ترے کرم سے ہے بستانِ زندگی تازہ

نعت ِ سرورِ کونین
صلی اللہ علیہ وآلہ وسلم
۔۔۔۔۔۔۔۔۔۔۔۔۔۔۔

کچھ ایسی لطف و کرم کی ہوا چلی تازہ
کہ میرے دل میں کھلی نعت کی کلی تازہ
حرم کی تیرہ شبی جس سے مستنیر ہوئی
حرا کی کوکھ سے پھوٹی ہے روشنی تازہ
بہار قلب و نظر کا ہوا سماں پیدا
نہال دل میں کھلیں کونپلیں کئی تازہ
صدا کو زمزمہ نو حروف کو معنی
ملی مغنی جاں کو بھی نغمگی تازہ
ترے ثبات سے عزم حسینؓ زندہ ہے
ترے جلال سے ہے ضرب حیدریؓ تازہ
ہے تیرے ساز سے پرسوز سینہ حبشیؓ
ہے تیرے فقر سے روحِ ابوذریؓ تازہ
فروغ جلوہ گہِ کن ترے ہی دم سے ہے
ترے کرم سے ہے بستانِ زندگی تازہ
پڑے جبیں پہ شکن تو فلک لرز اٹھے
تو مسکرائے، تو ہو رسم دلبری تازہ
ترے پیام سے فکر و شعور چونک اٹھے
ملی تعجب و حیرت کو آگہی تازہ
ترے مزاج سے تہذیب کی ہوئی تذہیب
ملی تمدنِ بے جاں کو زندگی تازہ
کتاب دل کو عطا کی ہے شرحِ نو تونے
حدیث شوق کو بخشی ہے دل کشی تازہ
ترے نثار دگر گوں ہے حال امت کا
سجا رہا ہے جہاں بزم کافری تازہ
عطا ہو پھر دلِ مسلم کو حیدری جوہر
فضائے صحن حرم میں ہے ابتری تازہ
​

 

جواب: ترے کرم سے ہے بستانِ زندگی تازہ

سبحان اللہ العظیم۔
شاکر القادری بھائی ۔ خوبصورت اور ایمان افروز نعت شریف ہے۔تقبل اللہ ورسولہ :saw:

 

جواب: ترے کرم سے ہے بستانِ زندگی تازہ

سبحان اللہ :222:

جزاک اللہ خیر

 

جواب: ترے کرم سے ہے بستانِ زندگی تازہ

بحان اللہ بہت خوب

 

جواب: ترے کرم سے ہے بستانِ زندگی تازہ

بہت خوبصورت الفاظ۔

ایک لڑی میں آپ کے بارے میں ہارون بھائی اور آصف بھائی کا تبصرہ پڑھا تھا۔ سچ کہوں تو میں اسے مبالغہ آرائی تصور کرتی رہی مگر یہ نعت پڑھ کر آپ کی شخصیت کے ارفع ہونے کا ادراک ہوا۔ خدا آپ کو جزائے خیر دے

 

جواب: ترے کرم سے ہے بستانِ زندگی تازہ

بہت زبردست

 

جواب: ترے کرم سے ہے بستانِ زندگی تازہ

نعیم ، حسن رضا، نور محمد ، تانیہ، بزم خیال، ارشین بخاری، محمد بوٹا! آپ سب کی محبت اور پسندیدگی کے لیے شکریہ!
ارشین بخاری! آپ نے درست سمجھا، ہارون بھائی اور ڈاکٹر آصف صاحب نے واقعی میری تعریف میں وہ کچھ کہہ دیا ہے جس کا میں اہل نہیں ہوں، میں انکے اس مبالغہ کو محض انکی ذرہ نوازی پر محمول کرتا ہوں ورنہ من آنم کہ من دانم۔ مجھ جیسا ناچیز ان ستائشی کلمات کا اہل کہاں ہو سکتا ہے

 

@شاکرالقادری بھائی ۔ اللہ پاک آپ کی ملنساری قبول فرماکر آپ کی عزت و توقیر اور علم و عرفان میں مزید اضافہ فرمائے۔ آمین