حسن اور خوبصورتی (اشعار کی رو سے)

کاشفی بھیا، بہت خوب

 

اے حسنِ بے پرواہ تجھے شبنم کہوں، شعلہ کہوں
پھولوں میں بھی شوخی تو ہے، کس مگر تجھ سا کہوں

گیسو اڑے مہکی فضا، جادو کریں آنکھیں تیری
سویا ہوا منظر کہوں یا جاگتا سپنا کہوں

چاند کی تو ہے چاندنی لہروں کی تو ہے راگنی
جانِ تمنا میں تجھے کیا کیا کہوں، کیا نہ کہوں


بشیر بدر

 

مری آنکھوں سے ظاہر خُونفشانی اب بھی ہوتی ہے
نگاہوں سے بیاں دل کی کہانی ، اب بھی ہوتی ہے

بہِشتوں سے خفا دُنیائے فانی اب بھی ہوتی ہے
جُنوں کو حرصِ عُمر ِ جاودانی ، اب بھی ہوتی ہے

سُرور آرا شرابِ ارغوانی اب بھی ہوتی ہے
مرے قدموں میں دُنیا کی جوانی، اب بھی ہوتی ہے

کوئی جھونکا تو لاتی،اے نسیم ، اطرافِ کنعاں تک
سوادِ مصر میں عنبر فشانی ، اب بھی ہوتی ہے

وہ شب کو مُشکبو پردوں میں چُھپ کر آ ہی جاتے ہیں
مرے خوابوں پر اُن کی مہربانی، اب بھی ہوتی ہے

کہیں سے ہات آ جائے تو ہم کو بھی کوئی لادے
سُنا ہے اِس جہاں میں شادمانی ، اب بھی ہوتی ہے

ہلال و بدر کے نقشے سبق دیتے ہیں اِنساں کو
کہ ناکامی بنائے کامرانی ، اب بھی ہوتی ہے

کہیں اغیار کے خوابوں میں چُھپ چُھپ کر نہ جاتے ہوں
وہ پہلوُ میں ہیں لیکن بدگمانی، اب بھی ہوتی ہے

سمجھتا ہے شکستِ توبہ ، اشکِ توبہ کو زاہد
مری آنکھوں کی رنگت ارغوانی ، اب بھی ہوتی ہے

وہ برساتیں ، وہ باتیں ، وہ ملاقاتیں کہاں ہمدم
وطن کی رات ہونے کو سُہانی ، اب بھی ہوتی ہے

خفا ہیں ، پھر بھی آ کر چھیڑ جاتے ہیں تصوّر میں
ہمارے حال پر کچھ مہربانی ، اب بھی ہوتی ہے

زباں ہی میں نہ ہو تاثیر تو میں کیا کروں ، ناصح!
تری باتوں سے پیدا سر گرانی ، اب بھی ہوتی ہے

تمہارے گیسوؤں کی چھاؤں میں اِک رات گزری تھی
ستاروں کی زباں پر یہ کہانی ، اب بھی ہوتی ہے

پسِ توبہ بھی پی لیتے ہیں ،جامِ غنچہ و گُل سے
بہاروں میں جنوں کی میہمانی ، اب بھی ہوتی ہے

کوئی خوش ہو ، مری مایوسیاں فریاد کرتی ہیں
الٰہی !کیا جہاں میں شادمانی ، اب بھی ہوتی ہے

بُتوں کو کر دیا تھا جس نے مجبورِ سخن اختر
لبوں پر وہ نوائے آسمانی ، اب بھی ہوتی ہے​

 

دعا دعا وہ چہرہ
حیا حیا وہ آنکھیں
صبا صبا وہ زلفیں

چلے لہو گردش میں
رہے آنکھ میں‌ دل میں
بسے میرے خوابوں میں
جلے اکیلے پن میں
ملے ہر ایک محفل میں

دعا دعا وہ چہرہ۔۔۔

کبھی کسی چلمن کے پیچھے
کبھی درخت کے نیچے
کبھی وہ ہاتھ پکڑتے
کبھی ہوا سے ڈرتے
کبھی وہ بارش اندر
کبھی وہ موج سمندر
کبھی وہ سورج ڈھلتے
کبھی وہ چاند نکلتے
کبھی خیال کی رو میں
کبھی چراغ کی لو میں

