اردو بقلم _ آصیؔ

متحدہ عرب امارات سے ایک پاکستانی کے دل کی آواز۔۔۔۔
ایک زمانہ تھا جب اردو رابطے کی زبان تھی۔ جوں جوں اہلِ زبان اس جہانِ فانی سے کوچ کرتے گئے اردو کیساتھ سوتیلی ماں جیسا سلوک ہونے لگا اور اس میں دیگر زبانوں کے الفاظ کی کثرت ہونے لگی۔ موجودہ نسل کے جوان اردو میں انگریزی ہندی اور پتا نہیں کون کون سی زبانوں کے الفاظ شامل کرکے گفتگو کرتے ہیں جبکہ نئی نسل جسے پاکستان کا مستقبل کہا جاتا ہے انگریزی کا جملہ مکمل کرکے آخر میں یا درمیان میں ”ناں“ ” ہاں“ کا اضافہ کرکے سمجھتے ہیں ہم اردو بول سکتے ہیں۔ بد قسمتی سے ہمیں احساس ہی نہیں کہ ہم کس بے دردی سے اپنی خوبصورت قومی زبان کا قتل عام کر رہے ہیں۔ اردو کی موجودہ شکل میں دیگر زبانوں کی آمیزش اس قدر ہو چکی ہے کہ اب یہ معلوم کرنا دشوار ہو جاتا ہے کون سا لفظ کس زبان سے تعلق رکھتا ہے۔ اربابِ اختیار کو اس قومی ورثے کے تحفظ کیلئے اقدام اٹھانے چاہیئے یا پھر انتظار کریں کہ ہم اپنے بچوں کو یا وہ اپنے بچوں کو بتایا کریں گے کہ ایک وقت تھا جب ہمارے ہاں اردو بولی اور سمجھی جاتی تھی پھر ہم ترقی پسند ہوگئے۔۔۔۔۔۔۔