بانگ درا (مکمل)

پھولوں کي شہزادي

پھولوں کي شہزادي

کلي سے کہہ رہي تھي ايک دن شبنم گلستاں ميں
رہي ميں ايک مدت غنچہ ہائے باغ رضواں ميں

تمھارے گلستاں کي کيفيت سرشار ہے ايسي
نگہ فردوس در دامن ہے ميري چشم حيراں ميں

سنا ہے کوئي شہزادي ہے حاکم اس گلستاں کي
کہ جس کے نقش پا سے پھول ہوں پيدا بياباں ميں

کبھي ساتھ اپنے اس کے آستاں تک مجھ کو تو لے چل
چھپا کر اپنے دامن ميں برنگ موج بو لے چل

کلي بولي، سرير آرا ہماري ہے وہ شہزادي
درخشاں جس کي ٹھوکر سے ہوں پتھر بھي نگيں بن کر

مگر فطرت تري افتندہ اور بيگم کي شان اونچي
نہيں ممکن کہ تو پہنچے ہماري ہم نشيں بن کر

پہنچ سکتي ہے تو ليکن ہماري شاہزادي تک
کسي دکھ درد کے مارے کا اشک آتشيں بن کر

نظر اس کي پيام عيد ہے اہل محرم کو
بنا ديتي ہے گوہر غم زدوں کے اشک پيہم کو​

 

تضمين بر شعر صائب

تضمين بر شعر صائب

کہاں اقبال تو نے آ بنايا آشياں اپنا
نوا اس باغ ميں بلبل کو ہے سامان رسوائي

شرارے وادي ايمن کے تو بوتا تو ہے ليکن
نہيں ممکن کہ پھوٹے اس زميں سے تخم سينائي

کلي زور نفس سے بھي وہاں گل ہو نہيں سکتي
جہاں ہر شے ہو محروم تقاضائے خود افزائي

قيامت ہے کہ فطرت سو گئي اہل گلستاں کي
نہ ہے بيدار دل پيري، نہ ہمت خواہ برنائي

دل آگاہ جب خوابيدہ ہو جاتے ہيں سينوں ميں
نو اگر کے ليے زہراب ہوتي ہے شکر خائي

نہيں ضبط نوا ممکن تو اڑ جا اس گلستاں سے
کہ اس محفل سے خوشتر ہے کسي صحرا کي تنہائي

''ہماں بہتر کہ ليلي در بياباں جلوہ گر باشد
ندارد تنگناے شہر تاب حسن صحرائي''​

 

فردوس ميں ايک مکالمہ

فردوس ميں ايک مکالمہ

ہاتف نے کہا مجھ سے کہ فردوس ميں اک روز
حالي سے مخاطب ہوئے يوں سعدي شيراز

اے آنکہ ز نور گہر نظم فلک تاب
دامن بہ چراغ مہ اختر زدہ اي باز!

کچھ کيفيت مسلم ہندي تو بياں کر
واماندئہ منزل ہے کہ مصروف تگ و تاز

مذہب کي حرارت بھي ہے کچھ اس کي رگوں ميں؟
تھي جس کي فلک سوز کبھي گرمي آواز

باتوں سے ہوا شيخ کي حالي متاثر
رو رو کے لگا کہنے کہ ''اے صاحب اعجاز

جب پير فلک نے ورق ايام کا الٹا
آئي يہ صدا، پاؤ گے تعليم سے اعزاز

آيا ہے مگر اس سے عقيدوں ميں تزلزل
دنيا تو ملي، طائر ديں کر گيا پرواز

ديں ہو تو مقاصد ميں بھي پيدا ہو بلندي
فطرت ہے جوانوں کي زميں گير زميں تاز

مذہب سے ہم آہنگي افراد ہے باقي
ديں زخمہ ہے، جمعيت ملت ہے اگر ساز

بنياد لرز جائے جو ديوار چمن کي
ظاہر ہے کہ انجام گلستاں کا ہے آغاز

پاني نہ ملا زمزم ملت سے جو اس کو
پيدا ہيں نئي پود ميں الحاد کے انداز

يہ ذکر حضور شہ يثرب ميں نہ کرنا
سمجھيں نہ کہيں ہند کے مسلم مجھے غماز

خرما نتواں يافت ازاں خار کہ کشتيم
ديبا نتواں بافت ازاں پشم کہ رشتيم''
(سعدي)​

 

مذہب

مذہب
تضمين بر شعر ميرزابيدل

تعليم پير فلسفہء مغربي ہے يہ
ناداں ہيں جن کو ہستي غائب کي ہے تلاش

پيکر اگر نظر سے نہ ہو آشنا تو کيا
ہے شيخ بھي مثال برہمن صنم تراش

محسوس پر بنا ہے علوم جديد کي
اس دور ميں ہے شيشہ عقائد کا پاش پاش

مذہب ہے جس کا نام، وہ ہے اک جنون خام
ہے جس سے آدمي کے تخيل کو انتعاش

کہتا مگر ہے فلسفہء زندگي کچھ اور
مجھ پر کيا يہ مرشد کامل نے راز فاش

''با ہر کمال اند کے آشفتگي خوش است
ہر چند عقل کل شدہ اي بے جنوں مباش''​

 

جنگ يرموک کا ايک واقعہ

جنگ يرموک کا ايک واقعہ

صف بستہ تھے عرب کے جوانان تيغ بند
تھي منتظر حنا کي عروس زمين شام

اک نوجوان صورت سيماب مضطرب
آ کر ہوا امير عساکر سے ہم کلام

اے بوعبيدہ رخصت پيکار دے مجھے
لبريز ہو گيا مرے صبر و سکوں کو جام

بے تاب ہو رہا ہوں فراق رسول ميں
اک دم کي زندگي بھي محبت ميں ہے حرام

جاتا ہوں ميں حضور رسالت پناہ ميں
لے جاؤں گا خوشي سے اگر ہو کوئي پيام

يہ ذوق و شوق ديکھ کے پرنم ہوئي وہ آنکھ
جس کي نگاہ تھي صفت تيغ بے نيام

بولا امير فوج کہ ''وہ نوجواں ہے تو
پيروں پہ تيرے عشق کا واجب ہے احترام

پوري کرے خدائے محمد تري مراد
کتنا بلند تيري محبت کا ہے مقام!

