اس کی عمر 40 سال تھی اور گزشتہ 18 سال سے وہ ایک لڑکی کا انتظار کر رہا تھا۔ اس لڑکی کا جسے اس نے اسی شہر میں دیکھا تھا جو بعد میں نوکری کی تلاش میں دوسرے شہر چلی گئی تھی۔ جس روز وہ اسے اپنی محبت کا بتانے گیا تھا عین اسی روز وہ شہر چھوڑ کر جارہی تھی۔ ’میں تمہیں ہر روز خط لکھوں گی، تم پریشان مت ہونا‘، لڑکی نے جاتے ہوئے اسے یقین دلایا تھا۔ اور اس کے حصے گزشتہ 18 سال سے صرف پریشانی ہی آئی تھی۔ ایک روز بس اسٹاپ پر وہ گاڑی کا انتظار کررہا تھا کہ گاڑی سے وہ عورت اتری کہ جس کا انتظار وہ گزشتہ 18 سال سے کررہا تھا۔ سالوں کے فاصلے کے باوجود نوجوان نے اسے فوراً پہچان لیا تھا۔ وہ دوڑ کر آگے بڑھا۔ وہ اتنا بدحواس تھا کہ اسے اس خاتون کے ساتھ موجود آدمی بھی نظر نہیں آرہا تھا۔ ’زرینہ تم آگئیں، اتنے سال بعد؟‘، اس نے فوراً پوچھا۔ عورت نے اسے غور سے دیکھا، ماضی کے صفحات کھنگالے لیکن کچھ برآمد نہ ہوا۔ ’معاف کیجیے گا، میں نے آپ کو پہچانا نہیں۔‘ ’’ میں ظہیر ہوں...‘ ’معذرت میں کسی ظہیر کو نہیں جانتی، آپ کو شاید کچھ غلط فہمی ہوئی ہے.‘
