سکھا دے راستہ جو کچھ اسے حاصل سمجھ لینا ۔۔۔۔ طلب اصلاح

سکھا دے راستہ جو کچھ اسے حاصل سمجھ لینا
ضروری تو نہیں ہر شخص کو منزل سمجھ لینا
ضروری تو مقابل کو نہیں ہے قتل کر دینا
اگر ملنے سے گھبرائے اسے گھائل سمجھ لینا
وفا کے نام پر جینا وفا کے نام پر مرنا
وفا کو بس ہمارے خون میں شامل سمجھ لینا
سمندر کا سفر ہے اور ہیں تاریکیاں ہر سو
جہاں پر کشتی ٹکرائے اسے ساحل سمجھ لینا
اگر اک لوتھڑا ہو وہ بھی ہو حالات کا مارا
بنا سوچے اسے میرا ہی زخمی دل سمجھ لینا
مباحث میں وہ مجھ سے جیت تو سکتا نہیں ہے گل
جہاں خاموش ہو جائے اسے قائل سمجھ لینا

زنیرہ گل

 

بھئی واہ !
بہت خوبصورت ،مکمل ابلاغ کے ساتھ ،ہر مصرع صاف ،ہر شعر عقل اور منطق کے مطابق،قافیہ بھی خوبصورت اور ردیف بھی نیچرل۔شاباش زنیرہ شاباش ۔

 

بہت بہت شکریہ محترم
اللہ جزائے خیر دے آمین