اے خدا اے خدا ( مظفر وارثی)

یہ زمیں یہ فلک، ان سے آگے تلک
جتنی دنیائیں ہے،سب میں تیری جھلک
سب سے لیکن جدا
اے خدا اے خدا

ہر سحر پھوٹتی ہے نئے رنگ سے
سبزہ و گل کھلے سینہِ سنگ سے
گونجتا ہے جہاں تیرے آہنگ سے
جس نے کی جستجو مل گیا اُس کو تو
سب کا تو راہنما
اے خدا اے خدا

ہر ستارے میں آباد ہے اک جہاں
چاند سورج تیری روشنی کے نشاں
پتھروں کو بھی تو نے عطا کی زباں
جانور آدمی کر رہے ہیں سبھی
تیری حمد و ثنا
اے خدا اے خدا

نُور ہی نُور بکھرا ہے کالک نہیں
دُوسرا کوئی حدِ گماں تک نہیں
تیری وحدانیت میں کوئی شک نہیں
لاکھ ہوں صورتیں ایک ہی رنگ میں
تو ہے جلوہ نما
اے خدا اے خدا

سونپ کر منصبِ آدمیت مجھے
تو نے بخشی ہے اپنی خلافت مجھے
شوقِ سجدہ بھی کر اب عنایت مجھے
خم رہے میرا سر تیری دہلیز پر
ہے یہی التجا
اے خدا اے خدا

مجموعہِ حمد : لا شریک​

 

اللہ تعالیٰ آپ کوبھی جزائے خیر عطا کرے آمین

 

سبحان اللہ- جزاک اللہ

 

اللہ تعالیٰ آپ کو بھی جزائے خیر عطا کرے آمین