بیت بازی - حصہ دوم

وہی میں ہوں، وہی آسودہ خرامی میری
اور ہر سمت وہی دام بچھائے ہوئے لوگ

 

گزرنے پاتی تو شاداب ہو بھی سکتی تھی
یہ تیرگی جو مری زیست کا مقدر ہے

 

یہاں ویرانیوں کی ایک مدت سے حکومت ہے
یہاں سے نفرتیں گذری ہے بربادی بتاتی ہے

 

یاد کے قافلے میں گھنٹیاں سی بجتی ہیں
پھول کھل جاتے ہیں اس دشت کی ویرانی میں

 

یوں تیری چاہتیں سنبھالی ہیں
جیسے عیدی ہو میرے بچپن کی

 

نہ اب وہ اپنی تمنا، نہ اب وہ خواہشِ خاص
میں جی رہا ہوں یہ کس عمرِ رائیگاں کے لیے

 

یہ ادا آپ میں سرکار کہاں تھی پہلے
یہ نظر آپ کی تَلوار کہاں تھی پہلے

 

انجام اس کے ہاتھ ہے آغاز کر کے دیکھ
بھیگے ہوئے پروں سے ہی پروازکر کے دیکھ

 

اے گردبادِ وقت! بکھرتا نہیں ہُوں میں
نقشِ وفا ہُوں نقشِ کفِ پا نہیں ہُوں میں

 

نیند آ جائے تو کیا محفلیں برپا دیکھوں
آنکھ کھل جائے تو تنہائی کا صحرا دیکھوں

 

یہ بار بار کنارے پہ کِس کو دیکھتا ہے
بھنور کے بِیچ کوئی حوصلہ اُچھال کے رکھ

 

ہمراہ لیے جاؤ مرا دیدہء تَر بھی
جاتے ہو سفر پر تو کوئی رختِ سفر بھی

 

یہ کم نہیں ہے وضاحت میری اسِیری کی
پروں کے رنگ، تہہِ دام چھوڑ آیا ہوں

 

یہ دیکھنا ہے کہ کھل کر بھی بادباں نہ کھلے
تو اس سے کتنا تعلق ہوا کی چال کا تھا

 

ان کا آنا بھی ہے اندازِ تغافل جیسا
دو گھڑی بیٹھے نہیں ، کہتے ہیں گھر جانے دو

 

وحشت میں نکل آیا ہوں ادراک سے آگے
اب ڈھونڈ مُجھے مجمعِ عُشاق سے آگے

 

یاد کے قافلے میں گھنٹیاں سی بجتی ہیں
پھول کھل جاتے ہیں اس دشت کی ویرانی میں

 

یار کو ہم نے جا بجا دیکھا
کہیں ظاہر، کہیں چھپا دیکھا

 

اللہ رے ذوقِ دشت نوردی کہ بعدِ مرگ
ہلتے ہیں خود بہ خود مرے، اندر کفن کے، پاؤں

 

یہ نہیں کہ میری محبتوں کو کبھی خراج نہیں ملا
مگر اتفاق کی بات ہے ،کوئی ہم مزاج نہیں ملا

 

یک ذرۂ زمیں نہیں بے کار باغ کا
یاں جادہ بھی فتیلہ ہے لالے کے داغ کا