اشعار بہ لحاظ حروف تہجی

جبر کے اندھیروں میں زندگی گزاری ہے
اب سحر جو آئے گی ، وہ سحر ہماری ہے
انشاللہ

 

چاند کا دشت بھی آباد کبھی کر لینا
پہلے دنیا کے یہ اجڑے ہوئے گھر تو دیکھو

 

خود غرض ہوتا تو ہجوم ہوتا ساتھ
مخلص ہوں اس لیے تو تنہا ہوں

 

ذرا ذرا سی شکایت پہ روٹھ جاتے ہیں
نیا نیا ہے ابھی شوق دل ربائی کا

 

زیر پا اب نہ زمیں ہے نہ فلک ہے سر پر
سیل تخلیق بھی گرداب کا منظر نکلا

 

شرم آتی ہے کہ اس شہر میں ہم ہیں کہ جہاں
نہ ملے بھیک تو لاکھوں کا گزارا ہی نہ ہو

 

صورت تو دکھاتے ہیں گلے سے نہیں ملتے
آنکھوں کی تو سن لیتے ہیں دل کی نہیں سنتے

 

طلب یہ ہے کہ تم مل جاؤ
حسرت یہ کہ زندگی بھر کے لیے

 

عرصے سے قرض دار تھا دل پیار کا سو کل
عدم ادائیگی پہ، نبض ! کاٹ دی گئی

 

غنیمت ہے بہم مل بیٹھنا بھی
اگرچہ وصل کا لمحہ الگ ہے

 

فضائے تیرہ سے مانوس تھی نگاہ میری
فلک سے ورنہ میں درّانہ کیوں گُزر جاتا

 

قبائے جسم کے ہر تار سے گزرتا ہوا
کرن کا پیار مجھے آفتاب کر دے گا

 

کچھ غلط تو نہیں تھا میرا تنہا ہونا
آتش و آب کا ممکن نہیں یک جا ہونا

 

گزرے ہیں میکدے سے جو توبہ کے بعد ہم
کچھ دور عادتا بھی قدم ڈگمگائے ہیں ۔۔۔

 

لہروں میں ڈوبتے رہے دریا نہیں ملا
اس سے بچھڑ کے پھر کوئی ویسا نہیں ملا

 

میرے دل میں کوئی معصوم بچہ
کسی سے آج تک روٹھا ہوا ہے

 

نہ بات پوری ہوئی تھی کہ رات ٹوٹ گئی
ادھورے خواب کی آدھی سزا میں جیتے ہیں

 

وقت سے پوچھ رہا ہے کوئی
زخم کیا واقعی بھر جاتے ہیں؟؟؟؟؟؟

 

ہم کو اچھا نہیں لگتا کوئی ہم نام تیرا
کوئی تجھ سا ہو تو پھر نام بھی تجھ سا رکھے

 

یہی ہے عبادت ، یہی دین و ایماں
کہ کام آئے دنیا میں انساں کے انساں

 

بعد مرنے کے بھی مٹی میری برباد رہی
میری تقدیر کے نقصان کہاں جاتے ہیں

 

پاوں پھیلائے تو دیکھی نہ چادر ہم نے
تجھ کو چاہا تو پھر اوقات سے بڑھ کر چاہا

 

تکو گے راہ سہاروں کی تم میاں کب تک
قدم اٹھاؤ کہ تقدیر انتظار میں ہے ۔۔۔