این آر بی کی شاعری

ہماری اردو کے دیرینہ صارف، عمدہ مزاح نگار اور کہنہ مشق شاعر @این آر بی (نوید رزاق بٹ ) فیس بک پر گاہے بگاہے اپنی شاعرانہ تخلیق کے شاہکار اپلوڈ کرتے رہتے ہیں۔
انکی محبتوں کو یاد رکھتے ہوئے انکی دستیاب شاعری یہاں ہماری اردو کے صارفین کی خدمت میں پیش کی جاتی ہے


کیسی تاویل مِرے دوست، بہانہ کیسا
زخم جاگیرِ محبت ہیں، چُھپانا کیسا

حدتِ لمس سے جلتا ہے بدن جلنے دو
پہلوئے یار میں دامن کو بچانا کیسا

شعر در شعر ٹپکتا ہے قلم سے میرے
ڈھونڈ رکھا ہے تیرے غم نے ٹھکانا کیسا

آ کے اِک روز بچا لے گا مسیحا کوئی
دیکھ بیٹھے تھے سبھی خواب سہانا کیسا

دن کے ڈھلتے ہی تری یاد کی خوشبو بن کر
جاگ اٹھتا ہے کوئی درد پرانا کیسا

ہم نے ہر موڑ پہ بیچا ہے اصولوں کو نویدؔ
اور اب ہم کو شکایت، ہے زمانہ کیسا

(نویدؔ رزاق بٹ)

 

صفحَہ صفحَہ گزر رہے ہیں دن
ہم ہیں کردار اِک فسانے کے

حالِ دل پوچھتے ہیں محفل میں
دیکھ انداز آزمانے کے

کُھل گئی آنکھ جب مریدوں کی
کُھل گئے بھید آستانے کے

لب پہ شکوہ، نہ اشک آنکھوں میں
سیکھ آداب دل لگانے کے

تنکا تنکا لُٹا دیا تم نے
تم محافظ تھے آشیانے کے

نویدؔ رزاق بٹ

 

"بہار آئی تھی ایک پل کو"

ابھی تو کہنے تھے راز دل کے
ابھی تو خاموش تھے فسانے
ابھی تو کھُلنے کو مضطرب تھے
حساب سارے نئے پرانے
ابھی تو غنچے بھی نہ کھِلے تھے
ابھی تو بلبل بھی بے خبر تھا
ابھی تو سُوکھے پڑے تھے پتےّ
ابھی تو سوزِ فراق تر تھا
تم آئے اور یوں چلے گئے بس؟
چلو یونہی پھر
تمھارے آنے کی اِس خوشی میں
ہم اپنے دل کے غموں کو لے کر
جلائیں گے اور جلا کے روشن
اداس راتیں کیا کریں گے
چمن میں بیٹھے ہوئے فخر سے
ہر ایک پتےّ ہر اِک شجر سے
گزرتے راہی سے رہگزر سے
تمھاری باتیں کیا کریں گے
بہار آئی تھی ایک پل کو
چمن میں برسوں رہا چراغاں!

(نوید رزاق بٹ)

 

بھری محفل میں وہ تنہا رہا ہے
کہ جس دل کو تِرا سودا رہا ہے
کِیا ہے جس نے مذہب عشق اپنا
زمانے بھر میں وہ رُسوا رہا ہے
ثنا خوانوں کی سازش ہے یقینا
بُرا ہر دور میں اچھا رہا ہے
لکیریں ہاتھ کی وِیران ہیں اب
کبھی اِن میں تِرا چہرہ رہا ہے
حقیقت جانتا ہے ہر بَلا کی
مصیبت میں بھی جو ہنستا رہا ہے
سبھی کردار سہمے پھر رہے ہیں
نہ جانے موڑ کیسا آ رہا ہے
بجھے گی پیاس اِک دن، اِس ہوس پر
لبِ ساحل لبِ دریا رہا ہے
وفا کے گیت گاتا حُسن صاحب
یونہی دل آپ کا بہلا رہا ہے

نویدؔ رزاق بٹ

 

