دے خواب کو لمحاتِ ضیا ناز بہ انداز ۔۔ مسعود علی شاہ

دے خواب کو لمحاتِ ضیا ناز بہ انداز
آ ! حیطۂ احساس میں آ ناز بہ انداز

لب ہلتے نہیں ہیں کہ طلب اذن سنبھالے
بڑھ آتا ہے وہ دستِ سخا ناز بہ انداز

اے میرے سخی ! پچھلا سفر پچھلے برس تھا
اب پھر سے کوئی مژدہ نیا ناز بہ انداز

دُھل جائیں گے سب جُرم و معاصی کے صحیفے
جب برسے گی بخشش کی گھٹا ناز بہ انداز

واللہ نہیں حرف و معانی کا کرشمہ
وہ دیتے ہیں خُود اذنِ ثنا ناز بہ انداز

انداز بتاتے ہیں کہ کچھ خاص ہے لائی
یہ اذن بہ لب بادِ صبا ناز بہ انداز

جچتے نہیں آنکھوں میں زمانوں کے مقدر
رکھتا ہے بہت تیرا گدا ناز، بہ انداز

اِک شامِ مسلسل میں ہے یہ عرصۂ ہستی
اب بام پہ آ ! ماہِ لقا ناز بہ انداز

تحریص کی گرمی سے بدن جلنے لگے ہیں
پھیلا ذرا زلفوں کی ردا ناز بہ انداز

وہ رنگ نرالے ہیں ترے جُود و عطا کے
سائل بھی کرے اپنی صدا ناز بہ انداز

آ جاتا ہے پھر اُس درِ رحمت سے بُلاوا
ہو جاتی ہے پھر مجھ پہ عطا ناز بہ انداز

کیا جانِ دو عالَم ترے آنے کی گھڑی تھی
جب جھُومتے تھے ارض و سما ناز بہ انداز

رکھتے ہیں وہ مقصود بھرم چشمِ طلب کا
تُو حرف نہ بُن، نعت سُنا ناز بہ انداز
---
Maqsood Ali Shah
مسعود علی شاہ



​

 

آ جاتا ہے پھر اُس درِ رحمت سے بُلاوا
ہو جاتی ہے پھر مجھ پہ عطا ناز بہ انداز​

 

کیا جانِ دو عالَم ترے آنے کی گھڑی تھی
جب جھُومتے تھے ارض و سما ناز بہ انداز​

 

رکھتے ہیں وہ مقصود بھرم چشمِ طلب کا
تُو حرف نہ بُن، نعت سُنا ناز بہ انداز​

 

سبحان اللہ & جزاک اللہ

 

اللہ تعالٰی آپ کو بھی جزائے خیر عطا کرے آمین