خود پسندی

کلام ربانی میں ہے:۔’’بے شک اللہ تعالیٰ نے بہت سے مواقع پر تمہاری مددکی،حنین کے دن جب تمہاری کثرت نے تم میں عُجب (اپنی خوبی پر اترانا)پیداکردیاتو وہ تمہارے کچھ کام نہ آیا، زمین وسیع ہونے کے باوجود تم پر تنگ ہوگئی پھر تم پیٹھ دے کر پھر گئے‘‘۔(توبہ25)اس آیت مقدسہ میں غزوہ حنین کا تذکرہ ہے ،جس میں مسلمانوں کی تعداد کافروں کی نسبت زیادہ تھی اوربظاہر ان کا پلہ بھاری نظرآتا تھا، کثرت تعداد کی وجہ سے بہت سے مسلمانوں کی دل میں ایک احساس تفاخرپیدا ہوگیا۔اللہ تبارک و تعالیٰ کو انکا یہ عُجب اورجذبہء خودپسندی وخودبینی،پسند نہ آیا،اس کے نتیجے میں وہ پسپاہونے لگے اورشکست کے قریب پہنچ گئے ، لیکن جلد ہی انھیں اپنی غلطی کا احساس ہوگیا، انکے دلوں میں اللہ کا خوف وخشیت اور عاجزی پیدا ہوگئی تواللہ رب العزت نے انکی شکست کو فتح سے بدل دیا۔
اللہ کریم ہر انسان کو متعدد خوبیاں سے نوازتا ہے،بسااوقات اس کا کوئی ایک کمال ممتاز حیثیت اختیار کرجاتا ہے اوروہ اسکے حوالے سے دوسروں سے ممتاز ہوجاتا ہے اوروہ اپنے آپکو اس خوبی میں دوسروں سے بہتر خیال کرنے لگتا ہے توعجب یعنی خود پسندی اورخود بینی کا شکار ہوجاتا ہے۔ یہ خود نمائی رفتہ رفتہ اسکے مزاج میں راسخ ہوجاتی ہے اوروہ بالآخر متکبر ہوجاتا ہے۔خود پسندی اخلاق رزیلہ میں سے ایک ہے ،یہ شیطان کا ایک ایسا ہتھیار ہے جو بہت کم رائیگاں جاتا ہے ،بڑے بڑے عابد، زاہدعالم فاضل بھی اسکے اس ہتھکنڈے کا شکار ہوجاتے ہیں۔انسان اپنے آپ کو بہت بلند وبالا اورعظیم سمجھنے لگتا ہے اور دوسروں کو حقیر اورکم تر ،اوریہی احساس پہلے اس کی ترقی کے راستے میں رکاوٹ بن جاتا ہے اورپھر اپنے مقام سے تنزلی کا ذریعہ بھی ۔حضوراکرم صلی اللہ علیہ وسلم کا ارشادگرامی ہے :تین باتیںانسان کو ہلاک کرنے والی ہیں، بخل کی پیروی ،ہوائے نفس کی اتباع ،خودبینی اورخود نمائی۔(طبرانی)حضرت عبداللہ بن عمرو رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا :اگر تم گناہ نہ بھی کرو تو مجھ کو ایک گناہ کے بارے خطرہ ہے کہ تم لوگ اس میں مبتلا ہوجائو گے اوروہ ہے عُجب یعنی خود بینی۔(بزار)اس طرح آپ کا ارشاد ہے ،خود بینی ایسی بری بلا ہے کہ اس سے ستر سال کے بہترین اعمال برباد ہوجاتے ہیں ۔ (دیلمی ) خودبینی وخود پسندی کے مرض سے چھٹکارے کا ایک علاج یہ ہے کہ انسان نیکی پر اترانے کے بجائے یہ سوچے کہ میری نیکی میں ابھی کئی نقائص باقی ہیں نہ جانے یہ بارگاہ ایزدی میں قبول بھی ہے یا نہیں،اورجب کوئی نیکی کرے تو اس پر اللہ رب العزت کا شکر اداکرے جس نے اسے فضول علت اورمشغلے میں وقت صرف کرنے کے بجائے حسنِ عمل کی توفیق عطاء فرمائی۔
بنایا عشق نے دریائے نا پیدا کراں مجھ کو
یہ میری خود نگہداری مرا ساحل نہ بن جائے

http://www.nawaiwaqt.com.pk/noor-e-baserat/10-Feb-2015/359956

 

جزا ک اللہ جناب