حسرت سے کھُلے گا نہ حکایت سے کھُلے گا ۔مقصود علی شاہ

حسرت سے کھُلے گا نہ حکایت سے کھُلے گا
یہ بابِ اثر صیغۂ مدحت سے کھُلے گا

ممکن نہیں حرفوں کے تناظر سے وہ اُبھرے
وہ اسمِ کرم موجۂ نکہت سے کھُلے گا

دیکھیں گے ارَم جا کے مدینے کی گلی میں
حیرت کا جہاں کوچۂ حیرت سے کھُلے گا

معراج نے بخشے ہیں نئے رنگِ کرامت
افلاک کا در آپ کی رفعت سے کھُلے گا

ایقان کی تاثیر سے یہ بند ہُوا ہے
اب آنکھ کا گھر لمعۂ طلعت سے کھُلے گا

خاموش دھرے ہوں گے ریاضت کے وظیفے
بخشش کا دریچہ تو شفاعت سے کھُلے گا

یہ جو کفِ احساس میں ہے حرفِ تسلی
اے جانِ کرم تیری عنایت سے کھُلے گا

سُن خوابِ عقیدہ میں گھِری فکرِ مقفل
یہ قُفل تو مفتاحِ محبت سے کھُلے گا

رنگینئ دُنیا ہے ترے تلووں کا دھوون
محشر کا سماں شوخئ قامت سے کھُلے گا

امکان میں لانے کو تری نعت کا منظر
حرفوں کا جہاں خامۂ نُدرت سے کھُلے گا

سَو وہم میں اُلجھا ہُوا تدبیر کا رستہ
مقصود یہ اب اسمِ کرامت سے کھُلے گا
-----
مقصود علی شاہ
Maqsood Ali Shah​

 

دیکھیں گے ارَم جا کے مدینے کی گلی میں
حیرت کا جہاں کوچۂ حیرت سے کھُلے گا​

 

معراج نے بخشے ہیں نئے رنگِ کرامت​

افلاک کا در آپ کی رفعت سے کھُلے گا​

 

خاموش دھرے ہوں گے ریاضت کے وظیفے
بخشش کا دریچہ تو شفاعت سے کھُلے گا​

 

یہ جو کفِ احساس میں ہے حرفِ تسلی
اے جانِ کرم تیری عنایت سے کھُلے گا​

 

رنگینئ دُنیا ہے ترے تلووں کا دھوون
محشر کا سماں شوخئ قامت سے کھُلے گا​

 

سبحان اللہ - جزاک اللہ

 

اللہ تعالٰی آپ کو بھی جزائے خیر عطا کرے آمین