شمع اُجالا۔۔۔۔۔۔۔

​

دُکھتے ہوئے دِل نے رہ رہ کر سینے پہ پھرتے ہاتھ سے کہا:"اُٹھاؤ قلم اور تین سلگتے ،شعلوں میں لپٹے ،دہکتے ہوئے الفاظ لکھ کر اُسے بھیج دو کہ ساری اکڑ نکل جائے۔بیوفا جو تمھاری ہوکر بھی تمھاری نہیں۔اپنی خوشیوں کے لیے کس خوشی سے وہیں جابسی ،جہاں سے تمھیں خوش رکھنے کا عہد کرکے چلی تھی۔ ننھے کو بھی ساتھ لے گئی،گویاہر خوشی پر بس ایک اُسی کا حق ہے۔"
ہاتھ سینے سے ہٹا،قلم پکڑا،نِب کو خونِ دل میں ڈبویااور لکھا:۔۔۔۔۔۔۔۔۔۔۔۔۔۔۔۔۔۔۔مجھے تمھاری ہر خوشی عزیز ہے ۔جب تک چاہورہواور جب چاہوچلی آؤ،مجھے اپنا منتظر پاؤگی۔خرچ کے لیے رقم ،ننھے کے لیے کپڑوں اور کھلونوں کے علاوہ تمھاری پسند کی کچھ چیزیں بھی بھیج رہا ہوں ۔پیسے کم پڑ جائیں تو خداراتکلیف نہ اُٹھانا مجھے لکھ دینا۔۔۔۔۔۔۔۔۔۔۔۔۔۔۔۔۔۔۔۔

 

۔۔۔۔۔۔۔۔۔۔۔یہ پیسے ،کپڑے اور کھلونے اپنے پاس ہی رکھئے،اپنی بہنوں کو دیجیے یا اَماں باواکے قدموں میں ڈال دیجیےگا۔یہاں سب کچھ ہے ۔ہم کسی کے محتاج نہیں۔آئندہ بھی حسن ِ سلوک کے نام پر ایسے کسی ڈھکوسلے کی ضرورت نہیں۔میں سوچ سمجھ کر ہر تعلق ختم کرکے آئی ہوں ۔۔۔۔۔آپ کا انتظار جوتی کی نوک پر۔۔۔۔۔۔۔۔۔۔۔۔۔۔۔۔۔۔۔۔

 

تمھارے حکم کی تعمیل میں وہ تمام چیزیں گھر میں بانٹ دی ہیں اور یونہی کہدیاہے کہ یہ سب تم نے بھیجاہے۔سب بہت خوش ہوئے۔اَمی تمھاری بلائیں لیتے نہیں تھکتیں،بابابھی بہت خوش ہیں اور دعاؤں پہ دعائیں دئیے جاتے ہیں۔پوچھ رہے تھے کہ بہو کو کب لاؤگے ؟کیا جواب دیتا ۔اِدھراُدھر کی باتوں میں لگادیا۔عذرا،فہمیدہ،رُخسانہ ۔۔۔۔۔۔۔۔۔۔۔تینوں نے سُوٹوں کا کپڑا سنبھال کررکھ لیا ہے کہ بھابھی آئیں گی تو ایک ساتھ سلوائیں گے۔ راحیل ،رمیزاور رفیق بھی بھابھی بھابھی کی مالا جپ رہے اور میں اُنھیں بھی بہلارہا ہوں اور ہاں ۔۔۔۔۔۔۔۔۔۔۔۔۔۔تم دِل تھوڑا نہ کرناجو چیزیں گھر میں دی ہیں ،وہی تمھارے لیے بھی لاکر رکھدی ہیں ،تمھاری الماری میں۔اُمیدہے رفتہ رفتہ تمھاری خفگی دور ہوجائے گی ۔۔۔۔۔۔۔۔۔۔۔۔۔۔۔۔۔

 

مکاتبت جاری ہے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