خُدا ہم کو ایسی خُدائی نہ دے

<center>
خُدا ہم کو ایسی خُدائی نہ دے
کہ اپنے سوا کچھ دکھائی نہ دے

خطاوار سمجھے گی دنیا تجھے
اب اتنی زیادہ صفائی نہ دے

ہنسو آج اتنا کہ اس شور میں
صدا سسکیوں کی سنائی نہ دے

غُلامی کو برکت سمجھنے لگیں
اسیروں کو ایسی رہائی نہ دے

خُدا ایسے احساس کا نام ہے
رہے سامنے اور دکھائی نہ دے


(کلام: بشیر بدر)
</center>

 

سوچا نہیں اچھا برا

بشیر بدر بہت اچھے شاعر ہیں، ان کی بہت سی نظمیں اور غزلیں ہمیں پسند ہیں، انہی کی ایک بہت ہی خوبصورت غزل

سوچا نہیں اچھا برا دیکھا سنا کچھ بھی نہیں
مانگا خدا سے رات دن تیرے سوا کچھ بھی نہیں
سوچا تجھے، دیکھا تجھے، چاہا تجھے، پوجا تجھے
میری خطا میری وفا، تیری خطا کچھ بھی نہیں
جس پر ہماری آنکھ نے موتی بچھائے رات بھر
بھیجا وہی کاغذ اسے، ہم نے لکھا کچھ بھی نہیں
اک شام کی دہلیز پر بیٹھے رہے وہ دیر تک
آنکھوں سے کیں باتیں بہت، منہ سے کہا کچھ بھی نہیں
دو چار دن کی بات ہے دل خاک میں سو جائے گا
جب آگ پر کاغذ رکھا باقی بچا کچھ بھی نہی​

ں

 

بشیر بدر صاحب کا ایک کلام حاضر ہے

آس ہوگی نا آسرا ہو گا
آنے والے دنوں میں کیا ہو گا

نام ہم نے لکھا تھا آنکھوں میں
آنسوؤں نے مٹا دیا ہو گا

میں تجھے بھول جاؤں گا اک دن
وقت سب کچھ بدل چکا ہو گا

آسماں بھر گیا پرندوں سے
پیڑ کوئی ہرا گرا ہو گا

کتنا دشوار تھا سفر اس کا
وہ سرِ شام سو گیا ہو گا​