اب کیا کریں گے؟

۲۵ سال کی نوکری کے بعد میری ریٹائرمنٹ آئی تو ہر طرف سے ایک ہی سوال مختلف الفاظ میں میرے سامنے آنا شروع ہوا کہ اب کیا کریں گے۔فوج میں آنے سے پہلے کا سوال میرے زہن میں گردش کرنے لگا جب نوجوانی میں یہی سوال تھا کہ تعلیم کے ایک درجہ کے مکمل ہونے کے بعد اب کس شعبے میں داخلہ لیا جائے یا کس شعبے میں نوکری کے لیے درخواست دی جائے۔میں سوچنے لگا کہ ۲۵ سال بعد بھی اگر میری سوچ کا محور اگر وہی نوجوانی والا ہے تو میں نے کیا پایا؟ کیا ان تمام سالوں میں میرا رازق اللہ کے سوا کوئی اور تھا یا کیا ان تمام سالوں میں میں اپنی محنت کے بل پر آگے جاتا رہا اور اللہ کے کرم کا اس میں کوئی دخل نہیں تھا۔ جوں جوں سوچتا گیا اپنی کم مائیگی کا احساس فزوں ہوتا گیا۔ جب میں نے فوج میں بھرتی کا امتحان دیا تو میں کیا تھا۔ فقط ایک میٹرک پاس نا تجربہ کار لڑکا۔ وہ بھی ایک عمومی تعلیمی قابلیت کے ساتھ کہ کسی نامور کالج میں داخلہ کے لیے میرٹ پر بھی نہیں آتا تھا۔ پھر اللہ نے ایسا کرم کیا کہ فوج کے امتحان میں کامیابی ملی اور میں جونئیر کیڈٹ بن کر فوج کی صفوں میں داخل ہوا اور افسری کے خواب دیکھنے لگا۔میٹرک کے بعد کی تمام تعلیم مجھے فوج نے دلوائی اور چار سال کی ٹریننگ کے بعد افسر بنا دیا گیا۔اس کے بعد ترقی کے مدارج طے کرتے میں ایک ایسے رینک پر پہنچ کر ریٹائر ہو رہا ہوں جو لوگوں کی نظر میں بہت قابل احترام ہے۔آج جب میں مڑ کے دیکھتا ہوں تو اس میں میری قابلیت کا کوئی دخل نظر نہیں آتا بلکہ صرف اللہ کا کرم ہے کہ میں اس مقام پر کھڑا ہوں۔ اس کرم کو حق الیقین کے ساتھ دیکھ لینے کے بعد بھی اگر میں "مستقبل" سنوارنے کی فکر یا فکر معاش کا شکار ہوتا ہوں تو گویا میں نے کچھ نہیں سیکھا۔

اللہ تعالیٰ نے رزق کی فراہمی کا زمہ خود اٹھایا ہے۔یہ ایک غیبی وعدہ ہے جس پر ہم سب کا یقین ہے۔ اور اگر اس غیبی وعدے کو مجازی شکل میں بھی دکھا دیا جائے تو پھر انسان کے پاس کیا بہانہ رہ جاتا ہے۔ اللہ تعالیٰ نے میرے ساتھ بھی یہی کیا ہے کہ فراہمی رزق کے غیبی وعدے کو مجازی صورت میں بھی دکھا دیا۔ یہ مجھے ملنے والی پینشن کی صورت میں ظاہر ہوا۔ جب تک میں اور میری بیوی زندہ ہیں فوج کی طرف سے ایک مخصوص رقم مجھے ملتی رہے گی۔ یہ اس غیبی وعدے کی مجازی صورت ہے۔اس ظہور کے بعد میرے لیے کوئی جواز نہیں ہے کہ میں فکر معاش میں مبتلا ہو جاوں۔ حصول رزق حلال عین عبادت کی تاویل بھی میرے معاملے میں کارگر نہیں کیونکہ میرے لیے رزق کی فراہمی غیبی وعدہ نہیں رہا۔اللہ تعالیٰ نے میرے رزق کا ظاہری سبب بھی مجھے دکھا دیا ہے۔

