دیکھا نہیں کسی میں جیسا جمال تیرا---برائے اصلاح

شکیل احمد خان
محمد سعید سعدی
-------------
دیکھا نہیں کسی میں جیسا جمال تیرا
کیسے میں بھول جاؤں دل سے خیال تیرا
-------------
دل دے دیا ہے تم کو اس کا خیال رکھنا
ایسے اسے سمجھنا جیسے ہے مال تیرا
-------------
چاندی کی ہو رقابی ، اس میں سیاہ موتی
ایسے چمک رہا ہے چہرے پہ خال تیرا
-------------
اپنا مجھے بنایا تیری ہے مہربانی
میں دیکھتا ہوں اس میں سارا کمال تیرا
------------
میری اگر خطا تھی مجھ کو پتہ تو ہوتا
نازل ہوا ہے مجھ پر کیوں یہ جلال تیرا
--------------
اپنا خیال رکھنا پڑنے نہ ماند پائے
رکھے خدا سلامت ہر دم جمال تیرا
------------
کر کے یوں پیار مجھ سے پچھتا رہے ہو شائد
مجھ پر بہت ہے بھاری ایسے ملال تیرا
---------------------
ارشد سدا تعلّق مضبوط رب سے رکھنا
وہ جانتا ہے ہر دم جو بھی ہو حال تیرا
------------------

 

محترم!
اپنی ناقص آراء پیش کررہا ہوں :
آنکھوں میں بس گیا ہےرنگِ جمال تیرا
ممکن نہیں نکلنا دل سے خیال تیرا

 

دل دے دیا ہے تجھ کو اِس کا خیال رکھنا
اب یوں سمجھ کہ جیسے تھا ہی یہ مال تیرا

۔۔۔۔یا۔۔۔۔​

دل دے دیا ہے تجھ کو اِس کا خیال رکھنا
اور یوں سمجھ لے جیسے تھا ہی یہ مال تیرا

 

چاندی کی ہو رِکابی جس میں سیاہ موتی
ایسے چمک رہا ہے چہرے پہ خال تیرا۔۔۔۔۔۔۔۔۔۔۔۔۔۔۔۔۔۔۔۔واہ واہ واہ !،بہت خوب!

 

اپنا مجھے بنایا ہے تیری مہربانی
میرا نہیں ہے بلکہ یہ ہے کمال تیرا

 

میری کوئی خطا تھی ،مجھ سے تو کہتا آخر
نازل ہوا مجھی پر کیوں یہ جلال تیرا

 

تو پیار کرکے مجھ سے پچھتا رہاہے شاید
مجھ پر بہت ہے بھاری رنج و ملال تیرا

۔۔۔۔یا ۔۔۔۔۔​

تو پیار کرکے مجھ سے پچھتا رہا ہے شاید
ہے شاق مجھ پہ ظالم رنج و ملال تیرا

 

ارشد ترا تعلق رب سے رہے سلامت
دنیا تو بیوفا ہے۔۔۔۔۔۔۔۔۔۔کیا ہے خیال تیرا

 

بہت خوب۔۔۔۔