جس شہر کے کوچوں میں لگے گام محمدﷺ ۔۔ ابراہیم حسان

جس شہر کے کوچوں میں لگے گام محمدﷺ
حسرت ہے کہ دیکھوں وہ دروبام محمدﷺ

ہیں حلقہ۶ آلام میں دنیا کے پجاری
ہیں گوشہ۶ آرام میں خدّام محمدﷺ

خوشبو کی طرح پھیلتا جاتاہے ہراک سمت
دنیا کے ہراک گوشے میں پیغام محمدﷺ

دکھ درد کے جھونکوں سے ہیں محفوظ وہی لوگ
باطن میں سجالیتے ہیں جو نام محمدﷺ

نغمات درودوں کے اگر دل میں بسالیں
لب چومتے رہتے ہیں حسیں نام محمدﷺ

آقا کے صحابہ ہیں ہدایت کے ستارے
حسنین کریمین ہیں گلفام محمدﷺ

ظلمات کا ہر نقش زمانے سے مٹادیں
یوں عام کریں دہر میں پیغام محمدﷺ

جس سے دل مضطر کو سکوں ہوگا میسر
ہے کوئی وظیفہ توہے وہ نام محمد ﷺ
------
ابراہیم حسان
​

 

سبحان اللہ جزاک اللہ