اسے اٹھالو

یہ اپنی مرضی سے سوچتا ہے ، اسے اٹھا لو
اٹھانے والوں سے کچھ جدا ہے ، اسے اٹھا لو
وہ بے ادب اس سے پہلے جن کو اٹھا لیا تھا
یہ ان کے بارے میں پوچھتا ہے ، اسے اٹھا لو
اسے بتایا بھی تھا کہ کیا بولنا ہے ، کیا نہیں بولنا
مگر یہ اپنی ہی بولتا ہے ، اسے اٹھا لو
یہ پوچھتا ہے کہ امن و عامہ کا مسئلہ کیوں ہے
یہ امن و عامہ کا مسئلہ ہے ، اسے اٹھا لو
اسے کہا تھا جو ہم دکھائیں ، بس اتنا دیکھو
مگر یہ مرضی سے دیکھتا ہے ، اسے اٹھا لو
سوال کرتا ہے یہ دیوانہ ہماری حد پر
یہ اپنی حد سے گزر گیا ہے ، اسے اٹھا لو