پہنچے جو بارگاہ رسول اميں ميں تو
کرنا يہ عرض ميري طرف سے پس از سلام

ہم پہ کرم کيا ہے خدائے غيور نے
پورے ہوئے جو وعدے کيے تھے حضور نے''​

 

مذہب

مذہب

اپني ملت پر قياس اقوام مغرب سے نہ کر
خاص ہے ترکيب ميں قوم رسول ہاشمي

ان کي جمعيت کا ہے ملک و نسب پر انحصار
قوت مذہب سے مستحکم ہے جمعيت تري

دامن ديں ہاتھ سے چھوٹا تو جمعيت کہاں
اور جمعيت ہوئي رخصت تو ملت بھي گئي​

 

پيوستہ رہ شجر سے، اميد بہار رکھ!

پيوستہ رہ شجر سے، اميد بہار رکھ!

ڈالي گئي جو فصل خزاں ميں شجر سے ٹوٹ
ممکن نہيں ہري ہو سحاب بہار سے

ہے لازوال عہد خزاں اس کے واسطے
کچھ واسطہ نہيں ہے اسے برگ و بار سے

ہے تيرے گلستاں ميں بھي فصل خزاں کا دور
خالي ہے جيب گل زر کامل عيار سے

جو نغمہ زن تھے خلوت اوراق ميں طيور
رخصت ہوئے ترے شجر سايہ دار سے

شاخ بريدہ سے سبق اندوز ہو کہ تو
ناآشنا ہے قاعدہء روزگار سے

ملت کے ساتھ رابطہء استوار رکھ
پيوستہ رہ شجر سے ، اميد بہار رکھ!​

 

شب معراج

شب معراج

اختر شام کي آتي ہے فلک سے آواز
سجدہ کرتي ہے سحر جس کو، وہ ہے آج کي رات

رہ يک گام ہے ہمت کے ليے عرش بريں
کہہ رہي ہے يہ مسلمان سے معراج کي رات​

 

پھول

پھول

تجھے کيوں فکر ہے اے گل دل صد چاک بلبل کي
تو اپنے پيرہن کے چاک تو پہلے رفو کر لے

تمنا آبرو کي ہو اگر گلزار ہستي ميں
تو کانٹوں ميں الجھ کر زندگي کرنے کي خو کرلے

صنوبر باغ ميں آزاد بھي ہے، پا بہ گل بھي ہے
انھي پابنديوں ميں حاصل آزادي کو تو کر لے

تنک بخشي کو استغنا سے پيغام خجالت دے
نہ رہ منت کش شبنم نگوں جام وسبو کر لے

نہيں يہ شان خودداري، چمن سے توڑ کر تجھ کو
کوئي دستار ميں رکھ لے، کوئي زيب گلو کر لے

چمن ميں غنچہ گل سے يہ کہہ کر اڑ گئي شبنم
مذاق جور گلچيں ہو تو پيدا رنگ و بو کر لے

اگر منظور ہو تجھ کو خزاں ناآشنا رہنا
جہان رنگ و بو سے، پہلے قطع آرزو کر لے

اسي ميں ديکھ ، مضمر ہے کمال زندگي تيرا
جو تجھ کو زينت دامن کوئي آئينہ رو کر لے​

 

شيکسپير

شيکسپير

شفق صبح کو دريا کا خرام آئينہ
نغمہ شام کو خاموشي شام آئينہ

برگ گل آئنہ عارض زبيائے بہار
شاہد مے کے ليے حجلہ جام آئينہ

حسن آئنہ حق اور دل آئنہ حسن
دل انساں کو ترا حسن کلام آئينہ

ہے ترے فکر فلک رس سے کمال ہستي
کيا تري فطرت روشن تھي مآل ہستي

تجھ کو جب ديدئہ ديدار طلب نے ڈھونڈا
تاب خورشيد ميں خورشيد کو پنہاں ديکھا

چشم عالم سے تو ہستي رہي مستور تري
اور عالم کو تري آنکھ نے عرياں ديکھا

حفظ اسرار کا فطرت کو ہے سودا ايسا
رازداں پھر نہ کرے گي کوئي پيدا ايسا​

 

ميں اور تو

ميں اور تو

ٕنہ سليقہ مجھ ميں کليم کا نہ قرينہ تجھ ميں خليل کا
ميں ہلاک جادوئے سامري، تو قتيل شيوئہ آزري

ميں نوائے سوختہ در گلو، تو پريدہ رنگ، رميدہ بو
ميں حکايت غم آرزو ، تو حديث ماتم دلبري

مرا عيش غم، مرا شہد سم، مري بود ہم نفس عدم
ترا دل حرم، گرو عجم ترا ديں خريدہ کافري

دم زندگي رم زندگي، غم زندگي سم زندگي
غم رم نہ کر، سم غم نہ کھا کہ يہي ہے شان قلندري

تري خاک ميں ہے اگر شرر تو خيال فقر و غنا نہ کر
کہ جہاں ميں نان شعير پر ہے مدار قوت حيدري

کوئي ايسي طرز طواف تو مجھے اے چراغ حرم بتا!
کہ ترے پتنگ کو پھر عطا ہو وہي سرشت سمندري

گلہء جفائے وفا نما کہ حرم کو اہل حرم سے ہے
کسي بت کدے ميں بياں کروں تو کہے صنم بھي 'ہري ہري'
نہ ستيزہ گاہ جہاں نئي نہ حريف پنجہ فگن نئے​

