزالاں کے تذکرے
گیسوئے یار وحرف و حکایت کے رات دن

ناکردہ کاریوں پر بھی بدنامیوں کا شور
اختر شماریوں پہ بھی تہمت کے رات دن

میر و انیس و غالب و اقبال سے الگ
راشد ،ندیم ، ٍفیض سے رغبت کے رات دن

رکھ کر کتابِ عقل کو نسیاں کے طاق پر
وہ عاشقی میں دل کی حکومت کے رات دن

ہر روز روزِ ابر تھا، ہر رات چاند رات
آزاد زندگی تھی ،فراغت کے رات دن

اک دشمنِ وفا کو بھلانے کے واسطے
چارہ گروں کی پندو نصیحت کے رات دن

پہلے بھی جاں گسل تھے مگر اس قدر نہ تھے
اک شہرِ بے اماں میں سکونت کے رات دن

پھر یہ ہوا شیوہ دل ترک کر دیا
اور تج دیئے تھے ہم نے محبت کے رات دن

فکرِ معاش شہر بدر کر گئی ہمیں
پھر ہم تھے اور قلم کی مشقت کے رات دن

نو آوردگانِ شہرِتمنا کو کیا خبر
ہم ساکنانِ کوئے ملامت کے رات دن
احمد فراز​

 

جواب: لفظ محبت پر عزل کہیں

اب اگر نظم کا سلسلہ چل ہی پڑا ہے تو۔۔۔۔۔

 اے محبت !

تیری قسمت
کہ تجھے مفت ملے ہم سے دانا
جو کمالات کیا کرتے تھے
خشک مٹی کو امارات کیا کرتے تھے
اے محبت!
یہ تیرا بخت
کہ بن مول ملے ہم سے انمول
جو ہیروں میں تُلا کرتے تھے
ہم سے منہ زور
جو بھونچال اُٹھا رکھتے تھے
اے محبت میری!
ہم تیرے مجرم ٹھہرے ،
ہم جیسے جو لوگوں سے سوالات کیا کرتے تھے
ہم جو سو باتوں کی ایک بات کیا کرتے تھے
تیری تحویل میں آنے سے ذرا پہلے تک
ہم بھی اس شہر میں عزت سے رہا کرتے تھے
ہم بگڑتے تو کئی کام بنا کرتے تھے
اور !
اب تیری سخاوت کے گھنےسائے میں
خلقتِ شہر کو ہم زندہ تماشا ٹھہرے
جتنے الزام تھے
مقسوم ہمارا ٹھہرے
اے محبت !
ذرا انداز بدل لے اپنا
تجھہ کو آئندہ بھی عاشقوں کا خون پینا ہے
ہم تو مر جائیں گے ، تجھ کو مگر جینا ہے
اے محبت !
تیری قسمت
کہ تجھے مفت ملے ہم سے انمول
ہم سے دانا۔۔۔۔۔
اے محبت!

​

 

محبت کی طبیعت میں یہ کیسا بچپنا قدرت نے رکھا ہے
کہ یہ جتنی پرانی جتنی بھی مضبوط ہو جائے
اسے تائید تازہ کی ضرورت پھر بھی رہتی ہے
یقین کی آخری حد تک دلوں میں لہلاتی ہو
نگاہوں سے ٹپکتی ہو،لہو میں جگمگاتی ہو
ہزاروں طرح کے دلکش، حسیں ہالے بناتی ہو
اسے اظہار کے لفظوں کی حاجت پھر بھی رہتی ہے
محبت مانگتی ہے یوں گواہی اپنے ہونے کی
کہ جیسے طفلِِِ سادہ شام کو اک بیج بوئے
اور شب میں بارہا اٹھے زمیں کو کھود کر دیکھے کہ پودا اب کہاں تک ہے
محبت کی طبیعت میں عجب تکرار کی خو ہے
کہ یہ اقرار کے لفظوں کوسننے سے نہیں تھکتی
بچھڑنے کی گھڑی ہویا کوئی ملنے کی ساعت ہو
اسے بس ایک ہی دھن ہے
کہو مجھ سے محبت ہے
کہو مجھ سے محبت ہے
تمہیں مجھ سے محبت ہے
سمندر سے کہیں گہری، ستاروں سے سوا روشن
پہاڑوں کی طرح قائم، ہواؤں کی طرح دائم
زمیں سے آسماں تک جس قدر اچھے مناظر ہیں
محبت کے کنائے ہیں، وفا کے استعارے ہیں
ہمارے ہیں
ہمارے واسطے یہ چاندنی راتیں سنورتی ہیں
سنہرا دن نکلتا ہے
محبت جسطرف جائے، زمانہ ساتھ چلتا ہے

 

محترم انتظامیہ سے درخواست ہے کہ اس تھریڈ کے عنوان میں تصحیح کر دیں
" عزل " لکھا گیا ہے " غزل " کی جگہ
بہت دعائیں

 

غزل - موجہء برق تبسم

٭ ٭ ٭
راز یہ اہل محبت پہ عیاں ہوتا ہے
لمحہء ہجر صدی سے بھی گراں ہوتا ہے
جس کے سینے میں محبت کی لگن ہوتی ہے
وہیں جاتا ہے وہ ، محبوب جہاں ہوتا ہے

اس طرح تم مری آنکھوں میں بسے رہتے ہو
مجھ کو ہر اک پہ تمہارا ہی گمان ہوتا ہے

اپنا احوال بتاؤ میری روداد سنو
دل جو مل جائیں تو پھر فرق کہاں ہوتا ہے

ہو سر راہ ملاقات یہ امکان نہیں
ہاں مگر شوق یہ خوابوں میں جواں ہوتا ہے

آ تش عشق کا انداز جدا ہے سب سے
شعلے اٹھتے ہیں کہیں پر نہ دھواں ہوتا ہے

میرے ہونٹوں پہ مچل اٹھتا ہے اک نام حسیں
اس طرح فاش مرا سر نہاں ہوتا ہے

ڈھونڈنے سے بھی نہیں ملتا مجھے اس کا سراغ
موجہء برق تبسم وہ کہاں ہوتا ہے

دور رہ کر کبھی بڑھتی ہے محبت غوری
اور کبھی قرب میں الفت کا زیاں ہوتا ہے​