دل منسلک ہے تیرے درِ خواب سے مرا

دل منسلک ہے تیرے درِ خواب سے مرا

کب سلسلہ ہے اور کسی باب سے مرا

مجھ میں سکوت کی وہ فضا اب نہیں رہی

رہتا ہے اب مکالمہ احباب سے مرا

اب آسماں کو اور طرح دیکھتا ہوں میں

اب اور ہے معاملہ مہتاب سے مرا

پابستہ ہے بدن تو بدن کا قصور ہے

دل کب بندھا ہے عالمِ اسباب سے مرا

قریہ بہ قریہ کس لیے تجھ کو کروں تلاش

چلتا ہے کام جبکہ ترے خواب سے مرا

خود تو کنارِ جُو کسی جھلمل میں محو ہوں

پیدا ہے عکس آئنہءآب سے مرا

نادیدہ رنگ و بو سے نہیں رغبت آج کی

رشتہ قدیم ہے گلِ نایاب سے مرا

تصویر ہوں کسی سحر آثار باغ کی

روشن ہے منظر اپنی تب و تاب سے مرا

 

اب آسماں کو اور طرح دیکھتا ہوں میں
اب اور ہے معاملہ مہتاب سے مرا