 

اسيري

اسيري

ہے اسيري اعتبار افزا جو ہو فطرت بلند
قطرئہ نيساں ہے زندان صدف سے ارجمند

مشک اذفر چيز کيا ہے ، اک لہو کي بوند ہے
مشک بن جاتي ہے ہو کر نافہ آہو ميں بند

ہر کسي کي تربيت کرتي نہيں قدرت، مگر
کم ہيں وہ طائر کہ ہيں دام وقفس سے بہرہ مند

''شہپر زاغ و زغن در بند قيد و صيد نيست
ايں سعادت قسمت شہباز و شاہيں کردہ اند''​

 

دريوزہ خلافت

دريوزہ خلافت

اگر ملک ہاتھوں سے جاتا ہے، جائے
تو احکام حق سے نہ کر بے وفائي

نہيں تجھ کو تاريخ سے آگہي کيا
خلافت کي کرنے لگا تو گدائي

خريديں نہ جس کو ہم اپنے لہو سے
مسلماں کو ہے ننگ وہ پادشائي

''مرا از شکستن چناں عار نايد
کہ از ديگراں خواستن موميائي''​

 

ہمايوں

ہمايوں
(مسٹر جسٹسں شاہ دين مرحوم)

اے ہمايوں! زندگي تيري سراپا سوز تھي
تيري چنگاري چراغ انجمن افروز تھي

گرچہ تھا تيرا تن خاکي نزار و دردمند
تھي ستارے کي طرح روشن تري طبع بلند

کس قدر بے باک دل اس ناتواں پيکر ميں تھا
شعلہ گردوں نورد اک مشت خاکستر ميں تھا

موت کي ليکن دل دانا کو کچھ پروا نہيں
شب کي خاموشي ميں جز ہنگامہ فردا نہيں

موت کو سمجھے ہيں غافل اختتام زندگي
ہے يہ شام زندگي، صبح دوام زندگي​

 

خضرراہ

خضرراہ
شاعر​

ساحل دريا پہ ميں اک رات تھا محو نظر
گوشہ دل ميں چھپائے اک جہان اضطراب

شب سکوت افزا، ہوا آسودہ، دريا نرم سير
تھي نظر حيراں کہ يہ دريا ہے يا تصوير آب

جيسے گہوارے ميں سو جاتا ہے طفل شير خوار
موج مضطر تھي کہيں گہرائيوں ميں مست خواب

رات کے افسوں سے طائر آشيانوں ميں اسير
انجم کم ضو گرفتار طلسم ماہتاب

ديکھتا کيا ہوں کہ وہ پيک جہاں پيما خضر
جس کي پيري ميں ہے مانند سحر رنگ شباب

کہہ رہا ہے مجھ سے، اے جويائے اسرار ازل!
چشم دل وا ہو تو ہے تقدير عالم بے حجاب

دل ميں يہ سن کر بپا ہنگامہ محشر ہوا
ميں شہيد جستجو تھا، يوں سخن گستر ہوا

اے تري چشم جہاں بيں پر وہ طوفاں آشکار
جن کے ہنگامے ابھي دريا ميں سوتے ہيں خموش

'کشتي مسکين، و 'جان پاک' و 'ديوار يتيم،
علم موسي بھي ہے تيرے سامنے حيرت فروش

چھوڑ کر آبادياں رہتا ہے تو صحرا نورد
زندگي تيري ہے بے روز و شب و فردا دوش

زندگي کا راز کيا ہے، سلطنت کيا چيز ہے
اور يہ سرمايہ و محنت ميں ہے کيسا خروش

ہو رہا ہے ايشيا کا خرقہ ديرينہ چاک
نوجواں اقوام نو دولت کے ہيں پيرايہ پوش

گرچہ اسکندر رہا محروم آب زندگي
فطرت اسکندري اب تک ہے گرم نائونوش

بيچتا ہے ہاشمي ناموس دين مصطفي
خاک و خوں ميں مل رہا ہے ترکمان سخت کوش

آگ ہے، اولاد ابراہيم ہے، نمرود ہے
کيا کسي کو پھر کسي کا امتحاں مقصود ہے!

