ایک تازہ غزل : خزاں کی رُت میں خیالِ بہار لے ڈوبا

خزاں کی رُت میں خیالِ بہار لے ڈوبا
ترا فراق ہمیں دیکھ یار لے ڈوبا

نہیں وہ عشق نہیں اور کچھ ہوا ہوگا
اسی لیے تو تمھیں وہ خمار لے ڈوبا

سنا تھا ہم نے گزرتا ہے وقت تیزی سے
مگر ہمیں تو یہاں انتظار لے ڈوبا

مجھے اتار کے شیشے میں اس نے ہنس کے کہا
تمھیں خبر ہے؟ تمھیں اعتبار لے ڈوبا

کبھی نگاہ کرو اس زوال کی جانب
حقیقتوں سے تمھیں یہ فرار لے ڈوبا

ہیں منتظر کہ پکاروگے ایک دن ہم کو
مگر تمھیں تو ، انا کا حصار لے ڈوبا

کسی طرح نہیں آتا ہمارے قابو میں
یہ دل ہی تھا جو ہمیں بار بار لے ڈوبا

ہے عاجزی بھی ضروری مگر خیال رہے
یہ کل نہ کہنا پڑے انکسار لے ڈوبا

میں چاہتا ہوں کہ اب بات ختم ہو سعدی
کہ آپ یہ نہ کہیں نابکار لے ڈوبا

 

بہت خوبصورت غزل
تمہیں وہ عشق نہیں کچھ نشہ ہوا شائد-----ایک رائے تاکہ خمار کی وجہ بھی ساتھ ہو

 

پسندیدگی کا بہت شکریہ...
نشہ اور خمار ایک ہی بات ہے....
مصرعے میں خمار کی وجہ واضح ہے....