بکھرنے کے لیے شیرازے کیا لگاتے ہیں

بکھرنے کے لیے شیرازے کیا لگاتے ہیں
خلا ہے اور یہ آوازے کیا لگاتے ہیں
جو میں ہوں میرے سوا کوئی جانتا ہی نہیں
نہ جانے لوگ یہ اندازے کیا لگاتے ہیں
اک اور آنکھ اُبھر آئے دیکھنے کے لیے
اک اور غازے پہ بھی غازے کیا لگاتے ہیں
چلی ہوئی ہے زمان و مکاں کے باہر سے
ہوا کے سامنے دروازے کیا لگاتے ہیں
گزر کے آئے ہوئے ہیں ہزاروں منزلوں سے
ہمارے سامنے خمیازے کیا لگاتے ہیں
وجود جھیل‘ عدم جھیل بیٹھے ہیں ہم جو
وہ زخم اور ہمیں تازے کیا لگاتے ہیں
نویدؔ خود میں اترتے نہیں ہیں لوگ یہاں
یہ کیا مقام ہے اندازے کیا لگاتے ہیں
افضال نوید​