جواب خضر
صحرا نوردي

کيوں تعجب ہے مري صحرا نوردي پر تجھے
يہ تگا پوئے دمادم زندگي کي ہے دليل

اے رہين خانہ تو نے وہ سماں ديکھا نہيں
گونجتي ہے جب فضائے دشت ميں بانگ رحيل

ريت کے ٹيلے پہ وہ آہو کا بے پروا خرام
وہ حضر بے برگ و ساماں، وہ سفر بے سنگ و ميل

وہ نمود اختر سيماب پا ہنگام صبح
يا نماياں بام گردوں سے جبين جبرئيل

وہ سکوت شام صحرا ميں غروب آفتاب
جس سے روشن تر ہوئي چشم جہاں بين خليل

اور وہ پاني کے چشمے پر مقام کارواں
اہل ايماں جس طرح جنت ميں گرد سلسبيل

تازہ ويرانے کي سودائے محبت کو تلاش
اور آبادي ميں تو زنجيري کشت و نخيل

پختہ تر ہے گردش پہيم سے جام زندگي
ہے يہي اے بے خبر راز دوام زندگي

زندگي

برتر از انديشہء سود و زياں ہے زندگي
ہے کبھي جاں اور کبھي تسليم جاں ہے زندگي

تو اسے پيمانہ امروز و فردا سے نہ ناپ
جاوداں پيہم دواں، ہر دم جواں ہے زندگي

اپني دنيا آپ پيدا کر اگر زندوں ميں ہے
سر آدم ہے، ضمير کن فکاں ہے زندگي

زندگاني کي حقيقت کوہکن کے دل سے پوچھ
جوئے شير و تيشہ و سنگ گراں ہے زندگي

بندگي ميں گھٹ کے رہ جاتي ہے اک جوئے کم آب
اور آزادي ميں بحر بے کراں ہے زندگي

آشکارا ہے يہ اپني قوت تسخير سے
گرچہ اک مٹي کے پيکر ميں نہاں ہے زندگي

قلزم ہستي سے تو ابھرا ہے مانند حباب
اس زياں خانے ميں تيرا امتحاں ہے زندگي

خام ہے جب تک تو ہے مٹي کا اک انبار تو
پختہ ہو جائے تو ہے شمشير بے زنہار تو

ہو صداقت کے ليے جس دل ميں مرنے کي تڑپ
پہلے اپنے پيکر خاکي ميں جاں پيدا کرے

پھونک ڈالے يہ زمين و آسمان مستعار
اور خاکستر سے آپ اپنا جہاں پيدا کرے

زندگي کي قوت پنہاں کو کر دے آشکار
تا يہ چنگاري فروغ جاوداں پيدا کرے

خاک مشرق پر چمک جائے مثال آفتاب
تا بدخشاں پھر وہي لعل گراں پيدا کرے

سوئے گردوں نالہ شب گير کا بھيجے سفير
رات کے تارں ميں اپنے رازداں پيدا کرے

يہ گھڑي محشر کي ہے، تو عرصہء محشر ميں ہے
پيش کر غافل ، عمل کوئي اگر دفتر ميں ہے

سلطنت

آبتاؤں تجھ کو رمز آيہء 'ان الملوک'
سلطنت اقوام غالب کي ہے اک جادوگري

خواب سے بيدار ہوتا ہے ذرا محکوم اگر
پھر سلا ديتي ہے اس کو حکمراں کي ساحري

جادوئے محمود کي تاثير سے چشم اياز
ديکھتي ہے حلقہء گردن ميں ساز دلبري

خون اسرائيل آ جاتا ہے آخر جوش ميں
توڑ ديتا ہے کوئي موسي طلسم سامري

سروري زيبا فقط اس ذات بے ہمتا کو ہے
حکمراں ہے اک وہي، باقي بتان آزري

از غلامي فطرت آزاد را رسوا مکن
تا تراشي خواجہ ے از برہمن کافر تري

ہے وہي ساز کہن مغرب کا جمہوري نظام
جس کے پردوں ميں نہيں غير از نوائے قيصري

ديو استبداد جمہوري قبا ميں پاے کوب
تو سمجھتا ہے يہ آزادي کي ہے نيلم پري

مجلس آئين و اصلاح و رعايات و حقوق
طب مغرب ميں مزے ميٹھے، اثر خواب آوري

گرمي گفتار اعضائے مجالس، الاماں!
يہ بھي اک سرمايہ داروں کي ہے جنگ زرگري

اس سراب رنگ و بو کو گلستاں سمجھا ہے تو
آہ اے ناداں! قفس کو آشياں سمجھا ہے تو

سرمايہ ومحنت

بندہء مزدور کو جا کر مرا پيغام دے
خضر کا پيغام کيا، ہے يہ پيام کائنات

اے کہ تجھ کو کھا گيا سرمايہ دار حيلہ گر
شاخ آہو پر رہي صديوں تلک تيري برات

دست دولت آفريں کو مزد يوں ملتي رہي
اہل ثروت جيسے ديتے ہيں غريبوں کو زکات

ساحر الموط نے تجھ کو ديا برگ حشيش
اور تو اے بے خبر سمجھا اسے شاخ نبات

نسل، قوميت، کليسا، سلطنت، تہذيب، رنگ
خواجگي نے خوب چن چن کے بنائے مسکرات

کٹ مرا ناداں خيالي ديوتاؤں کے ليے
سکرکي لذت ميں تو لٹوا گيا نقد حيات

مکر کي چالوں سے بازي لے گيا سرمايہ دار
انتہائے سادگي سے کھا گيا مزدور مات

اٹھ کہ اب بزم جہاں کا اور ہي اندازہے
مشرق و مغرب ميں تيرے دور کا آغاز ہے

ہمت عالي تو دريا بھي نہيں کرتي قبول
غنچہ ساں غافل ترے دامن ميں شبنم کب تلک

نغمہ بيداري جمہور ہے سامان عيش
قصہ خواب آور اسکندر و جم کب تلک

آفتاب تازہ پيدا بطن گيتي سے ہوا
آسمان! ڈوبے ہوئے تاروں کا ماتم کب تلک

توڑ ڈاليں فطرت انساں نے زنجيريں تمام
دوري جنت سے روتي چشم آدم کب تلک

باغبان چارہ فرما سے يہ کہتي ہے بہار
زخم گل کے واسطے تدبير مرہم کب تلک

کرمک ناداں! طواف شمع سے آزاد ہو
اپني فطرت کے تجلي زار ميں آباد ہو

دنيائے اسلام

کيا سناتا ہے مجھے ترک و عرب کي داستاں
مجھ سے کچھ پنہاں نہيں اسلاميوں کا سوز و ساز

لے گئے تثليث کے فرزند ميراث خليل
خشت بنياد کليسا بن گئي خاک حجاز

ہوگئي رسوا زمانے ميں کلاہ لالہ رنگ
جو سراپا ناز تھے، ہيں آج مجبور نياز

لے رہا ہے مے فروشان فرنگستاں سے پارس
وہ مےء سرکش حرارت جس کي ہے مينا گداز

حکمت مغرب سے ملت کي يہ کيفيت ہوئي
ٹکڑے ٹکڑے جس طرح سونے کو کر ديتا ہے گاز

ہوگيا مانند آب ارزاں مسلماں کا لہو
مضطرب ہے تو کہ تيرا دل نہيں دانائے راز

گفت رومي ''ہر بناے کہنہ کآباداں کنند''
مي نداني ''اول آں بنياد را ويراں کنند''

