تو شمعِ رسالت ہے عالم ترا پروانہ

تو شمعِ رسالت ہے عالم ترا پروانہ
تو ماہِ نبوت ہے اے جلوۂ جانانہ
سرشار مجھے کر دے اک جامِ لبالب سے
تا حشر رہے ساقی آباد یہ مَے خانہ
جو ساقیِ کوثر کے چہرے سے نقاب اُٹھے
ہر دل بنے مَے خانہ ہر آنکھ ہو پیمانہ
دل اپنا چمک اُٹھے ایمان کی طلعت سے
کر آنکھ بھی نورانی اے جلوۂ جانانہ
مستِ مَے الفت ہے مدہوشِ محبت ہے
فرزانہ ہے فرزانہ دیوانہ ہے دیوانہ
میں شاہ نشیں ٹوٹے دل کو نہ کہوں کیسے
ہے ٹوٹا ہوا دل ہی مولا ترا کاشانہ
کیوں زُلفِ معنبر سے کوچے نہ مہک اُٹھیں
ہے پنجۂ قدرت جب زُلفوں کا تری شانہ
وہ کہتے نہ کہتے کچھ وہ کرتے نہ کرتے کچھ
اے کاش وہ سُن لیتے مجھ سے مرا افسانہ
آنکھوں میں مری تو آ اور دل میں مرے بس جا
دل شاد مرا فرما اے جلوۂ جانانہ
آباد اسے فرما ویراں ہے دلِ نوریؔ
جلوے ترے بس جائیں اے جلوۂ جانانہ
نوری بریلوی
​