شب برات کی حقیقت

درج بالا تمام اقتباسات اور احادیث مبارکہ سے عیاں ہوتا ہے کہ شب برات بھٹکے ہوئے اور سرکش لوگوں کے لئے ایک دستک ہے جو آخرت کی زندگی کو بھول کر دنیاوی زندگی کے گورکھ دھندوں میں بری طرح پھنسے ہوئے ہیں۔ یہ رات ان کے لئے اپنے رب کی طرف بلاوہ، اور اسے منانے کی رات ہے۔ جب کوئی شخص کماحقہ اس رات کو اللہ اور اس کے رسول صلیٰ اللہ علیہ وآلہ وسلم کی یاد میں بسر کرتا ہے، تسبیح و تہلیل کرتا ہے، درود و سلام کے گجرے پیش کرتا ہے، گناہوں سے معمور دامن ذکر الہٰی سے صاف کرتا ہے تو یہ رات اسکے لئے بہت سے انعام و اکرام لاتی ہے۔ تقدیریں بدل جاتی ہیں، زندگی کے حالات بدل جاتے ہیں۔ یہ سب کچھ اس ایک عظیم رات کو اس میں کار فرما روح کے مطابق گزارنے کے ہی بدولت ممکن ہے۔ قرآن پاک میں ہے۔
یَمْحُوا اﷲُ مَا یَشَآئُ وَ یُثْبِتُج وَ عِنْدَه اُمُّ الْکِتٰبِ
اﷲ جس (لکھے ہوئے) کو چاہتا ہے مٹا دیتا ہے اور (جسے چاہتا ہے) ثبت فرما دیتا ہے، اور اسی کے پاس اصل کتاب (لوحِ محفوظ) ہے۔
الرعد، 13: 39
شب برات ہمارے احوال کو بدل دیتی ہے۔ اگر انسان احسن طور پر اس کے لوازمات پورے کرے تو یہ رات گناہوں کے ختم کرنے میں اہم کردار ادا کرتی ہے۔ اگر اس رات اپنے رب کے حضور ندامت اشک کے آنسو بہائے اور نالہ و فریاد کرے، اپنے صغائر و کبائر گناہوں کے لئے معافی کا خواست گار بنے تو اس وقت بدحالی، خوشحالی اور تنگی، آسانی میں بدل جاتی ہے۔ بنی اسرائیل کے ایک بے حد گناہگار شخص نے صرف توبہ کا ارادہ کیا، ابھی مکمل طور پر توبہ نہ کی، مگر نیت و ارادہ کے سبب تقدیر بدل دی گئی اور جنت میں پہنچایا گیا۔ اگر آج حضور صلیٰ اللہ علیہ وآلہ وسلم کی افضل امت کا ایک گناہگار اور سرکش شخص توبہ کرے تو کیا اس کی تقدیر نہیں بدل سکتی؟ بالخصوص شب برات کا تو اور افضل مقام ہے جہاں حضورصلیٰ اللہ علیہ وآلہ وسلم کے ارشاد گرامی کی رو سے اپنے رب سے گناہوں کی معافی مانگنا اور آہ و زاری کرکے اپنے رب سے آئندہ گناہوں سے سچی توبہ کرنا ہے۔ شب برات ہمیں اس عمل کی طرف دعوت دے رہی ہے کہ اس رات محاسبہ نفس، توبہ، تجدید عہد کے ذریعے دنیاوی و اخروی فلاح کا ساماں تیارکریں۔
شب برات کا دوسرے دنوں اور راتوں سے موازنہ کیا جائے تو شب برات دوسرے شب و روز سے بالکل مختلف ہے۔ عیدالفطر اور عیدالاضحٰی اللہ تعالیٰ کی طرف سے احکامات کی بجاآوری کا صلہ ہیں۔ اس میں انسان کو رمضان المبارک کے روزوں کی ادائیگی کے عوض عیدالفطر کی خوشی عطا ہوتی ہے۔ عیدین کا تعلق ہمارے باہمی معاملات سے ہے۔ احکامات کی بجا آوری کا صلہ اور انعام ہے۔
اگر ہماری روزمرہ زندگی کا جائزہ لیا جائے تو ہمیں یہ احساس پیدا ہونا چاہئے اور عبرت حاصل کرنی چاہئے کہ ہم آئے روز اپنے بہت سے اعزاء و اقارب اور دوست احباب کو کل نفس ذائقۃ الموت کے ارشاد کے مطابق اپنے سے رخصت کرتے ہیں۔ اُن کا رخصت ہونا اصل میں ہمارے لئے دعوتِ فکر ہے کہ ہم نے اپنے لئے کیا ساماں تیار کررکھا ہے؟
شب برات دنیا و آخرت کے سنوارنے کے لئے ایک فکر کا نام ہے۔ یہ اللہ تعالیٰ اور اس کے رسول اکرم صلیٰ اللہ علیہ وآلہ وسلم سے دوری کو ختم کرکے قربت کی طرف ایک الارم ہے۔ حب الہٰی اور محبت رسول صلیٰ اللہ علیہ وآلہ وسلم کی طرف ایک دعوت ہے۔ جس پر عمل پیرا ہوکر انسان دنیا اور آخرت سنوار سکتا ہے۔ شب برات ہمارے لئے ایک الٹی میٹم ہے کہ اس رات اللہ کی یاد میں اشکبار ہوں۔ یہ رات اللہ کے فیوضات کا بحرِ بیکراں ہے جس میں غوطہ زن ہوکر اپنے من کو سیراب کیا جاسکے۔ لیکن آج کے دور میں ہم اس کے برعکس اس رات کو پٹاخوں اور آتش بازی جیسے کاموں کی نذر کردیتے ہیں۔
شب برات اللہ تعالیٰ کی نافرمانی اور اسلام کے اصولوں سے عاری لوگوں کے خلاف ایک نقارہ ہے جس میں باور کروایا جارہا ہے کہ یہ یاس اور قنوطیت تمہارے کئے ہوئے اعمال کی بناء پر ہے۔ اس رات اپنے اعمال کی اصلاح کی طرف ترغیب دی جارہی ہے