میں نے اپنی ریٹائرمنٹ کے بعد تین چیزوں کا فیصلہ کیا ہے۔ پہلا یہ کہ نوکری نہیں کروں گا۔دوم یہ کہ کاروبار نہیں کروں گا۔ اور تیسرا یہ کہ کسی بڑے شہر میں سکونت اختیار نہیں کروں گا۔ میری یہ بات سن کر اکثر لوگ پھر وہی سوال دہرا دیتے ہیں کہ پھر کیا کرو گے۔کچھ ہمدرد اسے ترک دنیا تصور کرتے ہوئے نصیحت کرتے ہیں کہ دنیا میں رہ کر دنیاداری نہیں چھوڑی جا سکتی۔کچھ لوگ اس بات کا خوف دلاتے ہیں کہ اس مہنگائی میں صرف پینشن پر گزارہ نہیں ہوتا۔کچھ لوگ اس کو عدم مصروفیت کہہ کر فارغ دماغ شیطان کا گھر کہہ کر منع کرتے ہیں۔ایک کوشش ہے کہ میرے ارادے جو مبہم الفاظ میں بیان ہوئے ہیں ان کی کچھ تشریح کروں۔

سب سے پہلا فیصلہ کہ نوکری نہیں کروں گا۔جب آپ نوکری کرتے ہیں تو آپ کا اپنا مقصد حصول معاش کے سوا کچھ نہیں ہوتا۔آپ کسی دوسرے کے مقصد کو پورا کرنے کے لیے محنت کرتے ہیں۔۲۵ سال کی نوکری میں یہ سمجھ آ گئی ہے کہ نوکری میں آپ اپنا مقصد متعین کر کے اس کی حصول کی جد و جہد نہیں کر سکتے۔نوکری نہ کرنے کے فیصلے کا یہ مطلب ہرگز نہیں ہے کہ میں کسی ادارے یا فرد کے لیے کام نہیں کروں گا۔اگر کسی فرد یا ادارے کے مقصد سے میں اتفاق کرتا ہوں تو اس کے لیے ضرور کام کروں کا اور تنخواہ بھی لوں گا مگر مقصد حصول معاش نہیں ہو گا۔

دوسرا فیصلہ کہ کاروبار نہیں کروں گا۔اس بات کو سمجھنے کے لیے ہم کاروبار کی وہ تعریف دیکھتے ہیں جو اکنامکس کی کتابیں بتاتی ہیں۔ کاروبار میں آپ سرمایہ لگاتے ہیں تاکہ سرمائے میں اضافہ ہو۔ یعنی پیسہ لگا کر پیسہ کمانا کاربار کا مقصد ہے۔جب مقصد ہی پیسہ ہے تو کاروبار کیوں کروں۔اگر کوئی شخص یہ کہے کہ میں ایک فیکٹری لگانا چاہتا ہوں تاکہ تارکول بناوں تو آپ یقینا اسے بیوقوف کہیں گے۔ کیونکہ تارکول پیٹرولیم کی بائی پروڈکٹ ہے۔ مقصد آئل ریفائنری رکھیں تو تارکول خود بخود آئے گا۔ جس طرح تارکول کی فیکٹری لگانے والے شخص کا مقصد غلط ہے اسی طرح پیسہ لگا کر پیسہ کمانے کا مقصد بھی غلط ہے۔ پیسہ کسی بھی کاروبار کی بائی پروڈکٹ ہے۔مقصد اعلیٰ رکھیں بائی پروڈکٹ خودبخود آئے گی۔میں کاربار کرنے کو بھی غلط نہیں سمجھتا جب تک کہ مقصد پیسہ کمانا نہیں ہے۔ مقصد لوگوں کو اچھی پروڈکٹ دینا ہو یا یہ کہ میرے توسط سے اللہ کسی کے رزق کا وسیلہ بنا دےتو بائی پراڈکٹ یعنی پیسہ یا رزق پھر بھی آئے گا۔

تیسرا فیصلہ کہ بڑے شہر میں نہیں رہوں گا۔شہروں کی زندگی ایک مصنوعی زندگی ہے۔شہروں نے انسان کو قدرت کے مظاہر سے دور کر دیا ہے اس لیے شہر میں سکونت اختیار کر کے میں اپنی زندگی کے مصنوعی دور کو مذید دراز نہیں کرنا چاہتا۔ اقبال نے کہا تھا۔