دعا دعا وہ چہرہ۔۔۔

کبھی بال سکھائے آنگن میں
کبھی مانگ نکالے درپن میں
کبھی چلے پون کے پاؤں میں
کبھی ہنسے دھوپ میں چھاؤں میں
کبھی پاگل پاگل نینوں میں
کبھی چھاگل چھاگل سینوں میں
کبھی پھولوں پھول وہ تھالی میں
کبھی دیوں بھری دیوالی میں
کبھی سجا ہوا آئینے میں
کبھی دعا بنا وہ زینے میں
کبھی اپنے آپ سے جنگوں میں
کبھی جیون موج ترنگوں میں
کبھی نغمہ نور فضاؤں میں
کبھی مولا حضور دعاؤں میں
کبھی رکے ہوئے کسی لمحے میں
کبھی دکھے ہوئے کسی چہرے میں

وہی چہرہ بولتا رہتا ہوں
وہی آنکھیں سوچتا رہتا ہوں
وہی چہرہ دیکھتا رہتا ہوں



(عبیداللہ علیم)

 

دعا دعا وہ چہرہ
حیا حیا وہ آنکھیں
صبا صبا وہ زلفیں

بہت خوب جناب۔۔۔

 

کاشفی بھیا پسندیدگی کا بہت شکریہ

 

تیری زلفیں بکھرنے کو گھٹا کہہ دوں تو کیسا ہو
تیرے آنچل کے اڑنے کو صبا کہہ دوں تو کیسا ہو

بظاہر چپ ہو لیکن پھر بھی آنکھوں ‌میں ہیں ‌افسانے
تیری خاموشیوں کو بھی صدا کہہ دوں تو کیسا ہو

میرے شکوے شکایت پر بھی مجھ سے پیار کرتی ہو
تیری چاہت کو میں سب سے جدا کہہ دوں تو کیسا ہو

تیری یادیں میرے دل پر عجب سا شور کرتی ہیں
تیری یادوں کو گر میں اک نشہ کہہ دوں تو کیسا ہو

تمہارے بن مجھے جینا بڑا دشوار لگتا ہے
تمہیں میں اپنے جینے کی وجہ کہہ دوں تو کیسا ہو

جو تم ناراض نہ ہو تو مجھے اک بات کہنی ہے
اگر میں پیار سے تم کو وفا کہہ دوں تو کیسا ہو​

 

ھمم۔۔۔بہت خوب جناب بہت خوب۔۔۔میرے شکوے شکایت پر بھی مجھ سے پیار کرتی ہو


بہت خوب۔۔۔

 

واہ بھئی واہ، بہت خوب۔

 

اس زخم ِ جاں کے نام ، جو اب تک نہیں‌بھرا

اس زندہ دل کے نام ، جو اب تک نہیں مرا

اس زندگی کے نام، گزارا نہیں جسے

اس قرض ِ فن کے نام، اُتارا نہیں جسے

اہل نظر کے نام، جو جوہر شناس ہیں

اہل وفا کے نام، جو فن کی اساس ہیں

ان دوستوں کے نام، جو گوشہ نشین ہیں

ان بےحسوں کے نام، جو بار ِ زمین ہیں

ان اہل ِ دل کے نام، جو راہوں کی دھول ہیں

ان حوصلوں کے نام، جنہیں‌ دکھ قبول ہیں

اس شعلہ رخ کے نام، کہ روشن ہے جس سے رات

ہے ضوفشاں اندھیرے میں ہر نقطءِ کائنات

اور حسنِ باکمال کی راعنائیوں کے نام

اور اپنے ذہن و قلب کی تنہائیوں کے نام

 

دو بھید بھری آنکھیں

دو بھید بھری آنکھیں
اک خواب کی چلمن سے
ہر رات مجھے دیکھیں
دو بھید بھری آنکھیں
ہر صبح کو چڑیوں کی
چہکار میں ڈھل جائیں
پھولوں کی قبا پہنیں
شبنم میں‌ بدل جائیں
ہر شام ہواؤں سے
احوال میرا پوچھیں
دو بھید بھری آنکھیں
کرتی ہیں عجب باتیں
کاجل کی زباں سے یہ
دل لیتی چلی جائیں
انداز ِ بیاں سے یہ
دو بھید بھری آنکھیں
اک خواب کی چلمن سے
ہر رات مجھے دیکھیں
دو بھید بھری آنکھیں​