آئیے سب آج اللہ کی بارگاہ الہیٰ میں دستِ سوال ہوکر عاجزی و انکساری سے گڑگڑا کر اپنے گناہوں کی معافی مانگتے ہیں ان تمام گناہوں کی جو ہم نے جان بوجھ کر کیے جو ہم نے جانے انجانے میں کیے ۔۔اللہ کی نافرمانی کی۔۔ہر طرح کے گناہوں سے معافی مانگتے ہیں۔آج کی رات اللہ کو منانے کی ہے۔آج ہماری زندگیوں کا فیصلہ ہونے جارہا ہے کیا پتہ ہمارے نصیب میں کیا لکھا جاتا ہے واللہ اعلم۔۔ہم دینا تو روز مانگتے ہیں ۔آج اپنے لیے آخرت کو مانگو خاص طور پر۔۔دنیا کی خواہشات کے لیے روز ہاتھ اُٹھاتے ہیں ۔مگر آج یہ ہاتھ اپنے ربِ کائنات کو منانے کے لیے اُٹھاؤ۔اپنے لیے کامل ایمان کو مانگو اس یقین کے ساتھ کہ
میرا ربِ عظیم فرماتا ہے
مجھے پکارو مجھ ہی سے مانگو۔میں تمہاری پکار(دعا) کو سننے اور قبول فرمانے والا ہوں
آج کی اس بابرکت رات میں اللہ کے حضور سب کے لیے دعا مانگیں۔۔اور سب کو معاف کریں جس نے بھی آپ کے ساتھ کچھ برا کیا ہو۔کچھ غلط کیا ہو ،کوئی برائی کی ہو۔۔کچھ بھی۔۔آج اللہ کے لیے سب کو معاف کردیں تاکہ ہمارا رب ہماری کوتاہیوں اور نافرمانیوں کو معاف فرمائے۔اور خاص طور پر اپنے پیارے وطنِ عزیز کے لیے خصوصی دعا کریں
اللہ تعالیٰ ہمارے ملک کی حفاظت فرمائے۔اس میں جو بھی شر پسند عناصر ہیں ان سے اس پاک خطہ کو پاک فرمائے ۔اور سب مسلمانوں کو ہدایت نصیب فرمائے ۔نیک اور سیدھے راستے پر چلنے کی توفیق عطا فرمائے اور ہم سب کو حالتِ ایمان میں موت نصیب فرما۔آمین ۔۔ثم آمین

​

 

جزاک اللہ

 

بہت اچھی شیئرنگ ہے۔۔۔۔۔۔ اللہ تعالی ہم سب مسلمانوں کو دین پر ثابت قدم رکھے

 

آمین۔ثم آمین۔۔۔

 

آمین۔ثم آمین۔۔۔

بہت شکریہ۔۔