جمالِ حق ایک عورت حضرت جنید بغدادی ؒ کے پاس آکر کہنے لگی کہ یا حضرت ! میرا شوہر دوسرا نکاح کرنا چاہتا ہے۔ فرمایا اگر اس کے نکاح میں اس وقت چار عورتیں نہیں، تو اُسے دوسرا نکاح کرنا جائز ہے۔عورت بولی؛ یا حضرت! اگر غیر مردوں کو عورتوں کی طرف دیکھنا جائزہوتا تو میں اپنا چہرہ کھول کر آپ کو دکھاتی۔ تاکہ آپ مجھے دیکھ کر بتاتے کہ جس شخص کے نکاح میں میری جیسی صاحب جمال عورت ہو، اُسے میرے سوا دوسری عورت سے نکاح کرنا لائق ہے۔ حضرت جنیدؒ نے عورت کی یہ بات سن کر ایک نعرہ مارا۔ اور رونے لگے۔ اور اس کا سبب پوچھنے پر بتایا کہ میرے ذہن میںاس وقت یہ خیال آیا ہے کہ حق تعالیٰ فرماتا ہے کہ اگر دنیا میں کسی کو مجھے دیکھنا جائز ہوتا۔ تو میں اپنے جمال سے حجاب اٹھا کر اس پر ظاہر ہو جاتا تاکہ وہ مجھے دیکھتا۔ پھر اسے معلوم ہوتا کہ جس کا مجھ جیسا رب ہو اس کے دل میں مجھے چھوڑ کر کسی اور سے محبت ہونی چاہیے۔یاد رکھیے،اللہ تعالیٰ کو چھوڑ کر اسکے غیر سے محبت کرنا بہت بڑی نادانی ہے۔
اللہ سے محبت کرنا ایمان کا تقاضا ہے، اللہ سے محبت دلوں کی نعمت ہے، اللہ سے محبت روح کی حیات ہے، اللہ سے محبت نفس کا سرور ہے، اللہ سے محبت دلوں کی غذا ہے، اللہ سے محبت عقلوں کا نور ہے، اللہ سے محبت آنکھوں کی ٹھندک ہے، اللہ سے محبت اندرونی عمارت ہے۔ اللہ سے محبت مخلص دل سے کی جائے اللہ سے محبتپاکیزہ روح سے کی جائے اللہ سے محبت عقل سلیم کے مطابق کی جائے اور اللہ سے محبت اللہ سے اُنسیت اور اللہ کی ملاقات کے شوق سے زیادہ خوبصورت، پاکیزہ ، رازدار اوربہتر نعمت اورکوئی نہیں۔
