غزل : دل کی بات زباں پر لا کے دیکھو تو

دل کی بات زباں پر لا کے دیکھو تو
ہم کو اپنا حال سنا کے دیکھو تو

ہم تیری باتوں میں بھی آ سکتے ہیں
سچ میں تھوڑا جھوٹ ملا کے دیکھو تو

سورج چاند ستارے توڑ کے لا دوں گا
تھوڑی سی امید دلا کے دیکھو تو

اس چہرے کے پیچھے کتنے چہرے ہیں
آئینے کے سامنے آکے دیکھو تو

وحشت ، ہُو کا عالم ، سناٹا ، اور ہم
بیٹھے ہیں اطراف سجا کے دیکھو تو

تم نے اس کا کہنا یونہی مان لیا
کچھ اپنا بھی ذہن لڑا کے دیکھو تو

آؤ دیکھیں کتنے ہیں سقراط یہاں
تم لوگوں کو زہر پلا کے دیکھو تو

اجڑی بستی والو ہمت کر دیکھو
پھر کوئی زندہ شہر بسا کے دیکھو تو

تم کو تعبیریں بھی مل ہی جائیں گی
آنکھوں میں کچھ خواب سجا کے دیکھو تو

سعدی وہ ٹوٹے ہوئے دل کی سنتا ہے
اس کے در سے آس لگا کے دیکھو تو​

 

اچھی غزل ہے عروض پر دیکھا کہ کچھ اشعار بحر سے باہر ہیں شاید نظر ثانی کی ضرورت ہے

 

اس غزل کی بحر عروض ڈاٹ کام کے بس سے باہر ہے ۔۔۔ وزن پورا ہے مصرعوں کا

 

بہرحال پسندیدگی کا شکریہ

 

ہم ناقص العقل اتنے پہنچے ہوئے ہوتے تو اچھا ہوتا نا
مشین سے مدد لیتے ہیں اور مشین پر بھروسہ کر کے بیٹھ جاتے ہیں
شکریہ کہ آپ نے برا نہیں منایا