راشد لطیف کی چیف سلیکٹر کا عہدہ سنبھالنے سے معذرت

راشد لطیف کی چیف سلیکٹر کا عہدہ سنبھالنے سے معذرت

سرکاری ٹی وی سمیت دیگر مصروفیات کے باعث پی سی بی کو اپنے فیصلے سے آگاہ کیا
لاہور(سپورٹس رپورٹر)سابق قومی وکٹ کیپر راشد لطیف نے چیف سلیکٹر کا عہدہ سنبھالنے سے معذرت کرلی ۔ذرائع کے مطابق راشد لطیف پی سی بی ہیڈ کوارٹرز میں گزشتہ چار روز سے موجود ہیں اور صوبائی ٹیموں کی سلیکشن کیلئے مصباح الحق اور ندیم خان کے ساتھ مسلسل میٹنگ کر رہے ہیں تاہم پی سی بی حکام راشد لطیف کو چیف سلیکٹر بننے کیلئے قائل کرنے میں ناکام رہے ۔ وہ سرکاری ٹی وی کے ساتھ کام کر رہے ہیں اس لئے انہوں نے بورڈ کی پیشکش کو شکریہ کے ساتھ مسترد کر دیا ہے ۔ذرائع کا کہنا ہے کہ نئے ہیڈ کوچ کو سلیکشن کمیٹی دے کر نیا تجربہ کیا جا رہا ہے اور نیوزی لینڈ کے سسٹم پر چھ صوبائی کوچز کے ساتھ مل کر نئی سلیکشن کمیٹی کام کرے گی۔ذرائع نے بتایا ہے کہ انضمام الحق کی سربراہی میں سابقہ سلیکشن کمیٹی نے تین سال کے دوران جو ٹیمیں منتخب کیں ان پر سوالات اٹھائے جاتے رہے اس لئے پاکستان کرکٹ بورڈ نے ایسی سلیکشن کمیٹی بنانے کا فیصلہ کیا ہے جو اچھی ساکھ کی حامل ہو۔ذرائع کا مزید کہنا تھا کہ قومی سلیکٹرز، جونیئر سلیکٹرز اور کوچز نے جن صوبائی ٹیموں کا انتخاب کیا ہے اس پر راشد لطیف، مصباح الحق اور ندیم خان نے کئی اعتراضات کئے اور کھلاڑیوں میں ردوبدل کیا گیا ہے ۔​