میری ایک غزل ۔

شیشے کی صداؤں سے بندھا ایک سماں تھا
میں منتظر ِجنبشِ انگشتِ مغاں تھا

پیہم جو تبسم مرے چہرے سے عیاں تھا
وہ اس دلِ صد چاک پہ اک کوہِ گراں تھا

نومیدئ عالم ہوئی مہمیز جنوں کو
اوپر سے مہر بان کفِ کوزہ گراں تھا

اسکندر و پرویز تو ویرانے میں گم تھے
پر تربتِ درویش پہ میلے کا سماں تھا

کی جس کے لیے وسعتِ افلاک مسخر
وہ گوہر ِمقصود قریب ِ رگِ جاں تھا

آسودگیءِ خاطرِ مضطر ہوا آخر
اک درد جو مدت سے مرے دل میں نہاں تھا

کیوں تیز ہیں اجرام فلک اے شبِ یلدا ؟
کیا تیری طرح ان کو مرے غم کا گماں تھا ؟

کیا ظلم ہے کیا جہل ہے معلوم نہیں کچھ
شانوں پہ مگر بار امانت کا گراں تھا

تھا ناصیہ فرسا جو ترے نقشِ قدم پر
محجوب بصد جلوہ نہ مقدورِبیاں تھا

 

آداب۔

 

بہت آداب۔

 

بہت اعلی !
سید عاطف علی صاحب بہت سی داد قبول کیجئے۔

 

بہت آداب نعیم صاحب