حضرت ابراہیم بن ادہم کی نصیحت

حضرت ابراہیم ادہم علمائے صالحین میں سے تھے،وہ اپنے زہد و تقویٰ کی وجہ سے مشہور تھے، یہی وجہ ہے کہ انہوں نے دنیا سے تعلق توڑ
کر اللہ تعالیٰ سے تعلق مضبوط کر رکھا تھا۔عوام و خواص میں آپ کو قدر کی نگاہ سے دیکھا جاتا تھا۔ایک دن آپ کا گزر بازار سے ہوا۔ لوگوں نے پہچان لیا اور اردگرد جمع ہوگئے اور کہنے لگے،
"حضرت،کیا وجہ ہے کہ ہماری دعائیں قبول نہیں ہوتیں،حالاں کہ ہم اللہ تعالیٰ سے خوب دعایئں کرتے ہیں؟ "
آپ نے کچھ دیر توقف فرمایا،اور پھر ارشاد فرمایا
دس چیزوں ( اعمال ) کی وجہ سے تمہارے دل مردہ ہوچکے ہیں

1 یہ کہ تم اللہ تعالیٰ کو پہچانتے تو ہو مگر اس کا حق ادا نہیں کرتے
2 تم گماں کرتے ہو کہ رسول اللہ سے محبت کرتے ہو اور حال یہ ہے کہ آپ کی سنت کو چھوڑے ہوئے ہو۔
3 تم قرآن مجید کی تلاوت تو کرتے ہو مگر اس پر عمل نہیں کرتے
4 تم اللہ تعالیٰ کی نعمتیں کھاتے تو ہو مگر اس کا شکر ادا نہیں کرتے
5 تم کہتے ہو کہ شیطان ہمارا دشمن ہے مگر پھر بھی تم اس کی اطاعت کرتے ہو اور مخالفت نہیں کرتے۔
6 تم کہتے ہو کہ جنت حق ہے مگر حصول جنت کے لیے ویسے اعمال نہیں کرتے
7 تم کہتے ہو کہ دوزخ بھی حق ہے مگر اس سے بچنے کی کوشش نہیں کرتے
8 تم مانتے ہو موت برحق ہے مگر اس کے لیے تیاری نہیں کرتے۔
9 تم بیدار ہونے کے بعد لوگوں کے عیب بیان کرنے میں لگ جاتے ہو جب کہ اپنے عیوب سے بے خبر عہتے ہو۔
10 تم مردوں کو دفن کرتے ہو،مگر اپنے لیے ان سے عبرت حاصل نہیں کرتے

ان حالات میں بتائو، تمہاری دعائیں کیسے بارگاہ الہی میں شرف قبولیت حاصل کر سکتی ہیں؟

اندازہ لگائے ہم اس وقت کہاں کھڑے ہیں،اس وقت ہمارا حال تو یہ ہےاللہ تعالیٰ اور اس کے رسول کے احکام کی کھلی نافرمانیاں کر رہے ہیں اور اپنے آپ کو مسلمان بھی سمجھتے ہیں۔