اے کاش عہدِ رسالت میں میں ہوا ہوت

اے کاش عہدِ رسالت میں میں ہوا ہوتا
رسولِ پاک کے قدموں کو چومتا ہوتا

حضور ! آپ کے نعلین ہوتے آنکھوں پر
مدینہ پاک کی راہوں میں یوں بچھا ہوتا

مجھے بھی نسبتِ خاکِ مدینہ مل جاتی
کبھی جو مر کے مدینے کی گردِ راہ ہوتا

میں ان کے شہر کی گلیوں کی کنکری بن کر
گواہی شانِ رسالت کی دے رہا ہوتا

حِرا کے غار میں امت کے غم میں بہہ جاتا
جو ایک قطرہء چشمانِ مصطفیٰ ہوتا

میں نورِ جلوہء حسنِ ازل کی چاہت میں
بلالِ حبشی کی راہوں پہ چل پڑا ہوتا

سگانِ کوچہء جاناں میں نام آتا میرا
نبی کے خوانِ کرم پہ جو پل رہا ہوتا

دیے جلاتا میں پلکوں پہ ایسے شام و سحر
بس ان کے دیکھتے رہنے کا سلسلہ ہوتا

ہزار جان سے قرباں بنامِ سرورِ دیں
میرا وجود بھی سنگِ رہِ وفا ہوتا

رضا سے خار کو قربت چمن کی مل جاتی
میں پھول بن کے جہاں میں مہک گیا ہوتا

اللھم صل علی سیدنا ومولانا محمد وعلی وآلہ وسلم

محمد نعیم رضا​

 

Re: اے کاش عہدِ رسالت میں میں ہوا ہوتا

بہت ہی اچھا کلام ہے
نعیم صاحب! کیا یہ آپ کا کلام ہے یا انتخاب ہے ؟

 

Re: اے کاش عہدِ رسالت میں میں ہوا ہوتا

بحمد اللہ تعالیٰ
مجھ نکمے ہی کو لکھنے کی توفیق دی گئی تھی۔

 

Re: اے کاش عہدِ رسالت میں میں ہوا ہوتا

کتنے لاکھ دلوں‌کی ترجمانی کر دی آپ نے نعیم صاحب۔
بہت خوب ۔ سبحان اللہ بہت پیارا کلام۔ ہر شعر دل میں اتر جانے والا ہے

 

Re: اے کاش عہدِ رسالت میں میں ہوا ہوتا

الحمد للہ تعالیٰ و بتوفیقہِ

 

Re: اے کاش عہدِ رسالت میں میں ہوا ہوتا

نعیم صاحب ۔کیسے لکھتے ہیں ایسا کلام ؟

 

Re: اے کاش عہدِ رسالت میں میں ہوا ہوتا

بہت خوشی ہوئی یہ جان کر اللہ آپ کے ذوق میں اور اضافہ فرمائے

 

Re: اے کاش عہدِ رسالت میں میں ہوا ہوتا

زاہرا جی کا سوال تھا

زاہرا جی جواب تو میں دے چکا ہوں۔

جس سے لکھوایا جائے وہ کیا بتائے گا کیسے لکھا ہے !

 

Re: اے کاش عہدِ رسالت میں میں ہوا ہوتا

اگر ایسا ہے تو اللہ تعالی کا بہت کرم ہے آپ پر

 

Re: اے کاش عہدِ رسالت میں میں ہوا ہوتا

الحمد للہ تعالیٰ

یہ ناز یہ انداز ہمارے نہیں ہوتے
جھولی میں اگر ٹکڑے تمھارے نہیں ہوتے
ملتی نہ اگر بھیک ہمیں آپ کے در سے
اس شان سے منگتوں کے گذارے نہیں ہوتے​

 

Re: اے کاش عہدِ رسالت میں میں ہوا ہوتا

سبحان اللہ

وہ کیا مصرعہ ہے کا

یہ سب تمھارا کرم ہے آقا کہ بات اب تک بنی ہوئی ہے
میں اس کرم کے کہاں‌تھا قابل حضور :saw: کی بندہ پروری ہے

نعیم صاحب آپکی نئی نعت کا انتظار رہے گا

 

نعت : تیری یاد آئی (نعت گو: محمد نع

ایک نعت اور

غمِ ہجراں نے جو گھیرا تو تیری یاد آئی
آنکھ سے اشک جو نکلا تو تیری یاد آئی

میرا ہر لفظ تیری مِدح کے سانچے میں ڈھلا
میں نے جب قلم اٹھایا تو تیری یاد آئی

وہ قصیدہ جو تیری یاد میں دل پہ ہے لکھا
جب سرِ بزم سنایا تو تیری یاد آئی

کر کے تسبیحِ اِلہ سجدے میں سر کو رکھ کر
وقتِ قعدہ جو میں بیٹھا تو تیری یاد آئی

تیری مِدحت، تیرا عرفان ہی ہر جا پایا
میں نے قرآن کو کھولا تو تیری یاد آئی

شبِ والیل میں دیکھی تیرے گیسو کی جھلک
والقمر چاند کو سوچا تو تیری یاد آئی

دل کے آئینے سے ہر نقشِ خیالی دھو کر
میں نے جو خود کو بھلایا تو تیری یاد آئی

شبِ ہجراں تیرے دیدار کی امیدوں پہ
مثلِ شمع جو میں رویا تو تیری یاد آئی

میں نے دربارِ الہی میں رضا بہرِ دعا
جب کبھی ہاتھ اٹھایا تو تیری یاد آئی

(محمد نعیم رضا)​

 

Re: اے کاش عہدِ رسالت میں میں ہوا ہوتا

شکریہ بھائی !
اللہ تعالی اور اسکا حبیب :saw: قبول فرما لیں تو یہی سعادت ہے۔

 

السلام علیکم۔ منا پہلوان اور پاکستانی بھائی ۔
آپ دونوں بھائیوں کی محبتوں کا بہت شکریہ ۔ جزاکما اللہ خیر۔
دعاؤں کی التماس ہے۔