فطرت کے مقاصد کی کرتا ہے نگہبانی
یا بندہ صحرائی یا مرد کہستانی

تو اردہ یا تو صحرا نشینی یا پھر پہاڑوں میں سکونت کا ہے۔

 

آپ کا مضمون تفصیلی جواب کا متقاضی ہے
اسے پرنٹ آوٹ کر کے ساتھ لے جا رہا ہوں رہائش پر جا کر فرصت میں جواب لکھوں گا

 

میرا خیال ہے کوئی کام نہ کرنا فطرت سے روگردانی ہے

 

انسان کی زندگی میں پہلا انقلاب اس وقت آتا ہے جب وہ اپنی تعلیم مکمل کر کے عملی زندگی میں قدم رکھتا ہے دوسرا لمحہ وہ ہے جب وہ اپنی مدت ملازمت پوری کر کے پیشہ ورانہ ذمہ داریوں سے سبکدوش ہو جاتا ہے ۔

ایک اور دریا کا سامنا تھا منیر مجھ کو
میں ایک دریا کے پار اترا تو میں نے دیکھا
​

متحرک عملی زندگی گزارنے کے بعد اپنے آپ کو زندگی کے ایک نئے دور سے ہم آہنگ کرنا ایک دشوار مرحلہ ہے خصوصاََ ان افراد کے لئے جو ایک بھرپور اور متحرک عملی زندگی گزار چکے ہوں۔ ان میں افواج پاکستان کے افسران اور جوان سرفہرست ہیں۔ میرے خاندان کے کئی افراد کا تعلق فوج سے ہے میرے دادا اشرف شاہ رائل برٹش آرمی کی طرف سے جنگ عظیم دوئم میں برما کے محاذ پر خدمات انجام دے چکے ہیں۔ فوجی کی عملی زندگی دوسروں کی نسبت بہت مختلف ہوتی ہے کڑا نظم و ضبط ایک فوجی کی پہچان ہے جس کا اثر بڑی حد تک اس کی خانگی زندگی میں بھی نمایاں رہتا ہے۔ حکم دینا اور حکم کی تعمیل کرنا فوجی کی سرشت میں شامل ہے یس سر اوکے سر ان دو الفاظ کے علاوہ فوجی نہ کچھ کہتا ہے نہ کچھ سنتا ہے کیونکہ کہ فوجی زندگی میں حکم کی بجا آوری کو ایمان کا درجہ حاصل ہے اور یہ ایمان ہی ہے جو فوجی کو کبھی سیاچین کے برف زارومیں اور کبھی وزیرستان کے سنگلاخ پہاڑوں میں وطن کے لئے جان تک قربان کر دینے پر اکساتا ہے ۔ فوج سے ریٹائرمنٹ کے بعد کی عملی زندگی اگرچہ بہت مختلف ہوتی ہے مگر اس میں بھی فوجی کی سوچ نمایاں ہوتی ہے۔ ہمارے پراجیکٹ ڈائیرکٹر میجر محمد اجمل خان ہیں جو نادرا کی طرف سے پراجیکٹ کو مانیٹر کرتے ہیں ۔ ایک بار پیشہ ورانہ امور پر گفتگو کرنے کے لئے ان کے دفتر جانے کا اتفاق ہوا میرے ہاتھ میں ایک لفافہ تھا جس میں چند متعلقہ کاغذات تھے لفافے پر جلی حروف میں میجر ریٹائرڈ محمد اجمل خان لکھا تھا میجر صاحب پڑھ کر بہت برہم ہوئے وجہ پوچھنے پر فرمایا آپ نے غلط لکھا ہے میجر ریٹائرڈ محمد اجمل خان کے بجائے میجر محمد اجمل خان ریٹائرڈ لکھنا چاہئے تھا اجمل خان ریٹائر ہو گیا مگر میجر ابھی ریٹائر نہیں ہوا۔ مطلب یہ ہوا کہ فوجی ہر وقت حالت جنگ میں رہتا ہے اب ضروری نہیں کہ جنگ کے لئے لڑائی کا میدان ہو بلکہ یہ کوئی بھی میدان ہو سکتا ہے ۔ اب آتے ہیں ریٹائرمنٹ کے بعد کی عملی زندگی کی طرف آپ کے کہنے کے مطابق آپ پر اللہ کا خاص کرم ہوا اور اچھے نمبر نہ ہونے کے باوجود آپ فوج میں بھرتی ہو گئے۔ اللہ جب بندے پر اپنا خاص کرم کرتا ہے تو اس کے لئے خود ہی راستے بنا دیتا ہے ۔
25 سال کڑے نظم و ضبط میں زندگی گزارنے کے بعد ایک نئی زندگی آپ کی منتظر ہے۔

