تمام عمر گزاری ہے خیر میں نے بھی

تمام عمر گزاری ہے خیر میں نے بھی
کبھی نہ لگنے دیے اپنے پیر میں نے بھی
تمہارے غیر سمجھنے کی دیر تھی‘ پھر کیا
خود اپنے آپ کو سمجھا ہے غیر میں نے بھی
بس اپنے حلقۂ احباب کی حمایت میں
پھر اپنے ساتھ کمایا ہے بیر میں نے بھی
وہ گلبدن بھی تو اب باغ میں نہیں آتا
اسی لئے تو یہ چھوڑی ہے سیر میں نے بھی
سجا کے رکھا ہے دل میں بڑے قرینے سے
تمہاری یاد کو یادش بخیر میں نے بھی
وہی جو کام کیا کوہکن نے تیشے سے
کیا ہے کام وہ تیشے بغیر میں نے بھی
٭......٭......٭
مسعود احمد​