قطعات

آ تیرے ہونٹ چوم لوں اے مژدۂ نجات
صدیوں کے بعد ختم پہ آئی ستم کی رات
ہر شاخ پر کھلے ہوئے رنگ شفق کے پھول
ہر نخل کی کمر میں نسیم سحر کا ہات

 

لہو روتے نہ اگر ہم دمِ رخصت یاراں
کیا عجب تھا کہ کوئی اور تماشہ کرتے
چلو اچھا ہے کہ وہ بھی نہیں نزدیک اپنے
وہ جو ہوتا تو اُسے بھی نہ گوارا کرتے

 

جو رعنائی نگاہوں کے لئے فردوسِ جلوہ ہے
لباسِ مفلسی میں کتنی بے قیمت نظر آتی
یہاں تو جاذبیت بھی ہے دولت ہی کی پروردہ
یہ لڑکی فاقہ کش ہوتی تو بدصورت نظر آتی
جون ایلیا

 

ہر نفس جس کی آرزو تھی مجھے
تھا وہی شخص میرے پہلو میں
اس میں کس کی تلاش تھی مجھ کو
کس کی خوشبو تھی اس خوشبو میں؟
جون ایلیا

 

آنکھوں کے گلابوں کو نظموں میں چھپا لوں گا
زلفوں کے اجالوں سے غزلوں کو سجا لوں گا
ہونٹوں سے تراشوں گا اشعار کی کلیوں کو
سوئی ہوئی نیندوں سے قطعات چرا لوں گا

صابر دت

 

بہت خوبیاں ہیں ہوس کار دل میں
نیا شور مچتا ہے ہر بار دل میں
بدن کو کسو اور بس مسکرا دو
اتر جاؤ اب آخری بار دل میں

 

سر میں تکمیل کا تھا اک سودا
ذات میں اپنی تھا ادھورا میں
کیا کہوں تم سے کتنا نادم ہوں
تم سے مل کر ہوا نہ پورا میں
قطعہ
جون ایلیا

 

دیکھ لی ہے تشنگی بیکار کی
پیروی کرنی ہے اب افکار کی
ہم نے جو دولت کو درجہ دیا
اب ضرورت ہے بھلے کردار کی


زنیرہ گل​

 

عمر کی راہ میں راستے بدل جاتے ہیں
وقت کی آندھی میں انسان بدل جاتے ہیں
سوچتے ہیں کہ تمہیں اتنا یاد نہ کریں لیکن
آنکھ بند کرتے ہی ارادے بدل جاتے ہیں

 

مخلوق تو فنکار ہے اس درجہ کہ پل میں
سنگِ درِ کعبہ سے بھی اصنام تراشے
تو کون ہے اور کیا ہے، ترا داغِ قبا بھی
دنیا نے تو مریم پہ الزام تراشے

 

بات ہی کب کسی کی مانی ہے
اپنی ہٹ پوری کر کے چھوڑو گی
یہ کلائی یہ جسم اور یہ کمر
تم صراحی ضرور توڑو گی

 

خزاں جب تک چلی جاتی نہیں ہے
چمن والوں کو نیند آتی نہیں ہے
جفا جب تک کہ چونکاتی نہیں ہے
محبت ہوش میں آتی نہیں ہے

 

تو نے ديکھی ہيں وہ پيشانی وہ رخسار وہ ہونٹ
زندگی جن کے تصور ميں لٹا دی ہم نے
تجھ پہ اٹھی ہيں وہ کھوئی ہوئی ساحر آنکھيں
تجھ کو معلوم ہے کيوں عمر گنوا دی ہم نے

 

بےنور ہو چکی ہے بہت شہر کی فضا
تاریک راستوں میں کہیں کھو نہ جائیں ہم
اس کے بغیر آج بہت جی اداس ہے
جالب چلو کہیں سے اسے ڈھونڈ لائیں ہم
( پاکستانی55 بھائی )

 

سوائے اس کے تعارف کوئی نہیں میرا
میں وہ پرندہ ہوں جو اپنے پرنہیں لایا
نجانے کس کو ضرورت پڑے راہ میں
چراغ راہ میں دیکھا تھا گھرنہیں لایا

 

اشک جب دیدہ تر سے نکلا
ایک کانٹا سا جگر سے نکلا
پھر نہ میں رات گئے تک لوٹا
ڈوبتی شام جو گھر سے نکلا

 

گل تیرا رنگ چرا لائے ہیں گلزاروں میں
جل رہا ہوں بھری برسات کی بوچھاروں میں
مجھ سے کترا کے نکل جا مگر اے جان حیا
دل کی لو دیکھ رہا ہوں تیرے رخساروں میں

 

یہ نرم نرم ہوا جھلملا رہے ہیں چراغ
تیرے خیال کی خوشبو سے بس رہے ہیں دماغ
دلوں کو تیرے تبسم کی یاد یوں آئی
کہ جگمگا اٹھیں جس طرح مندروں میں چراغ

 

پھر کہو گے تم مقابل کی سزا کے واسطے
آئینے کو ہاتھ سے رکھ دو خدا کے واسطے
کعبہ دل کو نہ تاکو تم جفا کے واسطے
اے بتو ! یہ گھر خدا کا ہے ، خدا کے واسطے

 

تو بے وفا ہی سہی تجھ سے پیار آج بھی ہے
تیرے لیے یہ دل و جاں نثار آج بھی ہے
میں جانتا ہوں نہ آئے گا تو پلٹ کے کبھی
مگر مجھے تو تیرا انتظار آج بھی ہے

 

ہے یہ اک اور نئی سخت مصیبت گُل کی
گُل فروشوں نے گرا رکھی ہے قیمت گُل کی
توڑ سکتے ہیں وہی گل کو یوں بیدردی سے
جن کے دل میں نہ رہی ہو کبھی الفت گل کی

زنیرہ گل

 

اس سے پہلے کہ بے وفا ہو جائیں
کیوں نہ اے دوست ہم جدا ہو جائیں
تو بھی ہیرے سے بن گیا پتھر
ہم بھی کل جانے کیا سے کیا ہو جائیں

 

اس شہر سنگ دل کو جلا دینا چاہئے
پھر اس کی خاک کو بھی اڑا دینا چاہئے
ملتی نہیں پناہ ہمیں جس زمین پر
ایک حشر اس زمیں پہ اٹھا دینا چاہئے