کھول آنکھ زمیں دیکھ، فلک دیکھ، فضا دیکھ
مشرق سےابھرتے ہوئے سورج کو زرا دیکھ​

آپ نے کیا کرنا ہے یہ فیصلہ آپ کی سوچ طبیعت اور مزاج پر منحصر ہے ۔ صرف اتنا کہوں کا کہ جو فیصلے آپ نے کئے ہیں ان کے مضمرات پر بھی اچھی طرح غور کر لیں رزق کا وعدہ اللہ نے کیا ہے مگر اس کے ساتھ قران پاک میں یہ بھی فرما دیا ہے "وَأَنْ لَيْسَ لِلْإِنْسَانِ إِلَّا مَا سَعَى"

مالی دا کم پانی دینا بھر بھر مشکاں پاوے
مالک دا کم پَھل پُھل لانا لاوے یا نہ لاوے​

ارادے اور مقصد کا تعین آپ نے نہیں اللہ نے کرنا ہے آپ نے صرف قدم اٹھانا ہے بس اخلاص نیت شرط ہے ارادے اور نیت نیک ہوں تو کچھ عجب نہیں کہ منزل آپ کئ سامنے ہو۔

راہ طلب میں ہو جذبہِ کامل جس کے ساتھ
خود اس کو ڈھونڈ لیتی ہے منزل کبھی کبھی ​

ارادے اور نیت نیک نہ ہوں تو نہ صرف منزل کھوٹی ہو جاتی ہے بلکہ انسان راہ سے بھٹک کر گمراہیوں میں میں پڑ جاتا ہے۔

بس اک قدم اٹھا تھا غلط راہ شوق میں
منزل تمام عمر دھونڈتی رہی مجھے​

 

واصف بھائی!
اس موضوع پر تو تفصیلی بات ہو سکتی ہے۔
شادی کے بعد سے کچھ ایسا ہی میرے دماغ میں بھی چل رہا ہے۔
سرِ دست جو مجھے سمجھ آیا ۔ آپ کے پہلے دو فیصلے تو معاشی تگ و دو کے حوالے سے ہیں۔
پینشن کی سہولت کے پیش نظر کیا آپ عملی زندگی سے کنارہ کش ہونا چاہتے ہیں؟
کیا انسانی تگ و دو صرف فکرِ معاش کے لیے ہے؟
زندگی میں میں بہت کم لوگوں سے حقیقی طور پر انسپائر ہوا ہوں۔ اور آپ بھی ایک ایسی ہستی ہیں ۔
ہر لحاظ سے ایک مکمل، باشعور اور توانائی سے بھرپور انسان۔
اور سونے پہ سہاگہ کہ ارشین آپی جیسی پیاری شخصیت آپ کی ہم سفر بھی ہیں۔
ارشین آپی کے اوپر موجود ایک ہی جملے۔
"سر تسلیم خم ہے جو مزاج یار میں آئے"
سے اندازہو جاتا ہے کہ وہ آپ کے ساتھ کس حد تک انڈرسٹینڈگ رکھتی ہیں اور کوآپریٹو ہیں۔
آپ یقین کریں میں عفت کو بھی اکثر ارشین آپی کی مثال دیتا ہوں ۔
اللہ کریم آپ دونوں کو تاعمر شاد آباد رکھے۔
میں سمجھتا ہوں آپ جیسا انسان معاشرے میں بہت اہم کردار ادا کر سکتا ہے اور بہت سوں کے لیے نمونہ بن سکتا ہے۔
جیسی متحرک زندگی آپ نے اب تک گزاری ہے میرا تو خیال ہے آپ اب ایکٹوٹیز سے دور نہیں رہ پائیں گے۔ اور رہنا بھی نہیں چاہیے۔
باقی آپ کی بات سے اتفاق کرتا ہوں اور آپ کے جذبات کی قدر کرتا ہوں۔ کہ اگر کچھ کام کیا جائے تو مقصد صرف پیسہ نہ ہو ۔ آپ اس کام سے دوسروں کے لیے وسیلہ بن سکتے ہیں ۔
باتیں تو اور بہت سی ہیں ذہن میں لیکن کچھ ربط نہیں بن رہا۔
ان شاءاللہ جلد حاضر ہوں گا دوبارہ۔ کسی پرسکون علاقے کی طرف جانے کا ارادہ ہے تو "ملک وال" کیسا رہے گا