اقبال کی وصیت

۔

نوشتہءِ رُخِ بشر
نویدِ راہِ بیکراں

عذابِ فکر و آگہی
عذاب وہ کہ الاماں

نگاہِ شوق مُضطرب
حجابِ ہوش درمیاں

سپاہِ عقل بے خبر
نگاہِ عشق رازداں

سکونِ قلب ذِکرُہُ
غفور و عَفْو و مہرباں

انا شہیدِ مرگِ دل
خودی حیاتِ جاوداں

رہینِ ذات ضو بجیب
ندیمِ خلق ضو فشاں

(نویدؔ رزاق بٹ)

 

تُو شریکِ سفر ہُوا نہ مگر
تیری خوشبو ہے ہمسفر میری
ذِکر تیرا ہے رُوح میں رقصاں
تجھ کو مانگے ہے چشمِ تَر میری
ایک ذرہ ہُوں ایک ذرے پر
ذات کتنی ہے معتبر میری؟
پوچھتا پھر رہا ہوں تاروں سے
کیا کسی کو مِلی خبر میری؟
چشمِ ساقی کو بھُول بیٹھا ہُوں
دستِ ساقی پہ ہے نظر میری
کل وہ چُپکے سے مُسکرائیں گے
آج برہم ہیں بات پر میری
آج پھر اِس اندھیر نگری میں
لُوٹ لی شاہ نے سَحَر میری
اپنے انجام کی طرف صاحِب
عمر بڑھتی ہے عمر بھر میری!

(نویدؔ رزاق بٹ)

 

استاد

پڑھانا کاروبارِ زندگی لاکھوں کا ہے لیکن
تڑپنا جو سکھاتے ہیں، وہی اُستاد ہوتے ہیں
سبق پڑھ کر پڑھا دینا ہنر ہے عام لوگوں کا
جو دل سے دل جلاتے ہیں، وہی اُستاد ہوتے ہیں

(نویدؔ)

 

سوچ کا سلسلہ ہے، اور میں ہوں
عکس ہے، آئینہ ہے، اور میں ہوں

دیکھیئے کیا سفر میں گزرے ہے
دشت ہے، رہنما ہے، اور میں ہوں

لوٹتے سب ہیں اپنی فطرت کو
پھر وہی راستہ ہے، اور میں ہوں

توڑ کر آئینے نظر آیا
چار سُو اِک خلا ہے، اور میں ہوں

پھر سے ٹوُٹے گا دل یہ بے چارہ
پھر وہی بے وفا ہے، اور میں ہوں

( نویدؔ رزاق بٹ)

 

سپنے دیکھو
پَر اپنے دیکھو

گھر گھر کی چھوڑو
گھر اپنے دیکھو

جھکنے نہ پائیں
سر اپنے، دیکھو

اشکوں سے سینچو
تھر اپنے دیکھو

افلاک تمھارے
پر اپنے دیکھو

( نوید رزاق بٹ)

 

خداوندا
تِرا بندہ
تِری تعریف کرتا ہے
کہ تُو مالک جہانوں کا
کہ تُو خالق جہانوں کا
کہ تُو رحمن ہے مولی
تُو عالی شان ہے مولی
مُصور تُو
جہاں تیرا
زمیں تیری
زماں تیرا
تِرے در پر
جھکا کر سر
تِرا بندہ
تجھے مانگے!
دکھا دے راہ وہ مولا
جو تجھ تک لے چلے مجھ کو
کہ تیری دید کو ترسیں
یہ آنکھیں رات دن برسیں!

(نویدؔ رزاق بٹ)

 

آپ کی محبتوں کا بے حد شکریہ نعیم بھائی ۔

 

آپ کی تشریف آوری پر دل بہت مسرور ہوا۔ امید ہےگاہے بگاہے شرفِ ملاقات بخشتے رہیں گے۔

 

ایک سوال

کِیا ہے کس نے خراب لوگو
بتاؤ کر کے حساب لوگو
ہمی تو ہیں اِس چمن کے باسی
ہمی نے روندے گلاب لوگو!

ترستے پنچھی نے جان دے دی
ملی نہ پانی کی بوند اُس کو!
چُرائے کس نے چمن کے چشمے؟
سجائے کس نے سراب لوگو؟

کِیا ہے کس نے خراب لوگو
بتاؤ کر کے حساب لوگو
ہمی تو ہیں اِس چمن کے باسی
ہمی نے روندے گلاب لوگو!