''ملک ہاتھوں سے گيا ملت کي آنکھيں کھل گئيں''
حق ترا چشمے عطا کردست غافل در نگر

موميائي کي گدائي سے تو بہتر ہے شکست
مور بے پر! حاجتے پيش سليمانے مبر

ربط و ضبط ملت بيضا ہے مشرق کي نجات
ايشيا والے ہيں اس نکتے سے اب تک بے خبر

پھر سياست چھوڑ کر داخل حصار ديں ميں ہو
ملک و دولت ہے فقط حفظ حرم کا اک ثمر

ايک ہوں مسلم حرم کي پاسباني کے ليے
نيل کے ساحل سے لے کر تا بخاک کاشغر

جو کرے گا امتياز رنگ و خوں ، مٹ جائے گا
ترک خرگاہي ہو يا اعرابي والا گہر

نسل اگر مسلم کي مذہب پر مقدم ہوگئي
اڑ گيا دنيا سے تو مانند خاک رہ گزر

تا خلافت کي بنا دنيا ميں ہو پھر استور
لا کہيں سے ڈھونڈ کر اسلاف کا قلب و جگر

اے کہ نشناسي خفي را از جلي ہشيار باش
اے گرفتار ابوبکر و علي ہشيار باش

عشق کو فرياد لازم تھي سو وہ بھي ہو چکي
اب ذرا دل تھام کر فرياد کي تاثير ديکھ

تو نے ديکھا سطوت رفتار دريا کا عروج
موج مضطر کس طرح بنتي ہے اب زنجير ديکھ

عام حريت کا جو ديکھا تھا خواب اسلام نے
اے مسلماں آج تو اس خواب کي تعبير ديکھ

اپني خاکستر سمندر کو ہے سامان وجود
مر کے پھر ہوتا ہے پيدا يہ جہان پير، ديکھ

کھول کر آنکھيں مرے آئينہء گفتار ميں
آنے والے دور کي دھندلي سي اک تصوير ديکھ

آزمودہ فتنہ ہے اک اور بھي گردوں کے پاس
سامنے تقدير کے رسوائي تدبير ديکھ

مسلم استي سينہ را از آرزو آباد دار
ہر زماں پيش نظر، 'لايخلف الميعاد' دار​

 

طلوع اسلام

طلوع اسلام

دليل صبح روشن ہے ستاروں کي تنک تابي
افق سے آفتاب ابھرا ،گيا دور گراں خوابي

عروق مردہء مشرق ميں خون زندگي دوڑا
سمجھ سکتے نہيں اس راز کو سينا و فارابي

مسلماں کو مسلماں کر ديا طوفان مغرب نے
تلاطم ہائے دريا ہي سے ہے گوہر کي سيرابي

عطا مومن کو پھر درگاہ حق سے ہونے والا ہے
شکوہ ترکماني، ذہن ہندي، نطق اعرابي

اثر کچھ خواب کا غنچوں ميں باقي ہے تو اے بلبل!
''نوا را تلخ تر مي زن چو ذوق نغمہ کم يابي''

تڑپ صحن چمن ميں، آشياں ميں ، شاخساروں ميں
جدا پارے سے ہو سکتي نہيں تقدير سيمابي

وہ چشم پاک بيں کيوں زينت برگستواں ديکھے
نظر آتي ہے جس کو مرد غازي کي جگر تابي

ضمير لالہ ميں روشن چراغ آرزو کر دے
چمن کے ذرے ذرے کو شہيد جستجو کر دے

سرشک چشم مسلم ميں ہے نيساں کا اثر پيدا
خليل اللہ کے دريا ميں ہوں گے پھر گہر پيدا

کتاب ملت بيضا کي پھر شيرازہ بندي ہے
يہ شاخ ہاشمي کرنے کو ہے پھر برگ و بر پيدا

ربود آں ترک شيرازي دل تبريز و کابل را
صبا کرتي ہے بوئے گل سے اپنا ہم سفر پيدا

اگر عثمانيوں پر کوہ غم ٹوٹا تو کيا غم ہے
کہ خون صد ہزار انجم سے ہوتي ہے سحر پيدا

جہاں باني سے ہے دشوار تر کار جہاں بيني
جگر خوں ہو تو چشم دل ميں ہوتي ہے نظر پيدا

ہزاروں سال نرگس اپني بے نوري پہ روتي ہے
بڑي مشکل سے ہوتا ہے چمن ميں ديدہ ور پيدا

نوا پيرا ہو اے بلبل کہ ہو تيرے ترنم سے
کبوتر کے تن نازک ميں شاہيں کا جگر پيدا

ترے سينے ميں ہے پوشيدہ راز زندگي کہہ دے
مسلماں سے حديث سوز و ساز زندگي کہہ دے

خدائے لم يزل کا دست قدرت تو، زباں تو ہے
يقيں پيدا کر اے غافل کہ مغلوب گماں تو ہے

پرے ہے چرخ نيلي فام سے منزل مسلماں کي
ستارے جس کي گرد راہ ہوں، وہ کارواں تو ہے

مکاں فاني ، مکيں آني، ازل تيرا، ابد تيرا
خدا کا آخري پيغام ہے تو، جاوداں تو ہے

حنا بند عروس لالہ ہے خون جگر تيرا
تري نسبت براہيمي ہے، معمار جہاں تو ہے

تري فطرت اميں ہے ممکنات زندگاني کي
جہاں کے جوہر مضمر کا گويا امتحاں تو ہے

جہان آب و گل سے عالم جاويد کي خاطر
نبوت ساتھ جس کو لے گئي وہ ارمغاں تو ہے

يہ نکتہ سرگزشت ملت بيضا سے ہے پيدا
کہ اقوام زمين ايشيا کا پاسباں تو ہے

سبق پھر پڑھ صداقت کا ، عدالت کا ، شجاعت کا
ليا جائے گا تجھ سے کام دنيا کي امامت کا