امجد اسلام امجد​

 

بہت خوب ساگراج بھائی ۔
امجد اسلام امجد اپنی طرز میں انوکھا شاعر ہے۔
شئیرنگ کا شکریہ ۔

 

کبھی کتابوں میں پھول رکھنا، کبھی درختوں پہ نام لکھنا
ہمیں بھی یاد آج تک، وہ نظر سے حرفِ سلام لکھنا

وہ چاند چہرے ، وہ بہکی باتیں ، سلگتے دن تھے مہکتی راتیں
وہ چھوٹے چھوٹے سے کاغذوں پر محبتوں کے پیغام لکھنا

گلاب چہروں سے دل لگانا، وہ چپکے چپکے نظر ملانا
وہ آرزؤں کے خواب بننا ، وہ قصہ ناتمام لکھنا

مرے نگر کی حسین فضاؤ ! کہیں جو ان کا نشان بتاؤ
تو پوچھنا یہ، کہاں بسے وہ ، کہاں ہے ان کا قیام لکھنا

کھلی فضاؤں میں سانس لینا ،عبث ہے اب تو گھٹن ہے ایسی
کہ چاروں جانب شجر کھڑے ہیں ، صلیب صورت تمام لکھنا

گئی رُتوں میں "حسن " ہمارا ،بس ایک ہی تو مشغلہ تھا
کسی کے چہرے کو صبح کہنا، کسی کی زلفوں کو شام لکھنا
۔۔۔
حسن رضوی​

 

بہت خوب۔ بےباک بھائی ۔ ڈاکٹر حسن رضوی مرحوم کے کلام سے عمدہ انتخاب۔
بہت شکریہ ۔

 

پوچھا جو ان سے چاند نکلتا ہے کس طرح؟
زلفوں ‌کو رخ‌ پہ ڈال کے جھٹکا دیا کہ یوں

 

جواب: حسن اور خوبصورتی (اشعار کی رو سے)

بارہا مجھ سے کہا دل نے کہ اے شعبدہ گر
تو کہ الفاظ سے اصنام گری کرتا ہے
کبھی اس حسنِ دل آرا کی بھی تصویر بنا
جو تیری سوچ کے خاکوں میں لہو بھرتا ہے
بارہا دل نے یہ آواز سنی اور چاہا
مان لوں مجھ سے جو وجدان میرا کہتا ہے
لیکن اس عجز سے ہارا میرے فن کا جادو
چاند کو چاند سے بڑھ کر کوئی کیا کہتا ہے۔

 

جواب: حسن اور خوبصورتی (اشعار کی رو سے)

ملائم ہاتھ ، خم زُلف ، ادا نئ ، اور یاقوت ہونٹ
قتل باقی ہے ، .............عذر تو سب تمام ہووے

 

جواب: حسن اور خوبصورتی (اشعار کی رو سے)

شکیب جلالی کا ایک شعر

گھبرا کے چاند چھپ گیا بادل کی اوٹ میں
بے ساختہ وہ جان ِ حیا یاد آ گئی​

 

جواب: حسن اور خوبصورتی (اشعار کی رو سے)

قتیل شفائی کا ایک شعر

وہ ترے حسن کی قیمت سے نہیں ہیں واقف
پنکھڑی کو جو ترے لب کا بدل کہتے ہیں​

 

حسیں تیری آنکھیں حسیں تیرے آنسو
یہیں ڈوب جانے کو جی چاہتا ہے

 

مجھ کو معلوم نہیں حُسن کی تعریف مگر
میری نظر میں وہ حسیں ہے جو تجھ جیسا ہے

 

اسلام و علیکم
میری سب احباب سے گزارش ہے کہ شعر کے ساتھ شاعر کا نام بھی لکھنے کی کوشش کریں

 

بہت

بہتـــــــــــــــــــــــــــــــرین انتخاب

 

تیری خوشبو سے مہکنے لگا گلشن گلشن
ڈالیاں پھولوں کی جھک کر تجھے کہتی ہیں سلام

 