 

نعیم بھائی کو بھی آجانا چاہئیے

 

نعیم صاحب کا اچھا تجزیہ ہے مگر میرے خیال میں واصف بھائی جیسے بندے کا فارغ رہنا صلاحیتوں کو زنگ لگانے کے مترادف ہے

 

محبوب خان

 

سب سے پہلے تو میں تمام احباب کا شکر گزار ہوں کہ میری اس تحریر پر آپ نے اپنی آراء پیش کی جو میرے لیے ایک مشعل راہ اور اثاثہ ہیں۔

میری تحریر سے شاید اس بات کا اظہار ہو رہا ہے کہ میں سب کچھ چھوڑ کر گوشہ نشینی کا ارادہ باندھ رہا ہوں۔ ایسا بالکل نہیں ہے۔ یہ دنیا جائے امتحان ہے اور یہاں پر جو کچھ انسان کو دیا گیا ہے اس کی پرسش ہو گی۔ اللہ کی عنایت کردہ چیزوں میں ایک چیز صلاحیت بھی ہے اور اس کے بارے میں بھی ضرور پرسش ہو گی کہ جو صلاحیتں انسان کو ودیعت کی گئی ہیں ان کا کیا استعمال کیا۔اس لیے اگر میرے بیان میں کہیں گوشہ نشینی کی بات ہے تو اس کے لیے میں آپ سے معذرت اور اللہ تعالیٰ ست استغفار کرتا ہوں۔

ذیل میں ایک کوشش ہے کہ میں اپنے خیال کی کچھ وضاحت کر سکوں۔

مسئلہ یہ نہیں کہ اب کیا کریں۔ مسئلہ یہ ہے کہ اس طرح کریں کہ مقصد اور معاش میں سے کس چیز کو ترجیع دی جانی چاہیے۔

آپ کا خیال بجا ہے۔ کام کرنا کئی وجوہات کی بنا پر ضروری ہے۔
پہلا یہ کہ اسلام ہمیں گوشہ نشینی کی تعلیم نہیں دیتا۔ اصل دین یہ ہے کہ دنیا میں رہ کر اللہ کو رب مانا جائے۔اس کی عبادت کے لیے تنہائی نہیں بلکہ اس کی دنیا کا انتخاب کیا جائے۔
دوسرا یہ کہ ایک انسان کے توسط سے اللہ دوسرے انسان کی فلاح کرتا ہے۔
تیسرا یہ کہ خالی دماغ شیطان کا گھر ہے۔زندگی نام ہی جد و جہد کا ہے اور ترک جہد موت ہے۔

 

زندہ باد

 

جی درست فرمایا، مگر دوسری مرتبہ انقلاب کا سامنا کرنے کے لیے آپ کے پاس ایک تجربہ ہوتا ہے۔ یہ تجربہ اگر آپ کے فیصلے میں کوئی تغیر نہیں لاتا اور آپ ایک مرتبہ پھر حالات کی رو میں بہہ کر جو سمت نظر آئے اس پر چل دیں تو میری رائے میں یہ مناسب نہیں۔ یاد رہے کہ پانی ہمیشہ نشیب کی طرف جاتا ہے اور اگر انسان حالات کی رو میں بہنا شروع کر دے تو ہمیشہ پستی کی طرف جاتا ہے۔ ہاں کچھ خوش نصیب ایسے ہوتے ہیں جو بہتے بہتے سمندر سے جا ملتے ہیں اور ابدیت پا لیتے ہیں مگر اکثریت شاخوں سے الجھے شاپنگ بیگ کی طرح بے فیض ہی رہتے ہیں۔