يہي مقصود فطرت ہے، يہي رمز مسلماني
اخوت کي جہاں گيري، محبت کي فراواني

بتان رنگ و خوں کو توڑ کر ملت ميں گم ہو جا
نہ توراني رہے باقي، نہ ايراني، نہ افغاني

ميان شاخساراں صحبت مرغ چمن کب تک!
ترے بازو ميں ہے پرواز شاہين قہستاني

گمان آباد ہستي ميں يقيں مرد مسلماں کا
بياباں کي شب تاريک ميں قنديل رہباني

مٹايا قيصر و کسري کے استبداد کو جس نے
وہ کيا تھا، زور حيدر، فقر بوذر، صدق سلماني

ہوئے احرار ملت جادہ پيما کس تجمل سے
تماشائي شگاف در سے ہيں صديوں کے زنداني

ثبات زندگي ايمان محکم سے ہے دنيا ميں
کہ الماني سے بھي پائندہ تر نکلا ہے توراني

جب اس انگارئہ خاکي ميں ہوتا ہے يقيں پيدا
تو کر ليتا ہے يہ بال و پر روح الاميں پيدا

غلامي ميں نہ کام آتي ہيں شمشيريں نہ تدبيريں
جو ہو ذوق يقيں پيدا تو کٹ جاتي ہيں زنجيريں

کوئي اندازہ کر سکتا ہے اس کے زور بازو کا
نگاہ مرد مومن سے بدل جاتي ہيں تقديريں

ولايت، پادشاہي، علم اشيا کي جہاں گيري
يہ سب کيا ہيں، فقط اک نکتہء ايماں کي تفسيريں

براہيمي نظر پيدا مگر مشکل سے ہوتي ہے
ہوس چھپ چھپ کے سينوں ميں بنا ليتي ہے تصويريں

تميز بندہ و آقا فساد آدميت ہے
حذر اے چيرہ دستاں! سخت ہيں فطرت کي تغريريں

حقيقت ايک ہے ہر شے کي، خاکي ہو کہ نوري ہو
لہو خورشيد کا ٹپکے اگر ذرے کا دل چيريں

يقيں محکم، عمل پيہم، محبت فاتح عالم
جہاد زندگاني ميں ہيں يہ مردوں کي شمشيريں

چہ بايد مرد را طبع بلندے ، مشرب نابے
دل گرمے ، نگاہ پاک بينے ، جان بيتابے

عقابي شان سے جھپٹے تھے جو ، بے بال و پر نکلے
ستارے شام کے خون شفق ميں ڈوب کر نکلے

ہوئے مدفون دريا زير دريا تيرنے والے
طمانچے موج کے کھاتے تھے ، جو ، بن کر گہر نکلے

غبار رہ گزر ہيں، کيميا پر ناز تھا جن کو
جبينيں خاک پر رکھتے تھے جو، اکسير گر نکلے

ہمارا نرم رو قاصد پيام زندگي لايا
خبر ديتي تھيں جن کو بجلياں وہ بے خبر نکلے

حرم رسوا ہوا پير حرم کي کم نگاہي سے
جوانان تتاري کس قدر صاحب نظر نکلے

زميں سے نوريان آسماں پرواز کہتے تھے
يہ خاکي زندہ تر، پائندہ تر، تابندہ تر نکلے

جہاں ميں اہل ايماں صورت خورشيد جيتے ہيں
ادھر ڈوبے، ادھر نکلے ادھر ڈوبے، ادھر نکلے

يقيں افراد کا سرمايہ تعمير ملت ہے
يہي قوت ہے جو صورت گر تقدير ملت ہے

تو راز کن فکاں ہے، اپني انکھوں پر عياں ہو جا
خودي کا راز داں ہو جا، خدا کا ترجماں ہو جا

ہوس نے کر ديا ہے ٹکڑے ٹکڑے نوع انساں کو
اخوت کا بياں ہو جا، محبت کي زباں ہو جا

يہ ہندي، وہ خراساني، يہ افغاني، وہ توراني
تو اے شرمندئہ ساحل! اچھل کر بے کراں ہو جا

غبار آلودئہ رنگ ونسب ہيں بال و پر تيرے
تو اے مرغ حرم! اڑنے سے پہلے پرفشاں ہو جا

خودي ميں ڈوب جا غافل! يہ سر زندگاني ہے
نکل کر حلقہ شام و سحر سے جاوداں ہو جا

مصاف زندگي ميں سيرت فولاد پيدا کر
شبستان محبت ميں حرير و پرنياں ہو جا

گزر جا بن کے سيل تند رو کوہ و بياباں سے
گلستاں راہ ميں آئے تو جوئے نغمہ خواں ہو جا

ترے علم و محبت کي نہيں ہے انتہا کوئي
نہيں ہے تجھ سے بڑھ کر ساز فطرت ميں نوا کوئي

ابھي تک آدمي صيد زبون شہرياري ہے
قيامت ہے کہ انساں نوع انساں کا شکاري ہے

نظر کو خيرہ کرتي ہے چمک تہذيب حاضر کي
يہ صناعي مگر جھوٹے نگوں کي ريزہ کاري ہے

وہ حکمت ناز تھا جس پر خرو مندان مغرب کو
ہوس کے پنچہ خونيں ميں تيغ کارزاري ہے

تدبر کي فسوں کاري سے محکم ہو نہيں سکتا
جہاں ميں جس تمدن کي بنا سرمايہ داري ہے

عمل سے زندگي بنتي ہے جنت بھي، جہنم بھي
يہ خاکي اپني فطرت ميں نہ نوري ہے نہ ناري ہے

