این آر بی کی شاعری

"تشخص"

( نوجوانوں کے نام)

تجھے پہچاں نہیں اپنی
تِری پہچان کیا ہوگی؟
گلِ بے رنگ و بُو تجھ سے
چمن کی شان کیا ہوگی؟
تڑپ نا آشنا ہے تُو
دلِ بیدار پیدا کر
تِرا چہرہ ہے بے چہرہ
لب و رُخسار پیدا کر!
فسانہ لکھ جہاں کا تُو
نئے کردار پیدا کر
تخیل کی زمیں ہو جا
گُل و گلزار پیدا کر!
ہے تیری ذات میں مضمر
تِری مشکل کا حل ناداں!
شروع ہو گا سفر یوں ہی
قدم دو چار چل ناداں!
بموجِ نغمہء ہستی
سنبھل ناداں، مچل ناداں!

- ابنِ منیب

 

"سَعی"

حج میں سَعی کرتے کرتے

تھک کر دو پَل بیٹھ گیا میں،

سُنتا ہوں آواز اَنجانی

قدموں کی اِک چاپ پُرانی

روتے اِک معصوم کی چِیخیں!

حیراں ششدر گُم صُم تھا میں

سوچ رہا تھا، چُپ چُپ تھا میں

حال میں مجھ کو دیکھ کے ایسے

سب سے آنکھ بچا کر جیسے

مَروَہ میرے کان میں بولی

"غور سے سُن نادان لاہوری!

بھُول کے اپنی ذات کو کیسے

ننھی سی اِک جان کے غم میں

تپتے اِک صحرا میں تنہا

ماں کی ممتا دوڑ رہی ہے!"

- ابنِ مُنیب

 

درد جب بے قرار کرتا ہے
ہر نفَس ذکرِ یار کرتا ہے
ہم تمنا ہزار لاتے ہیں
وہ بہانے ہزار کرتا ہے
درد دیتا ہے ساز ہستی کو
دل جگر تار تار کرتا ہے
گُل ہے، گُلشن ہے، اور وہ، دیکھیں!
کون کِس کو شِکار کرتا ہے
روزِ محشر وہ محرمِ ہستی
زخم سارے شمار کرتا ہے
اہلِ گُلش نے کی رَپَٹ میری
ذکرِ فصلِ بہار کرتا ہے
تھام لیتی ہیں وحشتیں صاحب!
کب کوئی اختیار کرتا ہے
مُجکو لمحہ اَجَل کا دیکھ گیا
اب مِرا انتظار کرتا ہے!

- ابنِ مُنیب

 

بہت عمدہ

 

بہت شکریہ

 

"ڈیجیٹل شاعری – فوٹو"

زندگی کی فوٹو کے
ایک ایک پِکسَل سے
روشنی تِری جھلکے
اور تُو نہیں تو پھر
اِک سیاہ پردے پر
گمشدہ نشاں ہوں میں
وہم ہُوں، گُماں ہُوں میں!

- ابنِ مُنیب

 

لا جواب !! بہت خوب !! جذبات ابھارنے کے لیے شکریہ محترم !!

 

بہت اعلیٰ ۔ بہت عمدہ ۔

 

خوبصورت لڑی ۔۔۔ شکریہ محترم