اُن کی قُدرت بیشتر ہے، اُن کی رحمت بیشتر ۔۔ مقصود علی شاہ

اُن کی قُدرت بیشتر ہے، اُن کی رحمت بیشتر
ہم گنہگاروں کو ہے یہ بہرِ جنّت بیشتر

نُور زادے پا رہے ہیں خیرِ نعلینِ کرم
مہر و ماہ و نجم سے ہے اُن کی طلعت بیشتر

حیرتوں کے بیچ ہی تھا شہرِ جاناں کا سفر
واپسی پر پھر سے ہونے کو ہے حیرت بیشتر

نسبتِ بَردہ میسّر ہے مجھے نسلوں کے سنگ
میرے حصے میں رہے گی در کی نسبت بیشتر

بے سبب ملتا ہے مجھ کو میری حاجت سے سوا
میری قسمت کم طلب ہے، اُن کی قدرت بیشتر

دشتِ ناز و حُسن کے ہیں خار و خس حیرت فزا
رنگ سے رنگت فزوں ہے، گُل سے نکہت بیشتر

اُن کے ذکرِ خیر کے ہیں نُور پرور تذکرے
رفعتوں کے اوج پر ہے اُن کی رفعت بیشتر

خامۂ نُدرت پہ اُن کی بے نہایت رحمتیں
دامنِ خواہش میں ہے فیضانِ مدحت بیشتر

مجھ کو ہے مقصود اُس خیر الوریٰ سے واسطہ
مقصد و مطلوب سے ہے جس کی رحمت بیشتر
-----
مقصود علی شاہ​

 

سبحان اللہ جزاک اللہ