یہ رشوتوں کا نظام، ہائے
یہ جھُوٹا سچا کلام، ہائے
یہ منصبوں کو سلام، ہائے
یہ ‘تیز دولت’ کے خواب لوگو

کِیا ہے کس نے خراب لوگو
بتاؤ کر کے حساب لوگو
ہمی تو ہیں اِس چمن کے باسی
ہمی نے روندے گلاب لوگو!

(نویدؔ بٹ)

 

بہت شکریہ نعیم بھائی ۔ یہ فیس بک شام کا وقت لے جاتی ہے زیادہ تر۔ مگر انشاءاللہ اب کوشش کر کے ادھر بھی چکر لگا لیا کرونگا۔ آپ کا تازہ کلام بھی دیکھنا ہے

 

ایک تازہ شعر

کتابِ حسرت میں خاص ہو گا کمالِ حسرت کا یہ فسانہ
نہ صبح پھوٹی، نہ آس ٹوٹی، نہ تُو ہی آیا، نہ دل ہی مانا
(نوید رزاق بٹ)

 

بہت شکریہ بلال بھائی

 

ہر پل دلِ ناشاد تجھے یاد کرے ہے
یوں وقت تِری یاد میں برباد کرے ہے
لٹکا ہُوا زنجیر سے ملتا ہے محل میں
اِس دَور میں مظلوم جو فریاد کرے ہے
مِلتا ہے درِ یار سے اِکسیر کی صُورت
وہ درد جو ہر درد سے آزاد کرے ہے

(نوید رزاق بٹ)

 

واہ ۔۔ کیا کہنے نوید بھائی۔ بہت عمدہ !!!

 

بے حد شکریہ بلال بھائی اور نعیم بھائی۔ بہت خوشی ہوئی آپ کے پیغام پڑھ کر

 

سوچ کا سلسلہ ہے، اور میں ہوں
عکس ہے، آئنہ ہے، اور میں ہوں

دیکھیئے کیا سفر میں گزرے ہے
دشت ہے، رہنما ہے، اور میں ہوں

لوٹتے سب ہیں اپنی فطرت کو
پھر وہی راستہ ہے، اور میں ہوں

توڑ کر آ ئینے نظر آیا ۔۔۔ !
چار سُو اِک خلا ہے، اور میں ہوں

پھر سے ٹوُٹے گا دل یہ بے چارہ
پھر وہی بے وفا ہے، اور میں ہوں

(نوید رزاق بٹ)

 

شعر در شعر ٹپکتا ہے قلم سے میرے
ڈھونڈ رکھا ہے تیرے غم نے ٹھکانا کیسا
بہت خوب این آ ر بی بھائی سارا کلام ہی بہت عمدہ ہے اور نعیم بھائی آپ کا بھی بہت شکریہ ہماری اردو کے ایک پرانے اور بہترین صا رف کو واپس لانے کے لیے

 

ذِکر تیرا جہاں، وہاں ٹھہرے
درد والے کہاں کہاں ٹھہرے!

اشک راہی ہیں اور تُو منزل
تُو ہی آئے نہ کارواں ٹھہرے

جو بھی کرنا ہے جلد ہی کر لو
وقت کس کے لئے مِیاں ٹھہرے؟

اپنی وُسعت سے کچھ زمیں والے
آسمانوں کے آسماں ٹھہرے

شیخ بانٹے ہے نفرتیں، رِند بھی!
دل جو ٹھہرے تو اب کہاں ٹھہرے؟

بَیچ کھایا جنہوں نے کلِیوں کو
ہائے گُلشن کے پاسباں ٹھہرے!

کچھ تعلق نہیں تھا دُنیا سے
چار پَل کو مگر یہاں ٹھہرے

- ابنِ منیب

(نوٹ: میں نے اب باقاعدہ طور پر قلمی نام 'ابنِ منیب' اختیار کر لیا ہے۔ ان شاءاللہ نئی کاوشیں اِسی نام سے پیش کرونگا)

 

بہت اعلیٰ ابن منیب بھائی ۔
ایک ایک شعر پر ہزارہا داد قبول ہو
ابنِ منیب خوبصورت اور مناسب تر قلمی نام ہے۔

 

ہمیشہ کی طرح بھرپور حوصلہ افزائی کا بہت شکریہ نعیم بھائی