آمنہ بی بی کے گھر آئی ہے دولت کیسی ۔ میلاد النبی ص پر تازہ ہدیہ نعت

12 ربیع الاول میلاد النبی کی مناسبت سے تازہ ترین 12نعتیہ اشعار پیش خدمت ہیں۔
اللھم صل علیٰ سیدنا ومولانا محمد وعلیٰ آلہ وصحبہ وبارک وسلم

آمنہ بی بی کے گھر آئی ہے دولت کیسی
کُھل گئی آج گنہگاروں کی قسمت کیسی

رقص میں حورِ جناں، قُدسی ملائک سارے
چھائی خوشیاں ہیں یہ چہروں پہ ہے فرحت کیسی

ہیں محمد، ہوں گے رحمت یہ جہانوں کےلیے
خواب میں آمنہ کو ملتی بشارت کیسی

جوابوالبشرکی پیشانی میں چمکا تھا وہ نور
بیتِ عبداللہ میں بن آیا کرامت کیسی ؟

ساری ماؤں میں خدا بانٹ رہا ہے بیٹے
ہوئی میلادِ نبی پر یہ ضیافت کیسی

وقتِ میلاد خدا نے بھی لگائے جھنڈے
بڑھ گئی چاند ستاروں میں یہ نُزہت کیسی

پیکرِ نور پہ دل ہاری حلیمہ دائی
کتنی خوش بخت تھی وہ لے گئی نعمت کیسی

ہوئے اَسوار جو سرکار تو ناقہ دوڑی
دائیاں حیراں تھی ملی اسکو یہ طاقت کیسی

دیکھ لے آج حلیمہ کہ تیرے پَروُردہ
کیسے سلطان ہیں، پائی ہے حُکومت کیسی

اہل دانش ہیں انگشتان بدندان کھڑے
کامل و ارفع و بےعیب ہے سیرت کیسی

شہرِ طیبہ تُو بنا مسکنِ شاہِ عالَم
ورنہ ہونی تھی کروڑوں کو عقیدت کیسی

ہے کرم ،رحمتِ عالم کا بڑا تجھ پہ رضا
قلم تیرے میں وگرنہ ہے یہ طاقت کیسی


کلام : محمد نعیم رضا قادری ۔ 18دسمبر 2015 بروز جمعۃ المبارک
​

نوٹ: اشعار میں بیان کردہ احوال کی تائید مختلف کتب سیر بالخصوص
المواہب اللدنیہ، الخصائص الکبریٰ، الوفا من القاضی عیاض، السیرۃ الحلبیہ، الانوار المحمدیہ وغیرہم سے ہوتی ہے۔​

 

سبحان اللہ۔ بہت ہی اعلیٰ کلام لکھا ہے جزاک اللہ

 

پسندیدگی اور حوصلہ افزائی کا شکریہ ۔ جزاک اللہ خیر۔