شہکارِ نبی ﷺ صاحبِ تمکین عمرؓ ہیں ۔۔ پیرزادہ محمد ندیم اختر

شہکارِ نبی ﷺ صاحبِ تمکین عمرؓ ہیں
اسلام کی تاریخ کی تزئین عمرؓ ہیں

لرزاں ہیں جسے دیکھ کے خود قیصر و کِسریٰ
وه صولتِ سرکارِ شہِ دینﷺ عمرؓ ہیں

ایما پہ ہوئی جسکے اذاں بیتِ حرم میں
وه نصرتِ حق دین کی تسکین عمرؓ ہیں

جس شخص کی تحریر سے دریا بھی رواں ہو
وہ حلقہ بگوشِ شہِ یٰسینﷺ عمرؓ ہیں

بات اُن کی لگی حضرتِ بُو بَکْرؓ کے دل کو
جن سے ہوئ قرآن کی تدوین عمرؓ ہیں

اِس شخص کے ہوتے ہوۓ فِتنوں سے بچو گے
اصحابؓ کو یہ شاہﷺ کی تلقین ، عمرؓ ہیں

پرواز عدالت کی فضاؤں میں ہے جسکی
وہ سرورِ کونین ﷺ کے شاہین عمرؓ ہیں

سرکارﷺ کی عترتؓ سے وِلا اور وفا میں
شاھد ہے خدا قا بلِ تَحسین عمرؓ ہیں

وه جن کی فتوحات سے اسلام ہے فَرحاں
اسلام کی وه فَرحَت و فَرحِین عمرؓ ہیں

اغیار بھی تقلید پہ مجبور ہیں جس کی
اسلام کا دَستُور وه آئین عمرؓ ہیں

تھی ذات ندیمؔ اُن کی غریبوں کا سہارا
تکیہ گَہِ ہر عاجز و مسکین عمرؓ ہیں
----
پیرزادہ محمد ندیم اختر​

 

سبحان اللہ جزاک اللہ