ظاہر میں گرچہ جسم مرا بے خراش ہے

واصف علی واصف
ظاہر میں گرچہ جسم مرا بے خراش ہے
احساس کاوجود مگر قاش قاش ہے
تیری نظر ہے مطلعِ انوارِ صبح پر
میری نظر میں ڈوبتے سورج کی لاش ہے
آواز دے کے آپ تو خاموش ہو گئے
میرے لہو میں اب بھی وہی ارتعاش ہے
ٹھہرے سمندروں کی طرح تم ہو بے طلب
آبِ رواں ہوں، مجھ کو تمھاری تلاش ہے
سنگِ خزاں سے دستِ صبا نے لیا ہے کام
آئینہ جمالِ چمن پاش پاش ہے
واصفؔ یہ کس مقام پہ لایا مجھے جنوں
اب اُن کی جستجو ہے نہ اپنی تلاش ہے

​