خروش آموز بلبل ہو ، گرہ غنچے کي وا کر دے
کہ تو اس گلستاں کے واسطے باد بہاري ہے

پھر اٹھي ايشيا کے دل سے چنگاري محبت کي
زميں جولاں گہ اطلس قبايان تتاري ہے

بيا پيدا خريدارست جان ناتوانے را
''پس از مدت گذار افتاد بر ما کاروانے را''

بيا ساقي نواے مرغ زار از شاخسار آمد
بہار آمد نگار آمد نگار آمد قرار آمد

کشيد ابر بہاري خيمہ اندر وادي و صحرا
صداے آبشاراں از فراز کوہسار آمد

سرت گردم تو ہم قانون پيشيں سازدہ ساقي
کہ خيل نغمہ پردازاں قطار اندر قطار آمد

کنار از زاہداں برگيروبے باکانہ ساغر کش
پس از مدت ازيں شاخ کہن بانگ ہزار آمد

بہ مشتاقاں حديث خواجہ بدر و حنين آور
تصرف ہاے پنہانش بچشمم آشکار آمد

دگر شاخ خليل از خون ما نم ناک مي گرد
بيازار محبت نقد ما کامل عيار آمد

سر خاک شہيدے برگہاے لالہ مي پاشم
کہ خونش با نہال ملت ما سازگار آمد

''بيا تا گل بيفشانيم و مے در ساغر اندازيم
فلک را سقف بشگافيم و طرح ديگر اندازيم''​

 

غزليات

غزليات​

 

اے باد صبا! کملي والے سے جا کہيو پ

اے باد صبا! کملي والے سے جا کہيو پيغام مرا

اے باد صبا! کملي والے سے جا کہيو پيغام مرا
قبضے سے امت بيچاري کے ديں بھي گيا، دنيا بھي گئي

يہ موج پريشاں خاطر کو پيغام لب ساحل نے ديا
ہے دور وصال بحر بھي، تو دريا ميں گھبرا بھي گئي!

عزت ہے محبت کي قائم اے قيس! حجاب محمل سے
محمل جو گيا عزت بھي گئي، غيرت بھي گئي ليلا بھي گئي

کي ترک تگ و دو قطرے نے تو آبروئے گوہر بھي ملي
آوارگي فطرت بھي گئي اور کشمکش دريا بھي گئي

نکلي تو لب اقبال سے ہے، کيا جانيے کس کي ہے يہ صدا
پيغام سکوں پہنچا بھي گئي ، دل محفل کا تڑپا بھي گئي​

 

يہ سرود قمري و بلبل فريب گوش ہے

يہ سرود قمري و بلبل فريب گوش ہے

يہ سرود قمري و بلبل فريب گوش ہے
باطن ہنگامہ آباد چمن خاموش ہے

تيرے پيمانوں کا ہے يہ اے مےء مغرب اثر
خندہ زن ساقي ہے، ساري انجمن بے ہوش ہے

دہر کے غم خانے ميں تيرا پتا ملتا نہيں
جرم تھا کيا آفرينش بھي کہ تو روپوش ہے

آہ! دنيا دل سمجھتي ہے جسے، وہ دل نہيں
پہلوئے انساں ميں اک ہنگامہء خاموش ہے

زندگي کي رہ ميں چل، ليکن ذرا بچ بچ کے چل
يہ سمجھ لے کوئي مينا خانہ بار دوش ہے

جس کے دم سے دلي و لاہور ہم پہلو ہوئے
آہ، اے اقبال وہ بلبل بھي اب خاموش ہے​

 

نالہ ہے بلبل شوريدہ ترا خام ابھي

نالہ ہے بلبل شوريدہ ترا خام ابھي

نالہ ہے بلبل شوريدہ ترا خام ابھي
اپنے سينے ميں اسے اور ذرا تھام ابھي

پختہ ہوتي ہے اگر مصلحت انديش ہو عقل
عشق ہو مصلحت انديش تو ہے خام ابھي

بے خطر کود پڑا آتش نمردو ميں عشق
عقل ہے محو تماشائے لب بام ابھي

عشق فرمودہء قاصد سے سبک گام عمل
عقل سمجھي ہي نہيں معني پيغام ابھي

شيوہء عشق ہے آزادي و دہر آشوبي
تو ہے زناري بت خانہء ايام ابھي

عذر پرہيز پہ کہتا ہے بگڑ کر ساقي
ہے ترے دل ميں وہي کاوش انجام ابھي

سعي پيہم ہے ترازوئے کم و کيف حيات
تيري ميزاں ہے شمار سحر و شام ابھي

ابر نيساں! يہ تنک بخشي شبنم کب تک
مرے کہسار کے لالے ہيں تہي جام ابھي

بادہ گردان عجم وہ ، عربي ميري شراب
مرے ساغر سے جھجکتے ہيں مے آشام ابھي

خبر اقبال کي لائي ہے گلستاں سے نسيم
نو گرفتار پھڑکتا ہے تہ دام ابھی​

 

پردہ چہرے سے اٹھا، انجمن آرائي کر

پردہ چہرے سے اٹھا، انجمن آرائي کر

پردہ چہرے سے اٹھا ، انجمن آرائي کر
چشم مہر و مہ و انجم کو تماشائي کر

تو جو بجلي ہے تو يہ چشمک پنہاں کب تک
بے حجابانہ مرے دل سے شناسائي کر

نفس گرم کي تاثير ہے اعجاز حيات
تيرے سينے ميں اگر ہے تو مسيحائي کر

کب تلک طور پہ دريوزہ گرمي مثل کليم
اپني ہستي سے عياں شعلہ سينائي کر

ہو تري خاک کے ہر ذرے سے تعمير حرم
دل کو بيگانہ انداز کليسائي کر

اس گلستاں ميں نہيں حد سے گزرنا اچھا
ناز بھي کر تو بہ اندازئہ رعنائي کر

پہلے خوددار تو مانند سکندر ہو لے
پھر جہاں ميں ہوس شوکت دارائي کر

مل ہي جائے گي کبھي منزل ليلي اقبال!
کوئي دن اور ابھي باديہ پيمائي کر​

 

