قبائلی عوام دہشتگردوں کے سہولت کاروں سے ہوشیار رہیں: آرمی چیف

قبائلی عوام دہشتگردوں کے سہولت کاروں سے ہوشیار رہیں: آرمی چیف

رمی چیف جنرل قمر جاوید باجوہ کا کہنا ہے کہ قبائلی عوام دہشت گردوں کے سہولت و معاونت کاروں سے ہوشیار رہیں۔

پاک فوج کے شعبہ تعلقات عامہ (آئی ایس پی آر) کے ڈی جی میجر جنرل آصف غفور کے مطابق آرمی چیف نے خیبر پختونخوا کے ضلع میرانشاہ کا دورہ کیا، دورے کے دوران انہوں نے قبائلی عمائدین سے ملاقات کی اور خطاب کیا۔

آرمی چیف کا کہنا تھا کہ پاک افغان سرحد پر باڑ لگانے کےعمل سے دہشت گردوں کی آمدورفت کم ہوئی ہے۔ پاکستان میں دیرپا امن افغان امن سے جڑا ہے۔ وہاں پر دیر پا امن کے لیے پاکستان اپنا اہم کردار ادا کر رہا ہے کیونکہ افغانستان ہمارا برادر اسلامی ہمسایہ ملک ہے۔ جتنا پاکستان میں امن کے خواہش مند ہیں اتنا ہی افغانستان میں ہیں
جنرل قمر جاوید باجوہ کا کہنا تھا کہ یہ عناصر پر امن شہریوں کے درمیان رہ کے دشمن قوتوں کے ایجنڈے پر کام کرتے ہیں۔ ان عناصر کو طاقت کے ذریعہ دبانا مشکل کام نہیں ہے۔ سیکیورٹی فورسز کی شہادتوں کے باوجود ہم نہیں چاہتے کہ ان عناصر سے نمٹنے کے دوران عام شہری متاثر ہوں۔ باہم تعاون سے ہی ایسے دہشت گردوں کو شکست دے سکتے ہیں۔

آرمی چیف کا کہنا تھا کہ قبائلی علاقوں میں ہونے والے ترقیاتی منصوبوں کی بر وقت تکمیل سے امن اور استحکام و خوشحالی کا نیا دور شروع ہو گا۔

آئی ایس پی آر کے مطابق جنرل قمر جاوید باجوہ سے ملاقات کے دوران قبائلی عمائدین نے آرمی چیف کو قبائلی علاقوں میں مزید ترقیاتی منصوبوں کے ساتھ دیگر منصوبوں جلد مکمل کرنے کی درخواست کی جبکہ قبائلی عمائدین نے آرمی چیف کو سکیورٹی کا ماحول بہتر رکھنے کے لیے اپنے تعاون کی یقین دہانی کرائی ہے۔​