سعی کی اہمیت سے تو کوئی انکار نہیں۔مگر مقصد کا تعین درست سمت میں ہونا ضروری ہے۔

یہاں میں اختلاف کروں گا کہ ارادہ آپ نے کرنا ہے اور توکل اللہ پر کرنا ہے۔ توکل یقین اور کوشش کا مرکب ہے۔ ارشاد باری تعالیٰ ہے
فَاِذَا عَزَمۡتَ فَتَوَکَّلۡ عَلَی اللّٰہِ ؕ اِنَّ اللّٰہَ یُحِبُّ الۡمُتَوَکِّلِیۡنَ

اس راہ میں سب سے کٹھن مرحلہ ہی یہ ہے۔ بقول شاعر
تلاش منزل کے مرحلوں میں یہ حادثہ اک عجیب دیکھا
فریب رستے میں بیٹھ جاتا ہے صورت اعتبار بن کر

 

اسی نقطہ پر تو میں بھی زور دے رہا ہوں کہ ایسا کوئی کام نہ کروں جس کا مقصد حصول معاش ہو۔
معاش یا رزق جیسا کہ میں نے پہلے کہا کہ بائی پراڈکٹ ہے۔ جو بھی کام کریں اس سے رزق تو آئے گا۔ اس لیے مقصد کی تبدیلی کی بات کر رہا ہوں۔
جیسا کہ نبی اکرم ایک صحابی کا نیا گھر دیکھنے گئے تو ارشاد کیا کہ یہ روشن دان کس لیے بنوایا ہے۔ انہوں نے کہا کہ روشنی اور ہوا کے لیے۔ حضور نے فرمایا اگر مقصد اذان کی آواز رکھتے تو پھر بھی روشنی اور ہوا تو آنے ہی تھے۔یعنی اپنا مقصد اعلیٰ رکھیں ادنیٰ چیزیں بائی پراڈکٹ ہیں خود ہی چلی آئیں گی۔

میری زوجہ کا یہ جملہ محض ادبی مصرعہ نہیں ہے بلکہ یہ اس کا اصل خیال ہے۔ میں اللہ کا جس قدر شکر کرؤں کم ہے کہ اس نے مجھے ایسی شریک حیات عطا کی ہے۔میری تمام کمزوریوں کے باوجود وہ ہمیشہ میرے ہمراہ رہی اور مجھے اسقدر پختہ یقین ہے کہ آج میں اس سے کہوں کہ ہم جنگل میں جھونپڑی بنا کر رہیں گے تو وہ بغیر کسی حجت کے میرے ساتھ ہو لے گی۔

 

کاش میں اتنا صاحب نظر ہوتا کہ اب تک مقصد کی شناخت کر چکا ہوتا۔ مگر اتنا یقین ہے کہ اللہ جس کو توفیق عطا کرتا ہے اسے سمجھ بھی عطا کرتا ہے۔ جیسے کسی نے ایک بزرگ سے پوچھا کہ حضرت میں روز توبہ استغفار کرتا ہوں مگر معلوم نہیں اللہ کی بارگاہ میں قبولیت بھی ملتی ہے کہ نہیں۔ بزرگ نے فرمایا، اللہ جسے معاف کرنا چاہتا ہے اسی کو توبہ کی توفیق دیتا ہے۔
اللہ نے جب فکر معاش سے آزاد ہونے کی توفیق دی ہے تو راستہ بھی ضرور دکھائے گا۔

 

میں کیا اور میری اوقات کیا کہ اپنی صلاحیتوں کی بات کرؤں۔ اللہ بہتر جانتا ہے اور وہی راستہ دکھانے والا ہے۔ یہ تو میں پہلے ہی کہہ چکا ہوں کہ میں ترک دنیا کی طرف مائل نہیں ہوں۔

 

بہت عمدہ بات کی ہے۔ اللہ کا شکر ہے کہ اس نے فکر فردا میں سے میرے لیے فکر معاش کو دور کر دیا ہے۔ اللہ نے مجھے یہ فراغت کس کام کے پورا کرنے کے لیے دی ہے اس کا تعین کرنا ضروری ہے۔ اللہ ہی سب کو راہ دکھاتا ہے اور مجھے یقین کامل ہے کہ وہ مجھے بھی راہ ضرور دکھائے گا۔

