آرزو اتنی ہے جانِ آرزو

آرزو اتنی ہے جانِ آرزو
<center>جستجو و جستجو و جستجو</center>
ضبط غم سے تھی ہماری آبرو
<center>اشک رک جائے ٹپکتا ہے لہو</center>
ھم کو ذوق دید لے آیا کہاں
<center>آئینہ ہم، ہم نظر ہم روبرو</center>
خاموشی ہے گوش بر آواز کیوں
<center>بام و در میں ہورہی ہے گفتگو</center>
منبرِ تلقین پر رندِ خراب
<center>چڑھ گیا ہے ہاتھ میں لیکر سبو</center>
بند ہوجائے تو کھل جاتی ہے آنکھ
<center>دور سے آتی ہے پیراہن کی بُو</center>
ٹوٹ جاتی ہے کلی کھلتی نہیں
<center>دامن گل ہو نہیں سکتا رفو</center>
آنکھ ساجد آنکھ ہی مسجود ہے
<center>خونِ دل سے آنکھ کرتی ہے وضو</center>
کم نگاہی ہے حرم سے بدگماں
<center>چشم بینا ہو تو کعبہ چار سو</center>
بن کے افسانہ ترا جانِ بہار
<center>پھر رہا ہے آج واصف کو بہ کو</center>