اشعار بہ لحاظ حروف تہجی

ٹوٹا تو ہوں مگر ابھی بکھرا نہیں فراز
میرے بدن پہ جیسے شکستوں کا جال ہو

 

جس طرح لوگ خسارے میں بہت سوچتے ہیں
آج کل ہم تیرے بارے میں بہت سوچتےہیں

 

چہرے سجے سجے ہیں تو دل ہیں بجھے بجھے
ہر شخص میں تضاد ہے دن رات کی طرح

 

حسرت لطف عزیزان چمن جی میں رہی
سر پہ دیکھا نہ گل و سرو کا سایہ ہم نے

 

خاک سے جدا ہو کر ، اپنا وزن کھو بیٹھا
آدمی معلق سا رہ گیا خلاؤں‌میں

 

دل کا کیا ہے دل نے کتنے منظر دیکھے لیکن
آنکھیں پاگل ہو جاتی ہیں ایک خیال سے پہلے

 

ذرا سی بات پہ وہ ہو گیا خفا ہم سے
ذرا سی بات کا دل کو ہوا ملال بہت

 

معذرت کے ساتھ دوستو،شرکت کرنا چاہتا ہوں، اس وقت یہی یاد پڑ رہا ہے "ر" سے۔
رات ابھی باقی ہے،
بات ابھی باقی ہے۔

 

زیست کا اعتبار کیا ہے امیر
آدمی بلبلہ ہے پانی کا ۔ ۔ ۔

 

شراب بند ہو ساقی کے بس کی بات نہیں
تمام شہر ہے ، دو چار دس کی بات نہیں

 

صرف دِن ڈھلنے پہ موقوف نہیں ہے "محسن"
زندگی زُلف کے سائے میں بھی شب کرتی ہے

 

ضروب و تقسیم وصؔی عشق میں لا حاصل ہے
جانے کیوں کھوجتے رہتے ہو حسابوں میں مجھے

 

طوفان نوح لانے سے اے چشم فائدہ
دو اشک بھی بہت ہیں اگر کچھ اثر کریں

 

ظالم مرے گماں سے مجھے منفعل نہ چاہ
ہَے ہَے خُدا نہ کردہ، تجھے بے وفا کہوں
غالب

 

عجیب سانحہ مجھ پر گزر گیا یارو
میں اپنے سائے سے کل رات ڈر گیا یارو

 

غمِ الفت مرے چہرے سے عیاں کیوں نہ ہوا ،
آگ جب دل میں سلگتی تھی، دھواں کیوں نہ ہوا.

 

فرسودہ تصور کے مکوڑوں کو مسل دے
الفت کو ادھر پھینک کمانے کے لیے آ

 

قاصد پیام شوق کو دینا بہت نہ طول
کہنا فقط یہ ان سے کہ آنکھیں ترس گئیں
جلیل مانک پوری

 

کتنی ڈھل گئی عمر تمہاری حیرت ہے
اب تک کیسے رہی کنواری حیرت ہے

 

گو دعویِ تقویٰ نہیں درگاہِ خدا میں
بُت جس سے ہوں خوش ایسا گنہ گار نہیں ہوں
اکبر الہ آبادی

 

لمحہ در لمحہ گزرتا ہی چلا جاتا ہے
وقت خوشبو ہے بکھرتا ہی چلا جاتا ہے

 

محوِ آرائشِ رُخ ہے وہ قیامت سرِ بام
آنکھ اگر آئینہ ہوتی تو نظارہ کرتے
عبید اللہ علیمؔ

 

نہیں آتی تو یاد ان کی مہینوں تک نہیں آتی
مگر جب یاد آتے ہیں تو اکثر یاد آتے ہیں

 

وہ کوئی دوست تھا اچھے دنوں کا
جو پچھلی رات سے یاد آ رہا ہے

 

ہم سے پوچھو مزاج بارش کا
ہم جو کچے مکان والے ہیں

 

یارب کسی کے رازِ محبت کی خیر ہو
دستِ جنوں رہے نہ رہے، آستیں رہے

 

اس نے چھو کر مجھے پتھر سے پھر انسان کیا
مدتوں بعد میری آنکھوں میں آنسو آئے ۔ ۔ ۔ ۔