جری جوان بہادر شجاع ذاتِ عمرؓ ۔۔ریا ض احمد قادری

جری جوان بہادر شجاع ذاتِ عمرؓ
خدا کے دیں کا مکمل دفاع ذاتِ عمرؓ

انہی سے حق اور باطل کا فرق واضح ہوا
جہانِ کفر کا ہے انقطاع ذاتِ عمرؓ

نبیﷺ کے بعد نبی ہوتے گر وہی ہوتے
نبیﷺ کے نور سے نکلی شعاع ذاتِ عمرؓ

بہت سی آیتیں تائید میں اتر آئیں
جو دیں میں لائی کوئی اطلاع ذاتِ عمرؓ

کہا علیؑ نے کوئی انؓ سا اب کہاں ڈھونڈوں
ہوئی جہان سے جو الوداع ذاتِ عمرؓ

شیاطیں نامِ عمرؓ سن کے بھاگ جاتے ہیں
ہر اک لعین کا ہے امتناع ذاتِ عمرؓ

تراویح آپؓ نے رائج کی ماہِ رمضاں میں
ریاضؔ زہد میں ہے ارتفاع ذاتِ عمرؓ
----
ریا ض احمد قادری​

 

سبحان اللہ جزاک اللہ

 

سبحان اللہ
جزاک اللہ خیر