اچھی صورت کو سنورنے کی ضرورت کیا ہے
سادگی میں بھی قیامت کی ادا ہوتی ہے
تم جو آ جاتے ہو مسجد میں ادا کرنے نماز
تم کو معلوم ہے کتنوں کی قضا ہوتی ہے

 

یہ تبسم یہ عارض یہ روشن جبیں
یہ ادا یہ نگاہیں یہ زلفیں حسیں
آئینے کی نظر لگ نہ جائے کہیں
جانِ جاں اپنا صدقہ اتارا کرو

 

آپ اس طرح تو ہوش اُڑایا نہ کیجئے
یوں بن سنور کے سامنے آیا نہ کیجئے

 

انداز اپنے آئینے میں دیکھتے ہیں وہ
اور یہ بھی دیکھتے ہیں کوئی دیکھتا نہ ہو

 

آ کہ وابستہ ہیں اس حسن کی یادیں تجھ سے
جس نے اس دل کو پری خانہ بنا رکھا تھا
جس کی اُلفت میں بھلا رکھی تھی دنیا ہم نے
دہر کو دہر کا افسانہ بنا رکھا تھا

آشنا ہیں تیرے قدموں سے وہ راہیں جن پر
اس کی مدہوش جوانی نے عنایت کی ہے
کارواں گزرے ہیں جن سے اسی رعنائی کے
جس کی ان آنکھوں نے بے سود عبادت کی ہے

تجھ سے کھیلی ہیں وہ محبوب ہوائیں جن میں
اس کے ملبوس کی افسردہ مہک باقی ہے
تجھ پہ بھی برسا ہے اس بام سے مہتاب کا نور
جس میں بیتی ہوئی راتوں کی کسک باقی ہے

تو نے دیکھی ہے وہ پیشانی وہ رخسار وہ ہونٹ
زندگی جن کے تصور میں لُٹا دی ہم نے
تجھ پہ اُٹھی ہیں وہ کھوئی ہوئی ساحر آنکھیں
تجھ کو معلوم ہے کیوں عمر گنوا دی ہم نے

فیض​

 

حسن جاناں کی تعریف ممکن نہیں
تو بھی دیکھے اگر تو کہے ہمنشین
آفریں آفریں۔۔۔ آفریں آفریں
حسن جاناں کی تعریف ممکن نہیں

ایسا دیکھا نہیں خوبصورت کوئی
جسم جیسے ہے جنتا کی مورت کوئی
جسم نغمہ کوئی۔۔ جسم خوشبو کوئی
جسم جیسے مچلتی ہوئی راگنی
جسم جیسے مہکتی ہوئی چاندنی
جسم جیسے کہ سورج کی پہلی کرن
جسم ترشا ہوا دلکش و دلنشین
صندلین صندلین۔۔ مرمریں مرمریں
صندلین صندلین۔۔ مرمریں مرمریں
حسن جاناں کی تعریف ممکن نہیں
چہرہ ایک پھول کی طرح شاداب ہے
چہرہ اس کا ہے یا کوئی مہتاب ہے
چہرہ جیسے کلی۔۔ چہرہ جیسے کنول
چہرہ جیسے تصور بھی تصویر بھی
چہرہ ایک خواب بھی طہرہ تعبیر بھی
چہرہ کوئی الف لیلی کی داستان
چہرہ اک پل یقین۔۔ چہرہ اک پل گماں
چہرہ جیسے کہ چہرہ کہیں بھی نہیں
آفریں آفریں۔۔۔ آفریں آفریں
آنکھیں دیکھیں تو میں دیکھتا رہ گیا
جام دونوں اور دونوں ہی دو آتشہ
آنکھیں یا میکدے کے دو باب ہیں
آنکھیں انکو کہوں یا کہوں خواب ہیں
آنکھیں نیچی ہوئی تو حیا بن گئیں
آنکھیں اونچی ہوئی تو دعا بن گئیں
آنکھیں اٹھ کر جھکی تو دعا بن گئیں
آنکھیں جھک کر اٹھی تو قضا بن گئیں
آنکھیں جن میں ہے آسمان و زمین
نرگسی نرگسی۔۔ سرمئی سرمئی
نرگسی نرگسی۔۔ سرمئی سرمئی
آفریں آفریں۔۔۔ آفریں آفریں

حسن جاناں کی تعریف ممکن نیں

شاعر :
حسرت جئے پوری​