پھر باد بہار آئي، اقبال غزل خواں

پھر باد بہار آئي، اقبال غزل خواں ہو

پھر باد بہار آئي، اقبال غزل خواں ہو
غنچہ ہے اگر گل ہو، گل ہے تو گلستاں ہو

تو خاک کي مٹھي ہے، اجزا کي حرارت سے
برہم ہو، پريشاں ہو، وسعت ميں بياباں ہو

تو جنس محبت ہے، قيمت ہے گراں تيري
کم مايہ ہيں سوداگر، اس ديس ميں ارزاں ہو

کيوں ساز کے پردے ميں مستور ہو لے تيري
تو نغمہ رنگيں ہے، ہر گوش پہ عرياں ہو

اے رہرو فرزانہ! رستے ميں اگر تيرے
گلشن ہے تو شبنم ہو، صحرا ہے تو طوفاں ہو

ساماں کي محبت ميں مضمر ہے تن آساني
مقصد ہے اگر منزل ، غارت گر ساماں ہو​

 

کبھي اے حقيقت منتظر نظر لباس مجاز

کبھي اے حقيقت منتظر نظر لباس مجاز ميں

کبھي اے حقيقت منتظر نظر لباس مجاز ميں
کہ ہزاروں سجدے تڑپ رہے ہيں مري جبين نياز ميں

طرب آشنائے خروش ہو، تو نوا ہے محرم گوش ہو
وہ سرود کيا کہ چھپا ہوا ہو سکوت پردہء ساز ميں

تو بچابچا کے نہ رکھ اسے، ترا آئنہ ہے وہ آئنہ
کہ شکستہ ہو تو عزيز تر ہے نگاہ آئنہ ساز ميں

دم طوف کرمک شمع نے يہ کہا کہ وہ اثرکہن
نہ تري حکايت سوز ميں، نہ مري حديث گداز ميں

نہ کہيں جہاں ميں اماں ملي، جو اماں ملي تو کہاں ملي
مرے جرم خانہ خراب کو ترے عفو بندہ نواز ميں

نہ وہ عشق ميں رہيں گرمياں، نہ وہ حسن ميں رہيں شوخياں
نہ وہ غزنوي ميں تڑپ رہي، نہ وہ خم ہے زلف اياز ميں

جو ميں سر بسجدہ ہوا کبھي تو زميں سے آنے لگي صدا
ترا دل تو ہے صنم آشنا، تجھے کيا ملے گا نماز ميں​

 

تہ دام بھي غزل آشنا رہے طائران چم

تہ دام بھي غزل آشنا رہے طائران چمن تو کيا

تہ دام بھي غزل آشنا رہے طائران چمن تو کيا
جو فغاں دلوں ميں تڑپ رہي تھي، نوائے زير لبي رہي

ترا جلوہ کچھ بھي تسلي دل ناصبور نہ کر سکا
وہ گريہ سحري رہا ، وہي آہ نيم شبي رہي

نہ خدا رہا نہ صنم رہے ، نہ رقيب دير حرم رہے
نہ رہي کہيں اسد اللہي، نہ کہيں ابولہبي رہي

مرا ساز اگرچہ ستم رسيدئہ زخمہ ہائے عجم رہا
وہ شہيد ذوق وفا ہوں ميں کہ نوا مري عربي رہي​

 

گرچہ تو زنداني اسباب ہے

گرچہ تو زنداني اسباب ہے

گرچہ تو زنداني اسباب ہے
قلب کو ليکن ذرا آزاد رکھ

عقل کو تنقيد سے فرصت نہيں
عشق پر اعمال کي بنياد رکھ

اے مسلماں! ہر گھڑي پيش نظر
آيہ 'لا يخلف الميعاد' رکھ

يہ 'لسان العصر' کا پيغام ہے
''ان وعد اللہ حق'' ياد رکھ''​

 

ظریفانہ

ظریفانہ​

 

مشرق ميں اصول دين بن جاتے ہيں

مشرق ميں اصول دين بن جاتے ہيں

مشرق ميں اصول دين بن جاتے ہيں
مغرب ميں مگر مشين بن جاتے ہيں

رہتا نہيں ايک بھي ہمارے پلے
واں ايک کے تين تين بن جاتے ہيں​

 

لڑکياں پڑھ رہي ہيں انگريزي

لڑکياں پڑھ رہي ہيں انگريزي

لڑکياں پڑھ رہي ہيں انگريزي
ڈھونڈلي قوم نے فلاح کي راہ

روش مغربي ہے مدنظر
وضع مشرق کو جانتے ہيں گناہ

يہ ڈراما دکھائے گا کيا سين
پردہ اٹھنے کي منتظر ہے نگاہ​

 

شيخ صاحب بھي تو پردے کے کوئي حامي

شيخ صاحب بھي تو پردے کے کوئي حامي نہيں

شيخ صاحب بھي تو پردے کے کوئي حامي نہيں
مفت ميں کالج کے لڑکے ان سے بدظن ہو گئے

وعظ ميں فرما ديا کل آپ نے يہ صاف صاف
''پروہ آخر کس سے ہو جب مرد ہي زن ہو گئے''​

 

يہ کوئي دن کي بات ہے اے مرد ہوش من

يہ کوئي دن کي بات ہے اے مرد ہوش مند!

يہ کوئي دن کي بات ہے اے مرد ہوش مند!
غيرت نہ تجھ ميں ہو گي، نہ زن اوٹ چاہے گي

آتا ہے اب وہ دور کہ اولاد کے عوض
کونسل کي ممبري کے ليے ووٹ چاہے گي​