میری زوجہ کے سامنے میری زندگی ایک کھلی کتاب ہے اور ہم ہر ایک معاملہ باہمی مشورے اور رضامندی سے کرتے ہیں۔میں اس لٰہاظ سے بھی خوش قسمت ہوں کہ میری زوجہ ہمیشہ میری معاون رہی ہے۔

 

ان سوالات کے بہت سے ضمنی سوالات جنم لے رہے ہیں جن کا تجزیہ درست سمت میں ضروری ہے انشاءاللہ یہ مفید بحث چلتی رہے گی اور اس آپ ہی نہیں اور بھی بہت سے فائدہ اٹھائیں گے

 

میرے خیال میں مستقبل کے بارے میں آپ کے جو عزائم ہیں ان کو مدنظر رکھتے ہوئے درس و تدریس کا شعبہ آپ کو بہت سوٹ کرتا ہے۔ ماشاءاللہ سمجھانے کا انداز بھی آپ کا بہت زبردست ہے۔ نیز یہ نوکری اور کاروبار سے ہٹ کر بھی ہے

 

کریں گے اہلِ نظر تازہ بستیاں آباد
مری نگاہ نہیں سوئے کوفہ و بغداد

 

واصف بھائی نے تو صرف کاروبار اور نوکری نہیں کرنے کا لکھاہے۔۔۔۔اس لیے یہ کہنا کہ کوئی کام نہ کرنا ۔۔۔۔۔۔کچھ درست نہیں ہے۔

 

جی ھارون بھائی ۔۔۔۔۔اس حوالے سے واصف بھائی سے میری گفتگو چونکہ پہلے ہوچکی ہے۔۔۔۔۔۔اس لیے آگاہ تھا۔۔۔۔۔۔۔۔دیگر رائے دیتا رہوں گا۔

 

پراجیکٹ کوئی بھی شروع کیا جا سکتا ہے مگر بنیادی بات پھر بھی وہی رہنی چاہیے کہ مقصد اعلیٰ ہو۔ اس سلسلے میں میرے زہن میں دو شعبے ہیں۔

پہلا جانور پالنا۔ دودھ کے لیے نہیں بلکہ گوشت کے لیے۔ مویشی اور باالخصوص بکریاں تو تمام انبیاء کا پیشہ رہا ہے۔ یہ کام آپ کو ڈسپلن اور برداشت سکھاتا ہے اور یہ کام قدرت کے نزدیک تر ہے۔ اس کا ذیلی فائدہ یہ ہے کہ عید کے موقع پر مویشیوں کے بیوپاری لوگوں کا استحصال کرتے ہیں اور میری کوشش ہو گی کہ کم از کم اپنے حلقہ احباب میں مناسب قیمت پر مویشی فراہم کر سکوں۔

دوسرا کمپیوٹر انسٹیٹیوٹ کھولنا۔ کمپیوٹر کا شعبہ میری مہارت کا شعبہ ہے جس میں میں نے 20 سال کام کیا ہے۔ علم انسان کے پاس امانت ہے اور امانت کو آگے پہنچانا ضروری ہے۔ اس کے علاوہ درس و تدریس انبیاء کی سنت ہے۔اس لیے میرا ارادہ ایک غیر منافع بخش کمپیوٹر کا ادارہ بنانے کا بھی ہے۔

اللہ تعالیٰ سے دعا ہے کہ وہ مجھے سمجھ اور استقامت عطا کرے۔آمین۔

 

واصف بھائی صلاحیت اور قابلیت تو اللہ تعالیٰ نے آپ کے اندر خوب رکھی ہے
اور اگر فنائسنگ بھی خوب ہے تو اسی کام سے بسم اللہ کیجئے گا۔
بس ایک مشورہ ہے کہ آغاز کرنے کے لئے موزوں علاقہ جہاں پر آپ ذہنی طور پر مطمئین ہوں اس کا فیصلہ کر لیجئے۔
آپ شروع کرنے کا ارادہ بنائیں اللہ تعالیٰ اس کو آگے بڑھانے کا انتظام کر دے گا انشااللہ